Ads by Google Ads by Google

OLAGA POLOGA

[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea na sa’i ai le fafine o Sei i lona to’alua, i lona tu tu a’o fasi ia e le fanau al ona tuafafine.]

 

Na ona uma lava o upu ia a le fafine o Sei i lona to’alua o Semisi, tu loa i luga o le a savali i totonu o le fale, ae na te’i ina ua toe aapa atu lima o le fanau teine a le tuafafine o Semisi ma toe futi mai i lalo lona lauulu, ona toe fasi fo’i lea, ma toe vaaia ai fo’i le toe avau o fusuaga, ae ua atili ai le tumu tumu atu o tagata fai tatala o le nu’u i le fia iloa o le au o le paipa. O nisi o le nu’u e misi alofa i le fasiga o le fafine nofotane o Sei, ae o isi ua fiafia ma fa’apea a latou tala, “make ai lava Sei, se’i oga lagogaiga fo’i le leaga o le mea o le saua ia Lami, lea la ua vaai i ai, e i ai fo’i aiga o Lami lakou ia”.

 

Na fa’ateia uma tagata o le nu’u sa i ai aemaise ai le tamaloa o Semisi ma lona aiga, ina ua fa’afuase’i ona latou vaaia le tamo’e atu i le atoa o le tamaititi o Lami ma fao i luga o le fafine o Sei, ma alaga atu i le fanau o le uso o lona tina e alolofa, taofi le fasiga o Sei.

 

“Faamolemole, ua lava lena, aua le toe fasia lo’u tina o Sei, fa’amolemole, fa’amolemole ..” e tagi lava Lami ma tago atu ua fusi mai le fafine i ona lima, ma ua avea ai lea vaaiga o se vaaiga fa’amomoi loto i lea afiafi i tagata uma sa i ai, ina ua alolofa uma tagata i le tamaititi, i lona loto fa’amagalo ia Sei, e ui i mea leaga e tele sa faia e le fafine ia te ia.

 

“Fa’amolemole Semisi lo’u tama, ua lava lea, aua ne’i toe pa’i se isi i lo’u tina, ua lava lea ...” Na vaaia le maligi o loimata o le tamaloa o Semisi i le taimi lea, ona ia punou ifo lea i lalo ma fa’atu i luga le tamaititi o Lami ma fai i ai e savali i totonu o le fale, ona ia tago atu fo’i lea ua fa’atu i luga lona to’alua ma fai i ai e savavali i totonu o le fale, o lea ua tumu tumu mai le nu’u i le vavao atu o le latou aiga. O le tamaloa o Semisi, o se tasi o matai faiupu i totonu o le nu’u o Amouta, o le mafua’aga lea na manatu ai le tamaloa, e tatau ona fai sana tala i le nu’u lea ua tumu tumu atu, ina ne’i maitau mai e le o mamafa i lona loto i le mataga o le mea sa tupu.

 

“.. Kakou guu, ou ke fa’amalulu aku oga o le kulaga e pei oga kula’i mai i le makou aiga legei afiafi, ou ke iloa lava ua le kalafeagai le vevesi ma kaimi o faiga loku a le kakou afioaga gei, ae fa’amalulu aku i le paia o le kakou gu’u oga o lea fa’alekogu ..” Na tali mai fo’i nisi o matai o le nu’u i le tamaloa o Semisi e tusa ai o le mataupu e pei ona talanoa atu ai, ma latou taua ai e fa’apea, e leai lava se aiga o le nu’u e tutupu ai ni fa’aletonu fa’apea, ae pau le talosaga, ia fai fa’alelei le tamaitiiti o Lami, aua le fa’apologaina. O se afiafi ese lea i le aiga o Semisi ma Sei, ae maise ai fo’i o le tamaititi o Lami, ina ua iloa e le ulugali’i, e leai se isi o le nu’u e le o iloaina le faiga fa’apologa a le fafine o Sei o lo o fai i le tamaititi o Lami.