Ads by Google Ads by Google

PAGOTA: E LE TATAU ONA TALIAINA A.S UIGA FA’A SOTOMA

O amioga faa Sotoma e aofia ai mafutaga i le va o se tamaitai ma le isi tamaitai, poo le alii foi i le isi alii, o ituaiga amioga nei e le tatau ona faia i Amerika Samoa, e pei ona finauina e le alii lea ua faafalepuipui mo le 7 tausaga i lona taumafai e ave faamalosi lona toalua faaipoipo i totonu o se taavale, ina ia mafai ai ona la o i lo la aiga e talanoa ai e faatatau i le la mafutaga ua amata ona faaletonu.

E le o mafai e le Samoa News ona faalauiloa le suafa o lenei tama e 45 tausaga le matua, ona o puipuiga lava a le tulafono i le ono mafai lea ona iloa atu ai ma lona toalua sa aafia i lenei mataupu.

O le vaiaso nei na lau ai le faasalaga a lenei alii i luma o le alii faamasino sili lagolago ia Lyle L. Richmond, ma ua faafalepuipuiina ai o ia mo le umi e 7 tausaga, ina ua ta’usala o ia e se vaega iloilo iuga i moliaga e lua, o le taumafai e ave faamalosi lona toalua, atoa ai ma lona taofia faapagota o lona toalua, ae solofua isi moliaga e lua o le faiaiga faamalosi atoa ai ma le faia o uiga mataga faafeusuaiga.

OTOOTOGA O LE MEA SA TUPU

E tusa ai o faamaumauga a le faamasinoga o lo o taua ai e faapea, o le mataupu lenei na afua mai i le masina o Fepuari 2012 ina ua masalomia e le ua molia o lo o fai se faanunumi a lona toalua ma se isi tamaloa, ma alu ai loa i le fale faigaluega a le fafine e tulimata’i pe moni ona masalosaloga.

O le aso 10 Fepuari 2012 na taunuu ai le ua molia i le fale faigaluega a lona toalua, ma fai i le fafine la te o i le fale la te talanoa ai, peitai na musu le fafine ma i’u ai loa i le tamo’e o le fafine i leoleopo a le kamupani mo se fesoasoani ma faafesootai ai loa leoleo.

Na ave e le malo le fafine ma faanofo i le shelter mo ni nai aso sei tau faatoa filemu le la mataupu ma le ua molia, ma auina atu ai loa o ia ma faanofo i le fale o lona aunty i Fagatogo, lea foi na alu i ai le ua molia ina ua ia maua tala o lona toalua lea ua nofo i lona aunty i Fagatogo.

Na taunuu le ua molia ma lafi i totonu o le fale, ma faateia ai lona toalua ina ua fai atu le ua molia ia te ia la te o i totonu o le potu la te talanoa ai, ma o iina lea sa tuuaia ai loa e le malo le ua molia na ia faamalosia ai lona toalua la te faiaiga, e ui sa musu le fafine.

Ina ua maea, na fai loa le ua molia i lona toalua la te o i le latou fale la te talanoa ai e faatatau i le la mafutaga, ina ua la oo atu i luma o le faletupe o le ANZ Bank i Fagatogo, na taumafai ai le ua molia e ave lona toalua i totonu o se taavale a se tasi o ana uo, peitai sa ee le fafine ma iloa atu e leoleo, ma taufetuli atu loa leoleo ma taumafai e faatoatoa le mataupu, ma i’u ai loa i le taofia o le ua molia i le falepuipui ae faagasolo lana mataupu.

I le taimi o le faamasinoga autu a le ua molia, e lei i ai sana loia ae sa tu ai lava o ia mo ia lava ma ia finauina lona le nofosala i lalo o le tulafono, peitai i le faaiuga o lana faamasinoga autu, sa tausala ai o ia i moliaga e pei ona faasala ai e le faamasinoga, ae o isi moliaga mamafa e lua sa solofua.

FAASALAGA

A’o lei tuuina atu le faasalaga a le faamasinoga i le alii lea, sa maua lona avanoa e faatoese ai i lona aiga ma le faamasinoga e tusa ai o le solitulafono sa ia faia.

I lana faamatalaga tuusa’o i lona to’alua sa ia faapea atu ai, “ua ou faamagalo atu ia te oe e tusa ai o le mea ua faia ia te a’u ma la’u fanau,” ae mo le itu a le malo na taua ai e le ua molia e faapea, “o amioga i le va o le fafine i le isi fafine ma le tama i le isi tama, lea o lo o taua o uiga faa Sotoma, o mea ia e le tatau ona faatinoina i Amerika Samoa.”

Sa ia fautuaina foi le itu a le malo ina ia vaavaai muamua ma le faaeteete, ae latou te le’i faia se faaiuga.

Na finau le loia a le malo o Camille Philippe i le faamasinoga ina ia faasala le ua molia i le faasalaga pito maualuga o lo o faatulaga mai e le tulafono.

Fai mai Philippe, ua tele faafetai ma faatoesega ua faia e le ua molia, ae lei faatasi lava ona ia faatoese i lona toalua e tusa ai o le mea sa ia faia. Fai mai le malo, o lo o tumau pea le tete’e o lenei alii o le gaioiga sa ia faia ua ia soli ai le tulafono, aemaise ai, e foliga mai e le o malamalama o ia e sese le mea sa ia faia i lona toalua.

Na finau foi le loia a le malo i le faamasinoga, ina ia tuu atu sana poloaiga e faasa ai le ua molia ona toe taumafai e faafesootai lona toalua.

O le moliaga o le taumafai e ave faamalosi se tagata, o se solitulafono mamafa e mafai ona faasala ai se tasi i le toese mo le 7 tausaga, pe faasala i le salatupe e le silia ma le $5,000, ae o le moliaga o le taofia faapagota o se tagata i se auala sese, e mafai ona faasala ai se tasi i le toese mo le tasi le tausaga, pe faasala i le salatupe e le silia ma le $1,000.

I le faaiuga a le faamasinoga maualuga, ua faasala ai lenei alii mo le 7 tausaga.

Ua maea ona faila e le ua molia sana talosaga i le faamasinoga tauala atu i le alii loia sa tofia e fesoasoani ia te ia, mo se avanoa e toe faia ai se isi ona faamasinoga autu.