Ads by Google Ads by Google

UPU O LE LOTO UA MALIE

E le tau mate sa tu i Fagalilo le tapa’au o le Alataua pe tua ma ni a le asō, a’o toe sa’afi’afiga o le soifua ma le tautua tuāvae a le afioga i le Faatonu, le fetalaiga iā Taeaoafua Dr. Meki Solomona. Se ua segia le mauli ma tau tuu fesili pe aisea na tutulu ai le lagi mauga, fai mai na faasifo i le vao ma a’e i le tai le agaga o le faatolotologātama. Auā o lea sa lupe le lafoga a Lualemaga ma sema se vailiu o lenei aiga e talafeagai ai so matou laolao e faailo ai le lupe o le fogātia e ala i le agaga faafetai ma le faagaeetia ina ua ta’oto i lagotonu e pei o le ‘upu i le aiga Sa-levaiolo ma ea i ulutau le tiuga nai le faletuamasaga auā le faamoemoe sa lavasi mo le toe aso o le Tamā Peleina.

A lea ua matamata ninii ai le aupeau auā le alofa lē fa’atuāoia o aiga. Ua to i lologamata fo’i peau valevale ma mateia i falega le tupua sa taumate ia outou faaaloaloga. Se! ua moni ai le tagi tu’i a le fafine Salafai, “Ta fia manava e o Mailei’a, ina ia fuli le mauga ma sua le lau’ele’ele”. E le tauilo vai folau e pei o le tala iā Leutele-le-iite poo fea na utuvai iai lenei aiga. Ua Sopolemalama foi le ulufia o aao i le ‘afu ae fai ma lu’uga i lenei aiga ona o lo outou alofa tula’i.  E momoli atu le agaga faafetai ma le faamalo i lau afioga i le Ma’opu Soli’ai ma lo tatou aiga Sa-Soli’aī. O ai ea na manatu o le a outou sii le fale o Asomua i le mea maualuga. Ua malie atoatoa aiga i ona itu tetele ma ona itu taulagi ona o la outou alofa lē mavae ua oia mo le usuia o le fono a le Tofa iā Fofogaoaiga Dr. Meki Solomona. Auā e iloga lava le tautai matapalapala i aso e galuā ai ma sousou o peau o le vasa.  A lea ua malū ai le sami sa sousou ma fetafea’i ina ua to’a lona auau peau.

Ua iloga iā Samoa ma le lalolagi atoa lou afio mai ma le tala mai o aao. Talofa ua e le silasila ona o tulaga o le Malo, galuega aemaise o tatou tofi mai i le Atua, a’o lea lava sa e afio mai lava ma sii mai le fala siisiigatā, ona o lou alofa tula’i auā le vala’au paia a le Atua i le Tofa iā Taeaoafua. Faafetai tele lava i lau afioga i le Sui Ao o le Malo o Samoa, i lau afioga Lemamea, lau fetalaiga Tuiletufuga Ropati. Auā o lele sa fatufatu faagalu fafati le falelegafulu i le tai o tamālii ma ua malie ai le papa ele e pei o le tala e fai i le maa o le fee i le Matāsaua.

E le tunoa faiva o Samea.  E le tau sulā foi fala o ‘Ie’ie, e tau faala’ei ai le maa piitia ma faasega le pa osofia i le agaga faafetai.  O so’u paolo ma so’u alaimalo, so’u faamalumaluga ma se gafa na sausema.  So’u paolo tupu, so’u gafa tamālii, ni mulivai na fetafea’i ma so matou taupega ‘afa matou te malu ai iā Samoa ma le vasaloloa.  Faafetai tele i lau afioga Toluao, a’o se tuu mumusu i le fetalaiga i le Launiusaelua, lau tofa Faasamiasamia, na afua ai ona mapu’e faatiasa lenei faamoemoe. 

Ae le mafai ona galo Taē o i Atuā i le faaeaea o lau afioga i le Kovana Sili o Amerika Samoa i lau Tofa i le Tootoo Lolo Matalasi Moliga, afioga i le Kovana Lutena, Lemanu Peleti Mauga. Sui mamalu o le Kapeneta faapea le Malo i ona tulaga faalupelupeina. Faafetai taupati mai, faamalo fai uso lelei. Lea sa tatanu i Laloifi ma Falesau ae talatala i le Faleomavaega lau utuga osaosa sa e sasaa faaoti ai le utu a le faimea, ae sila saaga aiga na feiloa’i. E manatua pea la outou afu lelea ma le alofa faalia ona o faanoanoaga sa oo iai lenei aiga i le to’esea o lana afioga i le Faatonu iā Taeaoafua.

E le tau tapu’eina la’au ola o le tuāvao poo fea e tua iai aiga i taimi faigata ma pagātia o le olaga. Fai mai e sulufa’i i le fale o le galuega, ae auga i le maota o lona Matai e Faavavau. Ua mafanafana aiga ona o le alofa mama o Keriso sa lalafo iai lau Susuga i le Feagaiga Taulagi ma le Aiga o Siona le Mauga Paia o le ekalesia EFKAS i Leone. Malo fai tatalo, faafetai punoua’i ina ia tafiesea le ao pogisa sa faamalumalu e pei o le taufaanuu, ina ua motusia mafutaga o aiga ona o le sauā o le oti.

Ae tau ia ina o matou faasega le fulu o manuula ma sii i tai lo matou vaa, auā e faigata o matou aiga e pele i loto, pele i ‘upu, pele i agaga. O le ‘upumoni, e a’e fua le fagotaga a Manusina pe ana le finagalo ‘autasi aiga e opogi le aso o lo tatou tamā pele iā Taeaoafua. Faafetai atu i lau afioga Vaatausili Mauava ma lo tatou aiga mai Tafitoala, afioga i le Tama a le Fale Te’o ma lo tatou aiga mai Vaiee,  afioga Tilialo ma lo tatou aiga mai Saleimoa, susuga Toalepai Safuna ma lo tatou aiga mai Satoalepai, afioga i le na Mua i Ao, Galea’i ma lo tatou aiga mai Fitiuta, susuga i le Faife’au Vesi, tofa i le Tootoo Sega. Faafetai fai aiga lelei. E lē pa’ū fua lo outou tautigā, o loo silasila le Atua i la outou foa’i ma le manatu ina ia ulimasao le faamoemoe auā le mafutaga ua motusia ma le afioga i le Foma’i o le tofa manino iā Dr. Meki Solomona.

Ona o’u manatua ai lea o le tala i le fata’oto i Lepela e sefulu sa faamaloloina e Iesu. Fai mai sa na’o le to’atasi na manatu i lona loto fuatiaifo ina ia toe taliu e faafo’i le faafetai i lona matai. A’o le fesili, e faapefea ona filitagaga le vaogaga e talafeagai mo le ituaso nei pa’ō papa se faamatalaga ma e tau fetuuna’i ni lagona ona o le maupu’epu’e ma le maualuga ua e faaeaea ai o matou tagata faatauvaa.  Lau afioga i le Malu o le fale o Fofo ma Alataua, Faiivae Iuli Alex Godinet, lau tofa Taeleifi Amos Galea’i, faapea lo tatou aiga i Tia Pouono. Se ua logo i, loga a taliga o tufuga uli lo outou alofa tula’i. Faafetai, faafetai, faafetai iā te outou uma lava, o aiga, uo ma e masani sa outou laga le mulipola ae fola pae o le fale na lauasi ai le vaa o si o matou tamā peleina, se ua ‘avea ai o se vaa ua goto ma le mama ua lomi lenei aiga, ona o lau faaaloalo ua tōtō tetele.

Ia ututumu e le Atua o le sosia ma le tamaoaiga mea ua to’ese ma faagaogaoina ona o lo outou alolofa moni.  Ia aua nei faatoetoe  muliola faamanuiaga a le lagi i o outou maota ma laoa, a ia taumasuasua ma ‘oloa luuluu ana faamanuiaga iā te outou, ona o lo outou osiosi aiga lelei. 

Soifua

The famiy of Taeaoafua Dr. Meki Solomona