Ads by Google Ads by Google

Pailate Malemo Latalata i le Malae i Faleolo

O se tasi o alo o Samoa o lo’o avea ma Pailate a le Va’alele o le Virgin Samoa ua fa’amaonia mai nei e le susuga le Sui Komesina o Leoleo, Le’aupepe Fatu Pula, “ua malemo i le sami e latalata ane lava i le Malaeva’alele, lea e na te fa’atulau’ele’ele ai lava va’alele i taimi uma o lona soifua galue o le Pailate.”

O ia o se tama o lona aiga, ma e na’o le 45 tausaga o lona soifua.

O le itula e 5:00 i le afiafi o le aso Sa i le gataifale o Faleolo, lea sa tafafao ai ma nisi o ana uo. Ina ua fesiligia le vaega o leoleo e tusa ai o le afuaga o lona maliu fa’afuase’i, ae ua fa’ailoa mai, “Ona o tulaga o lo’o fa’aauau pea lava le sailiga a Leoleo i le mafuaga o lona maliu, fa’atasi ai ma le fa’ailoa atu i le itu o aiga o lo’o taliga fo’i ni tala e tusa o lona to’esea fa’afuase’ia, e ala ai ona taofiofia e leoleo mafuaga o lona maliu.”

O le ali’i lenei, o se tasi ua leva tausaga o lo’o faigaluega o se pailate i lea Kamupani Va’alele, ma ua fa’amautu fo’i o ia ma le aiga i Aukilani i Niu Sila. E tusa ai ma le tala ua fa’asalalauina mai e le Samoa Observer, sa alaala o ia ma ana uo i le faletalimalo o Aggies i Faleolo, e tulata fo’i i le malaeva’alele, aua e toe fa’afoea e ia le va’alele mo le malaga i Sini Ausetalia, peita’i, na tolopoina lea faigamalaga ona ua maliu le ali’i pailate sinia.

“O se maliu fa’afuase’i, ma e le o tulaga faigofie fo’i i le pa’ia o aiga le fa’ao’o atu i tala fa’alogo ai i leitio ma nusipepa se ulua’i fa’asalalauga o lea fa’alavelave. Peita’i, ua taumafai muamua lava e leoleo ona fa’ao’o e i latou le tala fa’avauvau i lona aiga tulata ia te ia i Aukilani, ona fa’ato’a fa’alauiloa ai lea i tusitusiga i nusipepa nei mea uma!”

O se ma mautinoa lava, o le latou fa’ase’ega i le sami, e fa’aaoga ai “jet ski” po’o laupapa fa’ase’e e tosoina e va’a. O le tala mai na pa’u ese mai ai o ia i lea laupapa fa’ase’e ma na fa’ato’a maua ane lona tino e tusa ma le tasi le itula talu ona va’aia mulimuli o fa’ase’e. Na fa’avave ane lona tino i le falema’i i Leulumoega, ma toe fa’avave ane ai i le falema’i tele i Moto’otua, ae ua leai lava.

Na maua se taimi e talanoa mai ai le susuga Colin Lippiatt mo sana fa’amatalaga e tusa ai o lea fa’alavelave, ae sa fa’aalia e ia, “E le tatau ona vave faia se tala i lea tulaga, ae pau le mea, ua matua misia e i latou Pito Fa’alogo, ae mafai lava ona maua mai fa’amatalaga auiliili ile taimi tonu e tatau ai mo le silafia e le atunu’u.”

O le tala mai a se tasi o le falema’i sa mua’i o’o ane i ai le tino maliu o Fa’alogo sa ia fa’aalia ai, “O le matua tele lava o le vai ua miti’a e le ali’i kapeteni ma ua iloga ai, ua malemo o ia.” E umi tele le tautua a Fa’alogo i le tatou Kamupani Va’alele - Virgin Samoa, lea e femalaga’i i le va o Samoa ma Niu Sila, ma Samoa ma Ausetalia, Tonga ma Fiti fo’i.

saunia: Leua Aiono Frost