[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea na toe vevesi ai fo’i le aiga ina ua toe fa’apisa e Sei le afiafi.]

Na toe fai fai tetele le vevesi a le aiga ina ua toe oso atu le fafine o Sei ma lona leo saua ma le ita i le fa’amatalaga a le tama teine a le tuafafine a lona to’alua, ma toe atili ai fo’i lea ona fai fai tetele i luga le vevesi a le aiga, ae ua aga’i atu i le leva o le po. “Siaula Sei”, o le tuafafine lea a Semisi, “Ailoga eke iloa ua makaga le aiga i au faiga le mafaufau o lo o fai i le gu’u, fa’akoa e sau gei lava i le aiga a o lea ua lailai le aiga i au faiga le mafaufau, ma le makou kiga ua fia selau kausaga o kaukua i le aiga e le lagoga soga leo”, o le avaavau atu lea a le tuafafina e Semisi i le fafine o Sei i lona leo maualuga ma le leotele, ma amata ai fo’i na toe vaaia le gasolo ane o isi tagata fai tatala e fia iloa le au o le paipa.

O le autu o le o le vevesi lea ua aafia ai le aiga o Semisi ma Sei i lea afiafi, o faiga fa’apologa o lo o faia i le tamaititi o Lami, lea ua pei o se tala fa’a fagogo i le fa’alogologo a le nu’u atoa. Ua le iloa e le tamaloa o Semisi se mea a fai, e fai o lona alofa i lona to’alua ma le mea na fasi ai e le fanau a lona tuafafine, ae lagona fo’i lona ava i lona tuafafine matua, lea ua fa’atigaina mai lava ona o le alofa i le tamaititi matua oti o Lami.

E vevesi lava le aiga i le afiafi lea, ae na o le nofonofo lava o le tamaititi o Lami ma le maligi o ona loimata, i le mafatia o lona mafaufau i le fa’aletonu tele lea ua tula’i mai i totonu o le aiga ona o ia. “Semisi ma Sei o’u matua, ou te talosaga atu, tatou fa’auma ia lenei vevesi, ae tu’u i le Atua mea ua mafatia ai o outou loto, o a’u, ou te le toe manatua mea ua tuana’i i totonu o le tatou aiga, tus lava fo’i po o tala ma upu a tagata o le nu’u e fai mai e uiga ia te oulua ma le tatou aiga, ou te le popole lava i ai, ou te inu pea i ai ma lo’u talitonuga atoa, e le suia lo’u alofa ia te oulua o o’u matua peleina”, o upu ia a le tamaititi o Lami na atili ai ona toto le fatu i le loto o le fafine o Sei, e le taitai toe aveesea le loto o Lami mai ia i laua ma lona to’alua, o laua o ona matua.

E fa’ai’ui’u loa upu o le fa’aleleia a le aiga i le afiafi lea, ae vaaia loa e le tamaloa o Semisi se solo tele lava o lo o aga’i atu i le latou fale, o le solo o matai o le nu’u, ua aga’i atu e momoli atu le fiangalo o le nu’u ua mae’a ona faia i le po lava lea, e fa’atatau i le fafine o Sei ma lana amioga o lo o fai, ina ua ia lafo upu mataga ma upu fa’alumaluma i matai o le nu’u, e aofia ai faletua o tamali’i o le nu’u sa lolofi atu e fia iloa le fa’alavelave na tula’i mai i le lotoifale o le latou aiga. O le te’i tele o Semisi na mafua ai ona tula’i ma savali mai i le faitoto’a o le fale, ae fetaui loa fo’i ma le taunu’u atu i ai o le fofoga o le nu’u o Amouta, le tofa a Fa’apulou.