Ads by Google Ads by Google

Osofa’ia e se tamaitiiti 14 tausaga se tina i se naifi

O lo o taofia pea i le potu tigaina o le falema’i i Fagaalu se tina e 36 tausaga mai Tula, ona o ni manu’a tuga ina ua osofaia o ia e se tamaititi e 14 tausaga ma se tama’i naifi (tulou) i le taeao o le Aso To’ona’i na te’a nei.

 

O le a le mafai ona faailoa le igoa o le ua molia, ona o puipuiga i lalo o le tulafono i fanau laiti e tuuaia i solitulafono.

 

E tusa ai ma faamaumauga a le faamasinoga o lo o taua ai e faapea, e tusa ma le 19 manu’a sa maua i le tino o le tina.

 

Na taua e le toalua o le tina i le Samoa News i le aso ananafi e faapea o ananafi na vaaia ai suiga manuia i le tina, e le gata ua mafai ona talanoa ae ua sagisagi fiafia mai fo’i ona foliga.

 

O le taeao ananafi na tulai ai i luma o le Faamasinoga Faaitumalo lenei tamaititi, ma ua tuuaia o ia i moliaga mamafa e lua o le faaoolima i le tulaga muamua ma le osofale i le tulaga lua, ae na taua e le loia a le malo o lo o taulimaina mataupu a fanau laiti ia Terri Bullinger e faapea, o lo o soalaupule e le faamasinoga i le taimi nei, pe ono molia lenei alii talavou o se tagata matua, faavae lea i le matuia o le gaioiga o lo o tuuaia ai o ia.

 

I le maea ai o le ulua’i iloiloga o lenei mataupu i luma o le alii faamasino ia John L. Ward II i le taeao ananafi, na faia ai loa le poloaiga a le alii faamasino e taofia le ua molia i le Falepuipui o Tamaiti i Tafuna, e faatalitali ai taualumaga o lona faamasinoga i le lumana’i.

 

I faamaumauga a le faamasinoga o lo o taua ai e faapea, o le te’a laititi o le itula e 9:00 i le taeao o le Aso Toona’i na te’a nei na valaau ai e ni isi le Ofisa o Leoleo ma le EMS mo se fesoasoani, ona o se tina ua manu’a i se faalavelave.

 

Ina ua fesiligia e leoleo le tuaa o le alii ua molia po o fea o i ai lona atalii, na tali le toeaina, e le’i foi atu lava lona atalii sa alu i le faatoaga.  I suesuega a leoleo, na maua ai le tama’i naifi e leai se ‘au, lea o lo o masalomia sa fa’aaoga i le faatinoina o le solitulafono, i luma o le fale o le tina ua a’afia.

 

Ina ua faatalanoaina e leoleo le alii talavou ua molia, na molimauina e leoleo le pisipisia o ona ofu ma ona lima i le toto, sa faapea foi ona auina atu o ia i le falema’i mo togafitiga i manu’a na aafia ai ona lima, lea na toe te’a mai ai i tua i le aso lava lea.

 

Na faamatala e le alii ua molia i leoleo e faapea, o ia na alu i le fale o le fafine na aafia ma faataga fesili i ai, pe i ai sa latou tauaga se’i tatau ai lana niu, ae sa tali mai le fafine e leai se tauaga.  Na toe foi le ua molia i tua o le fale, ona ia tatala lea o ona seevae ma tuu i lalo o le pupu fa’i, ma ia savali atu ai loa i totonu o le fale ma le naifi.

 

Na taua e le ua molia, o le taimi lava na iloa mai ai e le fafine o ia ua savali atu i totonu o le fale ma la naifi, na alu ai i le atoa le fafine i fafo ma le fale, peita’i na see i luma o le fale ma maua ai e le ua molia le avanoa e faatino ai le solitulafono, ae na taofi lana gaioiga ina ua ia vaaia se tagata o le aiga ua savali atu.

 

O le alii ua molia e vasega 9 i le Aoga Maualuga a Fagaitua. I se ripoti mai i le ofisa o le aoga, o lo o taua ai e faapea, o lenei alii talavou e masani ona sola mai i ana vasega, e faalua ona ave i le ofisa i le faamisa ma le faaoolima i tamaiti aoga.

 

Na taua e le toalua o le tina na aafia i le Samoa News e faapea, o ia ma nai ona alo na muamua i le Falesa i le lotu pe tusa o le te’a o le 8:30 i le taeao, ae mulimuli atu si ona faletua, peitai na faateia o ia ma ni isi o le aulotu ina ua latou faalogoina le ‘e’e atu o si ona toalua i luma o le falesa i le fia ola.

 

Na taua e le tama e faapea, e tusa ai ma le faamatalaga a lona to’alua na taua ai e faapea, e taunuu atu le ua molia o lo o faamalu le tina na aafia e sauni i le lotu.

 

Na faateia le tina ina ua ia vaaia le ua molia ua savali atu i totonu o le fale ma se tama’i naifi i lona lima, ma tamo’e ai loa i fafo ma le fale, peita’i na se’e i luma o le fale.

 

O le ta’ifau a le aiga sa i ai i le taimi lea, na oso atu ma u solo vae o le ula lea ma mafai ai loa ona tuu e le alii lea lana gaioiga o lo o fai, ae maua ai le avanoa o le fafine e sola ese ai.

 

O le tina na aafia e to’a 8 nai ona alo.  Na taua e se tamalii o le afioaga o Tula, o ia foi lea o le Taitaifono o le Komiti mo Tagata mai fafo i le nuu e faapea, ua maea ona faia le faaiuga a le nuu ina ia faatula’i ese le aiga o le tamaititi ma totonu o Tula.

 

Na taua e le sui lea o le nuu e faapea, o le tamaititi o lo o aafia i lenei mataupu ma lona aiga, e le o ni tagata moni o Tula, ma ua faatonuina i latou ina ia fo’i i le nuu o le latou sponsor e nonofo ai.