OLAGA POLOGA

[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea na te’i a’e ai Sei i le leva o le po o lo o fa’alogologo to’tasi lava le leitio a Lami i totonu o le la tama’i faleoo.]

 

Ua lulu le ulu o Sei ma ata, ua le iloa e le fafine sana taga o le a fai, ona toe taoto lea ma pulou lona ie afu, ae fa’alogologo to’atasi ai lava na o Lami i lana leitio i le mananaia o musika ma fatuga fa’asamoa eseese lea o lo o fesuisuia’i mai i luga o le leitio. “Ah, e manaia fo’i le galuega lea o le fa’asalalau i luga o le leitio, e na o le nofonofo lava i le ofisa ma faalogologo i alofaaga mai tagata eseese o le atunu’u ..” o mafaufauga fai vavale ia a Lami na te’i ai lava ua moe ae ola ai lava le leitio i le po atoa.

 

O le pao mai o le paipa ina ua taele le tuagane o Sei e alu e faigaluega i le vaveao, na mafua ai ona te’i i luga Lami, ma savali loa i le umukuka ua fa’ati’eti’e le ipu ti mo si ona uncle, ae ina’i i mea ma’alili sa totoe i le po ua mavae. “Uncle, taumafa muamua lau ipu ti lea ona e alu ai lea e te faigaluega, leaga e umi fo’i le aso,” o le tala lea a Lami na te’i ai lona uncle i le ala usu o lenei ali’i. “Sole, aisea ua e ala usu ai i le taeao ae le moe pea oe o lea e malulu le mea, se aua e te toe sau fua e fai na ipu ti mo a’u, se’i malamalama lelei le taeao ona fa’atoa e alu lea e fai se tou ti ma si ou tina ma nai ou tei, ua e fa’alogo mai,” o le talanoa atu lea a le ali’i o Oloaga i le tamaititi o Lami.

 

“Vaai oe uncle, ou te nofo lava ma ou vaai alofa mai i lou tigaina i le tausiga o le tatou aiga, e te ala i le vaveao e lei taitai ae e te manava mai ua pogisa le aso, e le maua sau malologa, o le ala fo’i lena ua ou manatu ai, ou te ala usu e fai sina ipu ti mo oe, ae ete lei usu e te faiglauega,” o le fa’amatalaga lea a le tamaititi o Lami na ootia ai lagona o le tamaloa o Oloaga, ina ua ia iloa, e laititi lenei alualu toto ae ua matua lona mafaufau i auala e tausi ai le aiga. “O le a la se mea o loo i lou mafaufau ali’i Lami,” o le toe fesili tuli tatao atu lea a Oloaga ma lona manatu, ailoga lava poo le a se lagona o loo nofo ma Lami, ae na te’i le tamaloa ina ua fa’apea atu le tamaititi, “O nei lea ua uma ona ou talanoa ai i lo’u tina, o le a ou alu e saili sa’u galuega e fesoasoani ai ia te oe i le tausiga o le tatou aiga. Ou te iloa e le o se galuega faigofie o loo e tauaveina nei, e fai o le tausiga o lou aiga ma si au fanau, ae faapena fo’i maua ma lo’u tinoa ....,” na motu fa’afuase’i le talanoa a le tamaititi o Lami ina ua maligi ona loimata, ona ia toe fa’apea atu lea i lona uncle.

 

“O upu mulimuli a lo’u tama ae ma te le’i tuuvaa ese mai iinei, ia tautuana ma a’u lo’u tina, ae o la’u folafolaga sa fai i ai, aua le popole, tuu mai lona fa’atuatuaga ia te a’u i le tausiga o le ma aiga ma lo’u tina, o le pogai la lena uncle ua ou manatu ai, o lea ua atoa le 3 masina talu ona ma taunu’u, ua tatau ona i ai so’u sao i le tausiga o le tatou aiga.”

Comment Here