[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea savali telea’i atu ai le tamaititi o Lami i le la faleoo ma lona tina, ma fa’amaulu lona mitiafu, ma sauni loa e savalia le taulaga mo lana ulua’i taega fagu.]

E leai ma se isi o le aai atoa ma le nuu o ia lagonaina lagona mafatia o loo feagai ma le tamaititi o Lami i le taimi nei. Atonu o loo momoe fifilemu isi fanau o le atunuu i o latou moega, ao le tamaititi o Lami, o lea ua ala i luga ma ua sauni e savalia le auala ona o le naunau e fia maua sina tupe mo ia ma lona tina, aemaise ai fo’i le tuagane o lona tina ma lona aiga lea ua latou nonofo fa’atasi. Na vaaia e le tamaititi si ona tina o loo moe na o ia i le la faleoo, ona savali atu loa lea o le tamaititi ma amata loa lana savaliga i le alatele i le pogisa o le vaveao e le’i taitai ona tatafa ni ata o le taeao.

E lei popole Lami i le malulu, ae na taua i lona loto lana folafolaga sa fai i lona tama, faitalia o ia ma tausi lona tina pe a la taunu’u mai i Apia. E taunuu le tamaititi i le taulaga i Apia ae amata lona oa tatafa ata o le aso fou, ua amata fo’i ona pisi tagata faigaluega, ae o le tamaititi i le taimi lea, ua le malamalama lona mafaufau poo le a tonu lana gaioiga e tatau ona fai, e leai ma se nofoaga o le taulaga i Apia e masani ai, e leai fo’i se isi e tau masani atu i ai lana vaai. Ua savali atu le tamaititi o Lami ma nofonofo i le polotito o se tasi o faleoloa tele lava i le taulaga, ona amata loa lea ona ia maitauina amioga a tagata, e lei umi ae ona vaaia loa se toeaina ma sona toniga e pei o se toniga fitafita o loo savali sa’o atu lava i le itu lea e saofa’i mai ai, ona manatu lea o le tamaititi, pei uma lava o se leoleo le tagata lea o loo savali atu ia te ia.

“Sole, o a au mea e fai i luma ii i le taeao e le’i taitai,” o le fesili lea a le toeaina fai toniga ia Lami, ae o le tamaititi i le taimi lea, ua na o le pupula vale o ona mata i le fefe, ona faapea atu lea o lana tali tau le lagona, “malie lou loto leoleo na ou sau e su’e sa’u galuega e tausi ai maua ma lo’u tina.” O le te’i o le fa’alogo a le toeaina leoleo i le fa’amatalaga a le tamaititi, na tu ai loa ma toe tuli tatao atu le isi ana fesili, “E faafefea ona e sau e saili sau galuega, se’i vaai ia te oe e te le’i taitai aoga i le faatinoina o se galuega.” E fai lava tala a le toeaina leoleo ma fai ia fai atu i le tamaititi la te o i tua i le nofoaga lea e fa’amautu ai mo lana galuega, ae ina ua taunuu i tua le tama’i fale o loo faamautu i ai le toeaina leoleo o Feo, sa na o le fa’alologo toto’a ae fa’amatala e le tamaititi o Lami le tala atoa e fa’atatau ia te ia ma lona tina, ma le mafua’aga ua ala ai ona alu atu e saili sana galuega, pe tae atigi fagu fo’i e maua ai se tupe mo laua, ae o le itu sa pito sili ona manu’a ai le loto o le toeaina leoleo, o le fa’amatalaga a le tamaititi fai mai, sa ia folafola i lona tama faitalia o ia ma saili se galuega e tausi ai lona tina.