[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua fa’amatala uma ai e Lami i le toeaina leoleo o Feo tulaga uma e uiga i le la aiga ma lona tina.]

Na matua te’i le loto o le toeaina leoleopo o Feo i le fa’amatalaga a le tamaititi o Lami lea ua fai atu ia te ia. Ua vaavaai atu Feo i le tu mai o le tamaititi i ona luma, o ona foliga, o ona lavalava faapea ai ma lona matua, ona toe fo’i lea o lona mafaufau i fanau a lana fanau o loo momoe lelei i le fale i le taimi lea, o loo lavalava lelei, aai lelei, toe ola fiafia mai fo’i i se aiga e galulue fa’atasi matua i le tausiga o le aiga, ona maligi lea o loimata o le toeaina leoleopo ma fai atu i le tamaititi, “Sole, nofo mai i lalo i le nofoa lea, fa’atali atu lea i i, ae se’i o’u alu atu e ave le ki o le faleoloa i le tama’ita’i pule lea ua sau lana ta’avale, ona ou toe sau ai lea ta talanoa,” E lei umi ona alu ese atu le tamaloa leoleopo ae toe fo’i mai ma le pepa sanuisi atoa ai ma le ipu ma le tamaititi o Lami, ona ia fai lea i le tamaititi e nofo muamua atu se’i fai la le ipu ti ona fai ai loa lea o se isi tonu mo i laua.

“O le a le ituaiga galuega lea ua e mafaufau e saili ai se tupe mo oulua ma lou tina,” o le fesili lea a le toeaina leoleopo o Feo ma lona loto ua nutimomoia i le vaai atu i le saofa’i mai o lenei tamaititi, ua le ese ma se isi o le fanau a lana fanau. “Na fa’amimigi tauau o Lami e le iloa poo le a lana tali, ona fai atu lea i le toeaina, “kae akigi fagu.”

Na luelue le ulu o Feo ona faapea atu lea i le tamaititi, “Vaai oe atali’i, e momomo lo’u loto i lo’u alofa ia te oe ma le tulaga lea ua e fa’amatala mai ia te a’u, o le ituaiga matua lea e te i ai, o le taimi lea e tatau ai ona e alu i le aoga, afai nei ae maua oe e leoleo i luga o le auala o loo e tae atigi fagu ae ete le alu i se aoga, e fa’a falepuipui lou tina, ua e iloaina le mea lena,?” o le fesili lea a Feo ia Lami, ae sa na o le lulu o le ulu o le tamaititi ma punou lava i lana ipu ti ma ana sanuisi fuamoa, e le o mamafa i lona mafaufau le mea lea e talanoa atu ai le toeaina leoleopo ia te ia. “O fea la e maua ai atigi fagu lea ua e fa’amoemoe e maua ai se tupe mo oe ma lou tina,?” o le isi lea fesili a le toeaina leoleopo, ae na toe faamimigi fo’i tau’au o Lami na te le iloa le tali, se’i vagana ai lona lima sa tusi aga’i i le auala tele, ona faapea atu loa lea o le toeaina o Feo i le tamaititi, “Ia vaai la oe, o le tonu lea la’a fai, ta nofonofo pea iinei se’i ta le 10 i le taeao, ona amata loa lea ona e savali i le taulaga sa su’e mai ni au atigi fatu, a tumu lau taga ma e sau aumai iinei e fa’aputu ai, ona e toe alu fo’i lea, se’i tele au atigi fatu ona fa’atoa ave fa’atasi lea e fa’atau e lelei lena e tele ai le tupe e maua.” Ua amata le taega atigi fagu a le tamaititi o Lami, o le ulua’i taimi lea ua tofo ai le tamaititi i le faigata o le olaga, e afa ane lava le 11 i le taeao lea, e lei tumu lana taga atigi fagu, ae ua lagona fo’i lona augata ma le vaivai.