E tusa ai ma le molimau mai sui o le Komiti Faapitoa lea na tofia e le Kovana la te suesueina tulaga tau tupe a le falemai o le LBJ, na o la taua ai i luma o le Komiti o le Falema’i/LBJ a le Senate le i ai lea o se manaoga tau tupe i le falemai, atoa ai ma le latou aitalafu i pili e lei totogiina atu e silia ma le $16 miliona.

Ae ina ua molimau le pulega a le LBJ i luma o le komiti na taua ai e le CEO ia Michael Gerstenberger e faapea, e le o le aofaiga sa’o lea o le aitalafu a tagata o loo i ai i pili a le falema’i, ae a maualuga lava e oo atu i le $4 miliona.

O sui o le komiti faapitoa na tofia e le kovana e aofia ai Uelitone Tonumaipe’a ma Gaea Perefoti Failautusi.

Na taua e Tonumaipe’a e faapea, ina ua la suesueina teugatupe a le falemai, na o la mauaina ai ma faamaonia le manaoga  tau tupe o loo feagai ma i latou, ma e i ai le talitonuga o le tupe e silia ma le $1miliona sa i totonu o teugatupe a le falemai talu mai le masina o Fepuari, e maea e lei uma le masina o Mati.

Na mafua ona valaaulia e le komiti a le Senate sui o le komiti faapitoa lea a le kovana, ina ia la faamanino i le komiti tulaga ma aiaiga o le  feagaiga lea ua saini e le malo ma le falemai e uiga i le $3 miliona na pasia atu e le fono, atoa ai ma le tulaga o loo i ai tupe a le falemai.

Saunoa Tonumaipe’a, e ese mai i manaoga tau tupe o loo feagai ma le falemai, o se tasi o mataupu na faateia ai i laua ma Gaea o le aitalafu lea e $16 miliona mai pili a tagata sa togafiti i le falema’i e lei totogiina.

Fai mai le tofa Gaea, o pili nei na amata mai lava i le tausaga e 1968 seia oo mai i le taimi nei, ma o nisi o i latou o loo i ai a latou pili i le falemai e lei totogiina ua maliliu, o nisi ua malaga ese atu ma le atunuu, ae o nisi foi ua mafua ona le totogiina pili ona ua le gafatia le taugata.

E ese mai i le aitalafu mo pili e lei totogiina atu e le atunuu i le falemai, o loo i ai foi aitalafu a le falemai i kamupani tua ma falemai i fafo sa togafiti ai nisi o le mamalu o le atunuu, e manaomia le toe totogiina atu, e pei ona faamaonia e Tonumaipe’a ma Gaea i le la molimau.

Ae ina ua fesiligia e le taitaifono o le komiti a le Senate ia Galea’i Tuufuli ia le CEO ia Gerstenberger ma le taitaifono o le Komiti Faafoe ia Moananu Va i ni auala ua faia e le falemai e ao ai aitalafu e pei ona taua, na taua ai e i laua le manuia o gaioiga lea ua faaaoga e le falemai e toe ao ai se vaega o lenei tupe.

Na faamanino e Moananu le 10% o le aitalafu tuai e lei totogiina e le tagata i le falemai, lea e tatau ona totogi muamua ona faatulaga ai loa lea o se feagaiga ma le falemai i auala e togitogi atu ai le tupe atoa o loo totoe.

O le toatele o i latou o loo nonofo aitalafu i le falemai e pei ona molimau le pulega a le LBJ, o tagata mai fafo, ma o nisi o i latou ua toe foi atu i o latou atunuu, o nisi foi ua maliliu ma ua le toe mafai ai ona ao aitalafu o loo i ai.

O le fautuaga a le komiti na tuu atu i le pulega a le falemai, ia amata ao le tupe lea aua o le isi lea auala e mafai ai ona fesoasoani malosi i gaioiga ma manaoga o loo  tulai mai i le falemai.