Pasa a Tina na A’otauina i Tomai Eseese - DYW

Ua fa’alauiloa mai e le Matagaluega o Tupulaga ma Tina, o le masina lenei, o le a faia ai se fa’aaliga tele o galuega na faia e tina sa a’otauina i polokalama eseese uma lava na fa’atupe e le matagaluega mai lenei tausaga atoa.

 

“O nei polokalama e aofia uma ai lava le su’isu’i, lalagaina o fala, polavai, pola sisi, ietoga, fala lili’i fa’avulu, gaosia o le elei ma siapo, ie tiedye ma ie so’oso’o; o kuka eseese ua saunia e i latou sa i ai i vasega kuka; o teu ua mae’a saunia e i latou sa aofia i le a’oga tui teu; o le teuina o lauao mo i latou sa a’o’oga i le vasega otiulu ma teuulu; ma isi lava mea uma sa a’oina ai tina e le matagaluega.” O se fa’amatalaga aloaia lea a le susuga Pa’u Roy Ausage, le fa’atonu le tumau o le matagaluega.

 

O se mea e sili ona lelei mo nei tina uma, ua le gata ina maimoaina e le mamalu lautele a latou galuega fa’atino, ae ua tatala le avanoa lelei e fa’aalia ai au oloa, ma fa’atau atu fo’i i se tau e faia lava e oe, le tina na gaosia oloa.

 

“O le fa’aosofia fo’i o le tagata e tapena mai ana oloa gaosi, o le naunau ina ia maua ai se seleni aua lenei vaitaimi o aso fiafia, ma e tatau ona sailia le tamaoaiga mo le aiga fo’i latou.” O se isi lea saunoaga a Pa’u.

 

O lo ua fa’atulagaina lenei fa’aaliga mo le aso 20 Tesema,  2013 ma e faia lava ae ua tulata i le vaitaimi o le Kerisimasi ina ia fiafia fa’atasi fo’i aiga e maimoaina lea fa’aaliga tele a tina o le atunu’u. E faia lava i le Malae o Suigaula a le Atuvasa i Utulei.

 

E amata ona tatala faitoto’a o lea Pasa i le lautele i le itula e 8:00 i le taeao, ae fa’ato’a tapunia i le 12:00 i le aoauli.

 

Peita’i o le ituala e 6:00 o le afiafi lava o le aso lea e tatala ai i lea lava nofoaga le fa’afiafiaga ua mafai ona o’o atu ai so’o se tasi e lelei i tulaga o musika ina ia fa’aalia lana taleni.

 

“O ni avanoa lelei lea ua tu’uina atu mo le mamalu o tupulaga, aua o i latou e fiafia tele i pesega, musika eseese ma le sisiva, se o mai e fiafia fa’atasi, pese sau pese, ae aua le fiafia e tagofia le ‘ava malosi i lenei tausaga i ona aso fiafia, e lamatia ai fo’i le nofo filemu o aiga, ae le malutia ai fo’i le soifua i feoaiga i alatelevavave i alatele.” O le tima’i lea a Pa’u i le mamalu o tupulaga talavou, lea e masani ona vaovaogata i vaitau fiafia fa’apenei.

 

O le sao lea o fatuga ma pesega, o se tasi o a’oa’oga fa’apitoa sa aofia i ai e fiafia i musika ma fatuga fa’asamoa sa fa’atautaia e le matagaluega. Afai o le a e naunauta’i e fia auai i nei mea lelei uma, ia e vala’au ane i le telefoni a le Matagaluega o Tupulaga ma Tina 633-2836, ma tusia ai lou suafa i le polokalama ua e manatu e te auai.

Comment Here