O le fa'aauau pea o le tulaga pagatia o lo o fetaia'i ma tagatanuu o Manu'a ona o le fa'aletonu o femalagaaiga i le ea, o se tasi lea o itu na fa'ailoa e le alii kovana i le Peresetene o le Manu'a Airlines e le o nofo lelei i lona finagalo i le taimi nei.

Na taua e Lolo Matalasi Moliga i sana tusi ia Barney Sene i le aso 7 Oketopa 2014  e fa'apea, e tusa ai o ripoti ua tu'uina atu ia te ia, o le aso 15 Tesema 2014 lea ua toe sui i ai le aso e tatala aloaia ai le tautua a le Manu'a Airlines mo Manu'a, aua le tautuaina o tagata o le itumalo o Manu'a.

E ui o se tulaga lelei lea mo Manu'a e pei ona taua e Lolo, peita'i o le itu e le o nofo lelei i lona finagalo, o le una'i malosi mai pea lea o tagata Manu'a ma latou fesiligia le tulaga ua fai i ai le maliliega (MOU) sa sainia ma le kamupani va'alele i le masina o Iulai 2013, ina ia vave lele le va'alele i totonu o le isi tausaga.

"O le maliliega sa tatou sainia ma oe ma le talitonuga e lisi atu le va'alele a le malo i lau kamupani, ma le talitonuga sa e tu'uina mai, o le a mafai ona tino lea auaunaga i totonu o le tausaga e tasi, ae o le toe tu'uina mai o le taimi fou e pei ona fa'ailoa mai ia te a'u, ua tula'i mai ai loa le o o atu i le 16 masina talu ona mae'a le sainiga o lea maliliega, e aunoa lava ma se tulaga ua tau vavala mai mo le amataina o le tautua a le Manu'a Airlines mo Manu'ua", o se vaega lea o le tusi a  Lolo ia Sene.

Saunoa Lolo e fa'apea, e ui i tulaga fa'aletonu o lo o i ai le tamaoaiga o le malo i le taimi nei, e tumau pea le talitonuga o le tu'u atu pea le galuega e te fa'atino e le kamupani a Sene, ae o le tula'i mai o le fa'aletonu e pei ona mana'omia ai se fesoasoani mo le itumalo, ua mana'omia ai se gaioiga vave ina ia foia ai lenei fa'afitauli.

I le aotelega o lenei mataupu e pei ona saunoa Lolo ia Sene, na te le taliaina le fa'aauau pea o le nonofo pagatia o tagata Manu'a, e ui o lo o ia lagolagoina pea le tatau lea ona lava se taimi e fa'aleleia ai lea auaunaga ina ia taunu'u loa lenei fa'amoemoe.

E ui i le manaoga faananati o lo o tula'i mai i Manu'a, na fa'amautinoa e Lolo ia Sene le leai o se manatu o ia te ia, e tu'u ina atu se taimi fa'atapulaga e 30 aso e tatau ai ona fa'agaioi loa le tatalaina o le auaunaga mo Manu'ua.

I lona talitonuga, o le taumafai e fa'aleleia le tamaoaiga ma le atina'e mo Manu'a, o lo o fa'alagolago malosi lea i le lelei o femalagaaiga i le ea mo Manu'a.

Na taua fo'i e le alii kovana le galulue malosi pea o le faigamalo i le sailia o ni isi auala e fa'aleleia ai femalagaaiga mo Manu'a, e pei o le taumafaiga e fa'aleleia femalagaaiga i le sami mo Manu'a, e aofia ai le taumafai e toe fa'atau se isi va'a fou mo Manu'a ina ia mafai ai pea ona fa'aleleia tulaga o femalagaaiga mo le itumalo.

Na taua e Aleki Sene Jr i luma o le maota o sui i ni nai masina e le i mamao atu ina ua fesiligia le mataupu lenei e fa'atatau i le va'alele o le Segaula lea sa fa'amoemoe e lele mo Manu'a, o lo o taumafai malosi pea le ali'i peresetene o le Kamupani Va'alele ia Barney i se auala e maua ai se afi fou mo le va'alele a le Inter Island lea o lo o fa'aletonu, atoa ai ma le toe fa'aipipiiina o ni isi o totoga fou mo le Segaula, ona mautinoa ai loa lea ua mafai ona fa'aleleia femalagaaiga mo le ea i Manu'a.