[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea ua alu atu ai Lami i le vai taele a le nu’u la te fetaui ai ma Kepi.

E gasoso uma tamaiti o le nu’u i le malae e lakapi ai, ae ese le itu e aga’i i ai le tamaititi o Lami, e fa’atutu lana savaliga i le vai taele o tamaloloa ma tagata matutua, o iina lea na fa’atonu ai o ia e le tamaloa o Kepi la te fetaui ai. “Sole Lami, o fea a e alu i ai?”, o le tu’u fesili ane lea a isi tamaiti o le tupulaga a Lami, ae sa na o le tusi o le lima o le tamaititi i le itu i sisifo o le nu’u e fa’ailoa atu ai le mea e alu i ai, ae aunoa ma se upu e tali atu ai.

“Lami! Lami!”, o le tau valaaau ane lea a le tagata, ma le tepa atu o le tamaititi, o Kepi, le ali’i lea na la tu’u tala i le taeao ina ua fo’i ane lana faiga popo, a uma ona sau lea i le vai taele a le nu’u la te feaui ai. “Sau aga’i i le itu lea ta taeleele ai ma ta talatalanoa ai”, o le toe valaau ane lea a Kepi, ma ia vaaia ai le tamaititi o Lami ua savali aga’i atu i le itu o lo o taeleele mai ai. E savali atu fua Lami, ae o Kepi i le taimi lea ua matua momomo lona loto i lona alofa i lenei tamaititi ma le olaga pologa ua ola ai, na ona savali atu lavao Lami oso loa i totonu o le vai taele ma fa’amalu ai loa lona tino ua alu le afiafi o afu ma velasia i le faiga o lana fa’alifu talo ma le kofe o le afiafi.

“Ga iloa e ou makua lou sau?”, o le fesili lea a Kepi i le tamaititi, ae sa lulu le ulu o Lami e fa’ailoa atu ai lana tali leai.

“Vaai oe Lami, ga mafua oga ou fai aku eke sau iigei ka ke kalagoa ai, ou ke le maga’o e vaai age le kuagage o lou kiga ma loga ko’alua ga eke gofo ai o ka kalagoa, iga ge’i masalosalo po o a gi kala o fai aku ia ke oe, ae vaai oe, makua kumu lava a’u i le alofa ma le momomo o lo’u loko i le auala o lo o fai ai oe e le ko’alua o le kuagage o lou kiga, e fai o le pologa, oke, ae le lelei fo’i le kausiga o oe, o le mea lea ua ou maga’o ai ou ke kalagoa aku ia ke oe, pe eke fia alu eke gofo i lo’u kuafafige ma loga ko’alua i Apia, e lelei lega e maua ai le avagoa e ke alu ai i le aoga, koe lelei fo’i e lakalaka i le kaulaga ma faigofie ai mea uma mo oe ..” o le talatalanoa atu lea a Kepi i le tamaititi, ae na o le nofonofo lava o le tamaititi e le tautala, se’i vagana ai le maligi lemu ifo o ona loimata, ona ea ane lea i luga ma faapea atu lana tala ia Kepi, “Vaai oe le uso makua Kepi, fa’afekai kele i lou magaku mai, ae o a’u, ua ou malie lava ou ke gofo pologa i le kuagage o lo’u kiga, se’i o’u kausi i ai ma kaukua laga makai, akogu fo’i e i ai se aoga mo lo’u olaga i le lumaga’i, o kulaga fo’i i le koe a loga ko’alua, ua ou masagi ai fo’i, ma ua ou magaku ai, o le a le afaiga lea mo a’u, ae ou ke kausi pea ia ke i laua”, o le talatalanoa atu lea a Lami i le tamaloa o Kepi ma fa’aauau ai lava le la taelega i le afiafi.