Paepaeulupoo lI le siamupini o fautasi i le lumana’i

Ua faalauiloa e le alo o Samoa ua lauiloa i le fauina o fautasi, le tofa Leoititi Maselino Ioane, o le va’a o le Paepaeulupo’o II lea o le a ia fausia, e le toe i ai lava se isi fautasi i totonu o Amerika Samoa na te maua, o le a avea fo’i ma siamupini o soo se tuuga fautasi i le lumana’i.

 

“O le va’a lea o le a ou fausiaina, o le a ou fausiaina i le ituaiga fausaga e le toe muli ai i se isi lava va’a, e o o lava fo’i i le va’a o Vatia na ou faia, e muli fo’i i le va’a lea,” o folafolaga ia a Leoititi na tuuina atu i Ali’i o le Faleono faapea le tofa a Paopaoailua Joe Fiaui, i le taimi o le sauniga e faapaia ai le galuega, lea na auai uma ai Feagaiga o le afioaga i le taeao o le aso Gafua na te’a nei.

 

Na taua e Leoitiiti i luma o le afioaga o Aua, o le va’a o le Paepaeulupoo II lea ua amata ona fausia, e atoa i ai le 12 o fautasi ua ia fausia i totonu o Amerika Samoa ma Samoa.

 

Ma soo se taimi e amata ai ana galuega faapenei, na te talosagaina ai afioga e ana va’a ina ia tatala le galuega i se sauniga lotu e faapaia ai le tufuga ma le amataina o le galuega, ina i’u manuia le galuega ma maua se tulaga lelei o le va’a.

 

Na taua e le tufuga e faapea, e lua isi ana fautasi sa fausia i totonu o le teritori nei e le i maea, e mafua mai e le i faia se faigalotu e faapaia ai le amataina o ia galuega.

 

O le fausaga o le Paepaeulupoo II lea ua fausia nei e Leoitiiti, e tutusa lelei lava ma le fausaga o le Sa a le afioaga o Vatia, lea ua faalua ona mua i tuuga fautasi i totonu o le teritori talu ona maea lona fausiaina.

 

I le faamausaliina e Leoititi o lana tautinoga i Alii o le Faleono atoa ai ma le afioga o Aua, o le va’a lea o le a ia fausia e le muli i se va’a, sa ia toe faatepa ai lona afioaga i ni isi o vaa sa ia fausia na avea ma siamupini i tuuga ua mavae, e pei o le vaa o le Little Rina mai Apia lea na ia fausia i le 2002, ma malaga mai ai ma mua i le tuuga o le fu’a i Amerika Samoa nei, e faapena fo’i i le Segavao na alo e tama aoga a Don Bosco, lea fo’i na sau iinei i le 2006 ma mua ai.

 

E faapena fo’i le vaa a tama aoga a Samoana ma le Sa fou a le afioaga o Vatia lea faatoa maea atu ona fau, o lo o tulaga lelei uma lava i le taimi nei.

 

“Tusa lava pe i ai fausaga ‘high tech’ lea ua vaaia i ona po nei, ou te tautino atu, e le muli lava le va’a lenei i se isi lava va’a,” o folafolaga ia a Leoititi i luma o lona nuu.

 

O le maea ai o le faapaiaina o le galuega i le vaiaso nei, na amata ai loa ona fausia le va’a fou o Aua ma le faamoemoe, e tatau ona tausinio i tuuga fautasi o le fu’a o lenei tausaga.

Comment Here