Ads by Google Ads by Google

OTI INA UA MAEA ONA TAUTU TAUMAFATAGA A OBAMA

I ripoti mai Amerika ua taua ai le maliu o se tina e 70 ona tausaga sa faafoeina se faleaiga i Ohio, ina ua maea ona ia tautuina le taumafataga a le alii peresetene o Amerika ia Barrack Obama. Na taua i ripoti le naunau o le tina o Josephine Harris na te tapenaina le laulau e talisua ai le alii peresetene.

Ina ua mae’a ona ia faia lea tautua matagofie mo Obama, i ni nai itula mulimuli ane, na maliu filemu ai o ia, fai mai ripoti, na faapea le tala a Josephine, “ua lelava ma ua ma’iniini mai ona alofivae!”Na faanatinati atu o ia i le falemai ma iloa ai ua i ai se aafiaga i lona fatu, mulimuli ane fai mai le ripoti, ua maliu o ia.

Na to’ai taunu’u Obama i le fale’aiga o lea tina i le itula e 8:30 i le taeao, ma sa ia fa’atonuina sana oka o fuamoa e lua over easy le fa’avelaina, bacon ma le falaoa enaena ua fa’apa’u. O le tina lava lenei sa ia fiafia e faia lea oka ma fa’atali le mae’a saunia, ona ia molita’i loa lea i luma o le Peresetene o lana oka.

O se ulua’i taimi fo’i lenei ua o’o ane ai se peresetene i le fale’aiga o lenei tina, talu mai ona ia tutula’i ma tautua le mamalu eseese o le atunu’u. Mai le Ofisa o le falema’i ua fa’ailoa mai e foma’i, o Josephine ua maliu filemu e leai fo’i se suesuega e toe faia ia te ia, ua alu malie lava o ia mai lenei soifuaga.

Na fa’ailoa mai e le Maota Pa’epa’e, na vala’au fa’apitoa mai le Peresetene i le Fale o lenei tina ma talanoa i le alo tama’ita’i o Josephine e fa’ailoa mai i ai,” lona fa’anoanoa fa’atasi ma ia i le tu’ua lemu e lona tina o le la’ua mafutaga, ma ia fa’amaise le Atua i le aiga fa’avauvau.” O lea telefoni sa vala’au mai i luga o le va’alele a le Air Force One, lea e femalaga’i ai le ali’i peresetene o le malo o Amerika.

“O se fa’amanuiaga ia te a’u lo’u fetaui i lenei tina, a’o ia tautuaina tagata e to’atele i lona soifua auauna faipisinisi, o lo’o ua ou tatalo mo le aiga loto fa’avauvau ia fa’amafanafanaina e le Atua, ma ua malolo lea tina ma le malie i lana auaunaga, sa ia faia ai le mea silisili mo tagata uma, lea ua fa’asino fo’i a’u ou te afea lana pisinisi i lenei aso ua tu’ua ai e ia lenei olaga!”

Na fa’ailoa mai e le Arkon Beacon Journal i Ohio, “Na fusi e le olomatua o Josephine Harris Obama i le taimi na alu ane e fai lana oka i lona fale’aiga, ma ua foliga mai, o se taimi sili lea ona fiafia ai o ia i lona soifua tautua!”

“Na musumusu fo’i o ia i le ali’i peresetene, “ou te alofa ia te oe!”

saunia: Leua Aiono Frost