Ads by Google Ads by Google

Op-Ed: O SE TERITORI E LĒMAOPOOPO MA E LĒO FAITAUINA: O FEA O IAI LE FINAGALO O AMERIKA SAMOA?

Ou te fa’afetaia saunoaga talu ai nei a le afioga iā Kovana Togiola Tulafono, ae tainane fo’i se finagalo fa’aali o le afioga i le Palemia o le Malo Tuto’atasi o Samoa iā Tuilaepa Sailele, e uiga i le tūlaga o le faigā mālo o lo’o iai nei Amerika Samoa. O lenei matāupu o se matāupu ma’ale’ale tele, ma ua loa tausaga o ta’oto pea i lona tulaga na sau ai mai le amataga e o’o mai nei lava. 

O le fa’agaoioina o lenei mataupu, e tāua tele le iai o le fa’autaga loloto ma le tōfā mamao, e iloilo mālie ai ma le fa’aeteete se lumana’i mau-mau-tutu o le faiga malo a Tutuila ma Manu’a.  Ua tolu nei Fono Fa’avae, tolu fo’i Komisi mo le Iloiloina o le tulaga tau Faigā Mālo na feagai ma Amerika Samoa. Ae talu ai ona o ni mafuaaga e matuā lē manino lelei, e le’i mau a’a lava i finagalo o le atunu’u le fesili ‘autū, pe o fea o le a fai iai le faigā mālo a Tutuila ma Manu’a. 

E tasi se vaega ‘atoa o la’u tusi o le “Fa’afoeina o le Lumana’i” (Navigating the Future), na au’ili’ili ai le iloiloina o le tatou feso’ota’iga ma le Iunaite Setete.  Ma e pei lava ona ou tā’ua i lea taimi, e tatau lava ona tatou taga’i toto’a, pe o tulaga lelei ma talafeagai pea mo tatou se faigā mālo fa’a-teritori e lē māopoopo ma le lē faitaulia. Ia te a’u a ia, ou te matuā lē lagolagoina lava le tulaga o lo’o iai nei le tatou faigā mālo. O le itu e sili ona ou popole iai, o le a’afia lea o fa’amoemoega o le lumana’i fai mai o le tatou teritori, i malosi’aga ma fete’ena’iga mai fafo e iai vā fa’atagata soifua, faigā upu fai o mālo, fa’apea mana’oga tau tupe ma tamao’aiga, ma o le a lē maua ai e tatou tagata le agaga  moni ma se ‘autu tonu e fa’asino iai le tatou aga’i atu i le lumana’i.

Na iai le fa’aeteetega i le amataga, ae maise ai se suiga e vave fai, ona o le talitonuga fa’a-le- atunu’u: “Aua le gagaua le laau a o mata.”Ae o lenei ua 112 nei tausaga talu ona iai pea Amerika Samoa i le tulaga lenei i le la vā feso’ota’i tau faigā mālo ma le Iunaite Setete, ou te talitonu ua o’o i le taimi ua talafeagai tonu lava ma se suiga o se isi tulaga tau faigā mālo e fa’ama’ite mai e o tatou lava ta’ita’i, ae lagolago ‘atoa e o tatou tagata.  E tāua tele le tatou ‘āmata tapena loa nei suiga, meanū e le’i suia fa’amalosi mai e ni tūleigā mai fafo.

E tusa ai ma tala fa’asolopito, ina ua vaevaeina e mālo tetele e tolu – Peretania, Siāmani ma le Iunaite Setete – le atu Samoa i le māliliega sa faia i Uosigitone i le 1899 – sa lē gata i le fa’atūina o ni faigā mālo fou na vaelua ai le atunu’u, ae na toe vaevae fo’i i ni tuā’oi na tā’ape’ape ai itumalo ma fa’atasiga māsani fa’aatumotu. Na i’u ane ua vaeluaina motu o le atu Samoa i ni vāega tū valavala e lua, e tofu lava le vaega ma lana faigā mālo, e ‘ese mamao a le tasi mai i le isi. Na i’u ina avea Samoa i Sisifo ma teritori tausi a Mālo Aufa’atasi, i lalo o le puipuiga a Niu Sila, ma o le 1962 na avea ai Samoa i Sisifo ma ulua’i atu motu na ‘ausia le tulaga o le tuto’atasi i atu motu uma o le Pasefika.

O lea ua fa’ato’a uma atu nei lava le fa’amanatuina o le 50 tausaga o le tuto’atasi a Samoa, ma ou te toe momoli le fa’amālō ma le fa’amanuia i ta’ita’i ma tagata nu’u o Samoa ona o le aulia mai o lenei pine fa’amau tāua ma le āloa’ia i la’asaga o le latou faigā mālo.

Ae o le feso’ota’iga a Amerika Samoa ma le Iunaite Setete, e fa’avae tasi lava i ni maliliega se lua sa sainia ma mālilie iai ta’ita’i o Tutuila ma Aunu’u i le 1900, ma le Afioga i le Tui Manu’a fa’apea Fa’atui i le 1904. E tāua le manatua pea, fa’ato’ā talia ma āloa’ia e le Konekeresi a le Iunaite Setete nei māliliega e lua i le tausaga e 1929!

Talu ai ona o le tū fa’asasa o Amerika Samoa o ia o le teritori e lē maopoopo ma e lē faitauina, o le fa’afitauli o lo’o feagai nei ma i tatou, o le fa’ata’amilomilo lea o le sa’ilia o ni tali e tau fofō ai fa’afitauli mai le Fa’avae o le Iunaite Setete po’o fa’afitauli mai maliliega nei e lua. O le tele o fa’ai’uga a le Fa’amasinoga Maualuga a le teritori i le fa’asolo mai o tausaga i mataupu e fītoi tonu i āiā tatau a tagata lotoifale ma tagata sitiseni o le Iunaite Setete o lo’o aumau i Amerika Samoa, na fa’alagolago malosi lava i le Fa’avae o le Iunaite Setete ma fa’ai’uga a le Fa’amasinoga Maualuga a le Iunaite Setete, e fofō ai ia fa’afītauli. O lenei la faiga ua tū ai le mataupu tau ‘ele’ele ma fanua i Amerika Samoa fa’apea isi tulaga fa’aleaganu’u, i se tulaga fa’aletonu ma le ma’ale’ale. E iai vaega o le Fa’avae o le Iunaite Setete e pei o Le Auala e Fa’agasolo ai le Faiga o Mea (Due Process) ma le Puipuiga Tutusa (Equal Protection), a fai ae fa’aaoga i Amerika Samoa, o le a ono fete’ena’i ma aga fa’avae o le tatou fa’asamoa. O le fa’aaogaina o nei aiaiga o le fa’avae i Amerika Samoa ou te talitonu o le a fa’asolo ai ina lepetia ma mou atu ai le iloga o i tatou o Samoa, fa’apea le soifuaga masani na tatou ola mai ai.

I le fesili pe avea tagata o Amerika Samoa ma sitiseni o le Iunaite Setete, ou te talitonu o le fesili lea e tatau ona pa’u sa’o lava i le vā o tagata o Amerika Samoa ma le Konekeresi a le Iunaite Setete, e fai e lā’ua le fa’ai’uga, ‘ae lē faia i le fa’aliliuina o le tulafono a le Malo Tele po’o le Fa’avae o le Iunaite Setete. O le māfua’aga tonu lava lea ou te matua’i tete’e ai i le tagi lea ua fa’aulu nei e le vaega a le Constitutional Accountability Center (CAC).  O se fa’ata’ita’iga manino lenei o le ono fa’aofi mai o le fa’ai’uga “fa’a-le-tulafono” a le fa’amasinoga fa’afeterale, ma o le saini o le peni a le fa’amasino e ono avea ai uma Nasionale a  le Iuneite Setete o lo’o papa ‘a’ao ma nonofo i Amerika Samoa ma sitiseni o le Iunaite Setete, e aunoa ma ni tulafono mālilie fa’atasi na pasia e le Konekeresi, e tu’uina atu ai le tūlaga sitiseni a le Iunaite Setete i Nasionale uma o lo’o i Amerika Samoa. E nā o tagata lava o Amerika Samoa i lalo o le pule’aga a le Iunaite Setete o lo’o fa’avasegaina o Nasionale a le Iunaite Setete. Ma, i lalo o le faitauga o tulafono fa’afeterale, o sē ua avea ma Nasionale a le Iunaite Setete, o se tagata lea ua “tumau lona fa’amaoni atoatoa” i le Iunaite Setete, ae lē o ia o se sitiseni o le Iunaite Setete, e lē o ia fo’i o se tagata mai fafo. 

O le itu e fa’anoanoa ai, o le fa’aaoga lea o Amerika Samoa e le CAC i lana tagi ua fa’aulu nei, e fa’amāunu ai se fa’afinauga fa’aletulafono e suia ai le fa’ai’uga ua uma ona fai a le Fa’amasinoga Maualuga a le Iunaite Setete (e pei o le Downes vs Bidwell) i isi atu motu – ae maise ai Puerto Rico.

O le itu e sili ona leaga, e le’i talosagaina lava e o tatou tagata se fesoasoani mai fa’amasinoga fa’afeterale i le mataupu lenei, ae o lenei ua te’i lava ua foa ai fua Foaga e le’i fai misa. Ia ma le isi itu, e lē o logoina le Konekeresi i se alagātatau e pāsia ai se tulafono e fa’atagaina ai le tulaga sitiseni a le Iunaite Setete i tagata o Amerika Samoa, ona o le mafua’aga faigofie lava, e le’i faia se filifiliga a Samoa pe finagalo e fai ma sitiseni i latou pe leai.

E tatau ona tatou toe āsia a tatou feagaiga ma le Iunaite Setete e tusa ma le tatou faigā mālo  E tāua tele lea itu mo le atina’e o le tulaga tau faigā mālo ae maise ai le puipuia o le tatou aganu’u. Ae o le tulaga lea e tatou te iai nei i le tatou faigā mālo, ua pei i tatou o se va’a ua tafea i le au ua leai se foeuli po’o se tapasā, tulou o le ‘upu e tō ia te a’u.

Ou te manatu e tatau ona tatou tulitulia se māliliega feutaga’i ma le Iunaite Setete, ma lalaga ai se feso’ota’iga e manuia uma ai itu e lua. O se māliliega feutaga’i fa’apenei e tatau lava ona sainia e le Peresetene, ona tu’uina lea i le Konekeresi mo le fa’atagana fa’ai’u. E ono tele ni tausaga o le a tapenaina ai lenei fa’amoemoe ma le Iunaite Setete, ae e tāua tele le ‘āmata nei loa. 

Ou te manatu e tatau muamua i ta’ita’i o Tutuila, Aunu’u, Manu’a ma Olohega ona tāloina se “feiloa’iga fa’aleatunu’u” e fa’atalanoa ma filifili ai se ituaiga faigā mālo a Amerika Samoa ma le Iunaite Setete. E foliga mai e iai se ‘ese’esega o le fa’auigaina o upu ma gagana i le taimi na ōsia ai le sainiga ‘a’ao a ta’ita’i o le atunu’u ma sui o le Iunaite Setete.  I le taofi lea na iai o tatou tua’ā, o le sainiga ‘a’ao ma le Iunaite Setete o se “osigā feagaiga” ua mālilie iai itu e lua. Ae o upu Peretania na fa’aaogaina e o’o mai lava i le asō, o le “Deed of Cession,” o lona uiga: o le tu’uina atu lea o se mea totino e aunoa ma se finagalo pe o se loto iai. Talu ai ona o lea itu, e mapu’e ane ai pea se fesili, pe na tuto’atasi ma pulea lava e nei atu motu i latou lava ae ua fa’ato’ilaoina i le taimi na saunia ai ma sainia ai nei fa’amaumauga e o latou ta’ita’i fa’aleatunu’u.

O lona lua, e matuā tatau lava ia Tutuila, Aunu’u ma Manu’a ona tutū ma fusia fa’atasi i se mau ma se agaga fa’afaigā mālo e tasi. E lē toe mafai ona tatou fa’aauau pea le tatou faigā mālo i le tūlaga e pei ona iai nei, i ni feagaiga tū ma’oti toe ‘ese’ese e lua. E pei lava ona ou fa’ailoa atu i le tele o tausaga talu ai, e leai se so’otaga fa’afaigā mālo o iai nei i le vā o Tutuila/Aunu’u ma Manu’a i le iai pea o feagaiga nei e lua, lea o lo’o aloa’ia pea i le va’aiga a tulafono fa’a-vā-o-mālo. 

I le ma lona tolu, ia iai se mana’oga alagatatau e fau ai se fa’amaumauga o fa’amatalaga fa’avae e fa’amamafaina ai o tatou manatu ma o tatou mana’oga, e filifilia ai le toe teuteu o feagaiga nei e lua, po’o le toe fafauina o se talosaga mo se isi feagaiga po’o se maliliega fou. O aiaiga o se feagaiga fa’apenei e tatau ona fa’ama’oti ai le tulaga feso’ota’i o le faigā mālo fa’ateritori ma le Iunaite Setete. Ma e tele ituaiga so’otaga ma le Iunaite Setete e mafai ona filifili i ai:

o se “māliliega” feso’ota’i ma le Iunaite Setete e pei o na iai i le Taupulega a Atu Motu o Mariana i Mātu;

o se tulaga  “fa’a-asosi sa’oloto” e pei o le faiga malo a Setete Fa’afeterala a le Maikoronisia, Palau ma le Atu Malesala;

se tulaga “fa’ataupulega” ma le Iunaite Setete pei o Puerto Rico;

o se “matafaioi puipui” a le Konekeresi a le Iunaite Setete e pei ona iai tagata Initia Amerika ma tagata Alaska; 

po’o le tumau pea i le tulaga o lo’o iai nei, o se teritori e lē maopoopo ma e lē o faitaulia.

O le mea moni, o le tatou taliga tuli i fa’afitauli o lo’o iai nei i le tatou faigā mālo o le a matua a’afia ma afaina ai a tatou tū ma agaifanua i aso o i luma. E lē mafai ona tatou u’u mau le Iunaite Setete ma le fa’amaoni i le tasi lima, ae tatou tete’e i le isi lima le taliaina o le malosi ato’atoa o tulafono a le Malo Tele fa’apea ma a’afiaga o aiaiga ‘autu o le Fa’avae a le Iunaite Setete e lē talafeagai ma le tatou fa’asāmoa.

(This Op-Ed  ran in English in Samoa News, May 18, 2012)