PAGOTA: NA FA’AMALOSI A’U E LE TAMA’ITA’I MA TE MOMOE

O le ali’i pagota e 18 tausaga le matua lea o lo o molia i lona fai’aiga i ni tama’ita’i se to’alua e talavou i lalo o le tulafono, sa ia faailoa i le fa’amasinoga maualuga i le aso ananafi e faapea, o le isi tama’ita’i, o lana uo teina lea sa malie lava la te momoe, ae na faamalosi o ia e le isi tama’ita’i la te momoe.

 

E 8 moliaga mamafa na ulua’i tuuaia ai e le malo le alii o James Fitiao, ona o le faalavelave na ia faia ai uiga mataga i ni tama’ita’i se to’alua e talavou i lalo o le tulafono, i le va o le masina o Fepuari ma Mati 2013, ae i lalo o se maliliega sa latou sainia ma le malo ma ua talia e le fa’amasinoga, ua ia tali ioe ai i isi moliaga e fa ae solofua e le fa’amasinoga isi moliaga e fa.

 

O moliaga e fa ua tali ioe i ai Fitiao e aofia ai moliaga e lua o lona faia o amioga mataga faafeusuaiga, faapea ai ma moliaga e lua o lona tagofia lea o itutinosa o ni tama’ita’i se to’alua e le’i faaipoipo i ai, ma o ia moliaga e mafai ona faa falepuipui ai le ua molia mo le umi e le silia i le 5 tausaga i le moliaga e tasi.

 

Ae o moliaga e fa ua solofua e le faamasinoga e sili atu ona mamafa faasalaga e pei ona faatulaga e le tulafono, e aofia ai moliaga e lua o le faiaiga ma se tama’ita’i e talavou i lalo o le tulafono, faapea ai ma moliaga e lua o le faia o amioga faasotoma, ma o ia moliaga e mafai ona faasala ai le ua molia i le toese mo le umi e le itiiti ifo i le 5 tausaga ae le sili atu fo’i i le 15 tausaga.

 

Na taua e Fitiao i le faamasinoga ina ua fesiligia o ia e faapea, o le isi tama’ita’i na la momoe o lana uo teine lea, ma ua tele masina o le la mafutaga, ma o taimi uma lava e alu atu ai lea tamaita’i i lo latou fale, e fesili ai lava pe aisea ua le alu ai i le aoga, ae tali le tama’ita’i e le o faia ni a latou aoga, ona la o loa lea i totonu o lona potu ma la momoe ai, ma o taimi uma lava la te fai’aiga ai, e malie ai lava o ia.

 

O le tama’ita’i lona lua, o le uo a lana uo teine na la o atu i le isi aso ma latou eva i le latou fale, ae ina ua o o i le afiafi, sa ia fesili i ai pe o le a le taimi e alu ai i lo latou aiga ae na tali le tama’ita’i latou te momoe faatoa alu ai i le aso e soso’o ai.

 

I le po o le aso lea ina ua tuua mai le latou Aoga Tusi Paia sa faia, na faamalosi ai loa o ia e le tama’ita’i lona lua lea i luma o le faleoloa, la te o la te momoe, ma sa ia usita’i i ai, ae na te’i ina ua o o i le aso na soso’o ai ae alu le ula lea ma faila lana tagi i le ofisa o leoleo faasaga ia te ia, ma mafua ai loa ona loka o ia e leoleo.

 

O tama’ita’i e to’alua na aafia i lenei mataupu e pei ona taua i faamaumauga a le faamasinoga, na sosola ese mai o la aiga, ma mafua ai loa ona pisi leoleo e saili i laua.

 

Na taua e le isi tama’ita’i e na o le fa’atasi lava ona la momoe ma le ua molia i le masina o Fepuari 2013, ae o le isi tama’ita’i na ia taua i leoleo e faapea, pe tusa ma le fa’a 15 i le 16 ona la momoe ma le ua molia, amata mai lava i se taimi o le 2012 seia o o mai i le masina o Mati 2013.

 

O lo o taofia pea i le toese le ua molia e faatali ai le aso 13 Setema 2013 lea ua faatulaga e lau ai lona faasalaga.

 

O le afioga i le ali’i faamasino sili lagolago ia Lyle L. Richmond o lo o faatautaia le mataupu a Fitiao, i le lagolagosua afioga i ali’i fa’amasino lagolago ia Mamea Sala Jr ma Muasau Tasina Tofili.

Comment Here