[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea na tu sasa’e ai i luga le fafine o Sei ma savali i fafo, ona ia ato lea o le faitoto’a pito i tua o le fale.]

E le i tapuni lelei le faitoto’a lea na ato e le fafine o Sei i lona fa’ali’i i le ote a le tuafafine o lona to’alua, ae fa’afuase’i loa ona tu i luga ma le tama’ita’i o Losi, o le tama teine matua a Maleka, ma mulimuli atu i tua o Sei lea ua savali i fafo, ae o le taimi lea, na avea le pa-o leo tele o le atoga o le faitoto’a ma itu na tau fai autilo uma mai ai aiga tuai i le fale o le aiga o le tamaloa o Semisi, ma latou vaaia ai Sei ua savali atu i fafo, e lei umi ae folo atu ai i tua ma le tama’ita’i o Losi, ma aga’i sa’o atu loa i le itu pogisa lea o lo o tu mai ai le fafine o Sei.

“E! Sei, o ai lea ga fa’akakau i ai lau faikoko’a sa ako?”, e fai lava tala a Losi ma aapa atu ona lima ua futi mai le ulu o le fafine o Sei ma tamoto loa ona foliga, ae ua fa’apea fo’i ona aapa mai Sei ma futi atu le ulu o Losi ma avau a loa a la fusuaga i fafo o le fale. Na vave ona iloa e tagata o le misa le mea lea o lo o tupu i le fale o Semisi, i le pe’ape’a o gutu o le au to’alua lea ua fufusu. “Auoi! Auoi!, ka fia ola”, o le alaga lea na fa’alogo mai ai le fafine o Maleka ma Semisi, ma tau fai tulioso uma loa i tua o le fale i le fia iloa po o ai lea ua alaga mai i le fia ola, ae na tete’i ina ua taunu’u atu i tua ma latou vaaia ai le fafine o Sei o lo o ta’atia i lalo, ae o lo o tu ai Losi i lona papatua ma sasa i le amo sa ta’atia i tafatafa o le umukuka, o le amo lava fo’i lea na sasa ai e Sei le tamaititi o Lami.

“Siula Losi, alu ese! Losi, alu ese, ua lava lega”, o le valaau atu lea a le fafine o Maleka i lana tama, ma savali atu ua toso ese mai le lima o Losi, ae aapa atu ma taumafai e fa’anofo mai i luga le to’alua o si ona tuagane, ae o le tamaloa o Semisi i le taimi lea, ua na o le tu ma fa’atau pupula i le mata’utia o le vaaiga lea ua ia vaaia isi ona to’alua. Ua faigata i le tamaloa o Semisi ona gagana i le taimi lea, ona o lo o manu’a lona loto i le ita i lona to’alua, talu ai faiga saua sa ia faia i le tama e to’atasi o si ona tuafafine, a’o lea ua fa’ateia lana vaai i le tulaga pagatia ua oo i ai lona to’alua ina ua fasi e le tama a le isi ona tuafafine. “Sei, e le o le mea ea lea sa ou kalagoa aku ai ia oe, soia eke fa’apologaiga Lami, e le o Lami o se kama a le po, e fai fo’i aiga o legei kamaikiiki”, o le ote lea a Semisi i lona to’alua, ona aapa atu lea ua uu lona lima ma taumafai e fa’atula’i mai i luga, ae o le fafine o Sei i le taimi lea, ua na o le tagi aueue ma le gutu e le malolo i le tele o le mau gasu o lo o lafo mai e fa’atatau ia Maleka ma lana fanau, i le le mafaufau ma le soli atu fua o le fanua ma le la fale ma lona to’alua ma lana ta’utinoga i lona to’alua, “Afai ua fasi a’u e lou kuafafige ma laga fagau ao lega eke ku ku, ua lava lea e ka’u mai ai, eke le alofa ia ke a’u ...”