Ads by Google Ads by Google

Ova 1,000 mataupu tau solitulafono taulima Ofisa Loia Sili Kuata Lua 2013

O faamaumauga mai le Ofisa o le Loia Sili o lo o i totonu o le Ripoti mo le Kuata Lua o le Tausaga Tupe 2013 a le malo mo le masina o Ianuari - Mati 2013, o lo o taua ai le silia i le 1,000 mataupu tau solitulafono na mafai ona taulimaina e le Ofisa.

 

Mai lea aofaiga e 203 mataupu tau i solitulafono mamafa; 268 mataupu tau i solitulafono mama ma sala i luga o le alatele; 700 mataupu mai le EPA ma le Soifua Maloloina, ma mataupu e 16 o le ave taavale ‘ona.

 

O lo o taua ai foi i lea ripoti mataupu tau solitulafono e 67 e le’i failaina i luma o le faamasinoga. (E talitonu le Samoa News o ni isi o mataupu nei ua maea ona faila i le masina na te’a nei seia oo mai i le masina lenei)

 

Mai le 203 o mataupu tau i solitulafono mamafa na faia e le Ofisa o le Loia Sili i luma o le faamasinoga, o le 71 o ia mataupu ua maea ona lau a latou faasalaga, ae 132 mataupu o lo o faagasolo pea i le taimi nei a latou iloiloga e le’i mae’a.

 

Mo mataupu tau solitulafono mama ma sala i luga o le alatele ua maea ona faila i luma o le faamasinoga, e 96 mataupu ua maea ona faia i ai faaiuga a le faamasinoga ma le 172 o lo o faaauau pea i le taimi nei, ae mo mataupu e aofia ai le ave taavale ‘ona, e 11 ua maea ona lau faasalaga ae 5 mataupu o lo o faaauau pea iloiloga i le taimi nei.

 

I mataupu mo pepa nofomau ma fono a tagata mai fafo o lo o faaulu i le Ofisa o Femalagaaiga, e silia i le 300 mataupu na mafai ona iloiloina e le Ofisa i le ulua’i masina e tolu o le tausaga nei.

 

O ia mataupu e aofia ai mataupu talosaga e 117 mo le toe faafo’iina atu o tupe sa totogi mo pone (bond refund), 173 talosaga fou ma talosaga e toe sui ai tulaga o le nofomau i le atunuu, ma talosaga e 47 mo le nofomau i Amerika Samoa.

 

E pei ona silafia, e lua isi Ofisa o lo o i lalo o le faamalumaluga a le Ofisa o le Loia Sili, o le Ofisa o Femalagaaiga atoa ai ma le Ofisa o le Lesitala a le malo.

 

OFISA FEMALAGAAIGA

 

Na taua e le afioga i le Loia Sili ia Afoa L. Su’esu’e Lutu i lana ripoti e faapea, o galuega faatino a le Ofisa o Femalagaaiga mo le kuata lona lua ua mavae atu, sa taula’i lea i le faamalosia o ona tiute tauave e pei ona faatulaga mai e le tulafono, i le mataituina lea o tagata e ulufale mai ma toe ulufafo atu i fafo o le teritori o Amerika Samoa.

 

I galuega sa gafa ma le Ofisa o Femalagaaiga i le kuata lona lua e pei ona taua i le ripoti, sa latou iloiloina ai pemita ulufale e 1,761; 3 pemita poloka (block permits) poo pemita mo aumalaga toatele e faatapula’a ai le umi e nonofo ai iinei; 197 pemita sa toe faaopoopo aso; 463 pemita 14 aso, ae tasi le pemita e taua o le (multiple-entry permit) sa mafai ona tuuina atu i se tagata mai fafo

 

I tulaga o ID sa toe faafou, e silia i le 2,000 ID mo tagata mai fafo e ta’itasi tausaga ma toe faafou na mafai ona faafou, ae lata i le 400 ID e ta’itolu tausaga ma faafou na galulue ia i le Ofisa i le kuata lua.

 

OFISA LESITALA

 

O le tautua a le Ofisa o le Lesitala e faapitoa lava lea i le taulimaina lea o mataupu e faatatau i fanua ma suafa matai i le atunuu.

 

I ulua’i masina e tolu o le tausaga nei, e 7 mataupu tau i suafa matai na taulimaina e le Ofisa o Lesitala, ma e oo mai i le taimi nei, toe 2 mataupu e le’i maea ona faia i ai se faaiuga, ae o isi mataupu e 5 ua maea ona faia i ai faaiuga a le ofisa.

 

E tasi le mataupu na tuuina atu e le Ofisa i luma o le Faamasinoga Maualuga, ma mataupu e fa na tuuina atu i le Ofisa o Mataupu Tau Samoa mo sa latou iloiloga.

 

I mataupu tau fanua, mai mataupu e 6 na taulimaina e le Ofisa i le kuata lona lua ua mavae atu, e na o le tasi le mataupu ua maea ona faia i ai le faaiuga, ae 5 mataupu o lo o faaauau pea i ai galuega a le ofisa.

 

I tulaga o lisi mo fanua a le malo, e 3 mataupu sa iloiloina e le ofisa ma ua maea foi ona faia i ai lana faaiuga i mataupu uma ia e 3.