Ads by Google Ads by Google

Fa’afotuova’aulu i le Saufaiga tofa Lauti Fa’afetai Lauti

O se va’aiga i le mae’a ai o le sauniga na fa’apa’ia ai le nofo a le tofa Lauti Fa’afetai ma le Tausi o Lolita Puletasi Lauti i le EFKAS i Vatia. L-R: Lolita Lauti, Faipule i le Konekeresi Aumua Amata, le tofa Lauti Fa’afetai, ma le fa’afeagaiga EFKAS i Vatia Afalupetoa Uta’i. [ata: foa’i]

O le faaiuga o le masina o Fepuari sa fa’apa’iaina ai le nofo a le Saufaiga le tofa Lauti Fa’afetai Lauti ma le tausi Lolita Puletasi Lauti i le laoa i Avalua i le malae i Laloulu, Vatia.

O le susuga le Faife’au EFKAS Rev. Afalupetoa Utai sa ta’ita’ia le sauniga ia Fepuari 25 i le EFKAS-Vatia e fa’apa’iaina ai le nofo a se tasi o ana Ti’akono tautua.

I le aso Faraile 26 Fepuari, na alausu aiga i le ta’alolo matagofie na tapena i ai le pa’ia o aiga o le Paolo, i ona itu tetele ma ona itu taulagi. Le masi’i mai o le pa’ia o le aiga Sa Puletasi mai Olosega, i le Manu’atele ma le pa’ia maualuga fo’i o le afioga le Aloali’i Afoa Leulumoega Lutu, o le afioga lava lea le Senatoa o le Ma’oputasi i le Maota Maualuga o le Fono Faitulafono.

O le tofa i le Saufaiga Lauti Fa’afetai o se alo e fa’asino ia Lauti Uelese Fita mai Vatia lava, ma le tausi o Fa’alele Puleia Leao Lauti o Masina i Fagaloa ma Apolima, o pa’ia lava ia o le “Va’a o Fonoti” ma le “Aiga i le Tai” o Samoa.

O se fetalaiga a le nofo sa ia fa’apea ai, “Ou te fa’afetai i le pa’ia o aiga ona o le fa’aea ua fa’ae’e mai, ae le faigofie, e tatau ona seu le manu ae taga’i i le galu i taimi uma. E sili ona ou fa’afetai, ona o lo ua fa’aea aiga ia te’i matua ma le tina o le aiga, ae o lo’o soifua pea si o’u Matua, Fa’alele Leao Lauti, se’i ona molimauina se taumafaiga a si ana tama.”

TAUTUA I LE EKALESIA

O Lauti Fa’afetai ma le tausi o Lolita ma le fanau ua loa fo’i tautua i le Ekalesia Fa’apotopotoga Kerisiano i Amerika Samoa i Vatia lava.

I le tausaga e 2000, sa fa’ae’e ai ia i la’ua le tofiga “Tiakono” ma o i la’ua lava e pito i laiti ai i lea tofiga i le Matagaluega i Sasa’e ma le Pulega a le Vaifanua i le EFKAS. O le la’ua tofi na fa’ae’e i le 31 tausaga o le soifua o le tofa le Saufaiga.

TAUTUA I LE MALO AS & MALO TELE

Ina ua mae’a lana a’oga maualuga i Samoana sa amatalia loa lana galuega o le avea ma Master Control Room Operator Technician i le KVZK-TV ia Setema 1987. I le fitu o tausaga o lana tautua lea, na si’itia o ia e avea ma tagata fa’asalalau.

Na ulufale i le US Army Reserve ia Setema 12, 1995. Peita’i na faia lana filifiliga ina ia fa’amavae mai lana galuega i le faletelevise ia Novema 2007, ae tautua i le Army Reserve e avea ma Unit Administrator mo le 411th Forward Support Company.

I le tausaga e 2000-2001 e lua ana malaga e tautua ai i Camp Humphrey, South Korea ma le isi ana malaga e tautua i le tafa o taua ia Oketopa 2004 se’ia o’o ia Tesema 2005 i Iraq. O lo’o fa’aauau pea lana tautua i le Army Reserve i Tafuna.

TAUTUA AFIO’AGA MA LE ITUMALO

Na avea o ia ma sui totino o le aumaga a lona afio’aga a’o talavou e le’i mae’a lana a’oga maualuga i Samoana. Peita’i, na fa’ae’e ia te ia e lona aiga le suafa “Falesau” i le 1999. Sa fa’ae’e foi ia te ia le suafa “Osovaleimisaese” o le igoaipu a le afioga le Aloali’i ia Afoa i le tausaga e 2006. Ma o lea ua fa’aea o ia e le pa’ia o aiga i le fa’ae’e ia te ia o papa o le suafa “Lauti”.

AOAOGA

Na amata ana a’oa’oga i le a’oga tulaga muamua Marist Brothers i Atu’u ma siitia i le Samoana High School ma fa’au’u mai i le 1987. I le taimi nei ua fa’aauau fo’i ana a’oa’oga mo fa’ailoga maualuluga i le Iunivesite o Asford University i laina o feso’ota’iga fa’a-Initeneti ma o se fa’aaogaina fo’i o alamanuia mai le tautua i le militeri e pei ona i ai.

I le la’ua aso fa’amoemoeina, sa fa’atautaia i le Laoa i Avalua i le malae i Laloulu ia Fepuari 26. O i’ina lava fo’i sa tapa ipu ai le tofa Lauti Fa’afetai i lona afio’aga ma le itumalo ma toto’o ai a’ao o fa’asuaga e fa’apa’ia lona fa’afotuova’aulu.

O le tofa Sunu’itao Upuese Fa’aatuatu o se tasi o matai o le malosi o le nu’u sa toto’o i le ‘ava o le usualele sa vagaia fo’i e le pa’ia o le aumaga a le afio’aga o Vatia.

O le tausi Lolita, o lo’o tautua fo’i o ia e fa’aauau lana auaunaga i le malo e ala i le tofi faufautua mo faia’oga ma fanau a’oga i le Coleman Elementary School i Pago Pago. O ia o se alo e fa’asino ia Manusinalesoa Sam Puetasi ma Maaliali Ili Puletasi o Faga’alu, Olosega ma Vaitogi.