[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea ua otegia ai e le fafine o Sei le tamaititi o Lami, po o ai le aiga o le nu’u e ana le fanua lea ua gaoi mai ai, fua i le vave o lana faiga popo]

E tetele atu lava tala a le fafine o Sei ae na o le savali gugu lava o le tamaititi o Lami i tua i le umukuka ma fa’apalasi i ai lana amoga popo, ona savali ane loa lea ua amata ona taei sua o popo i totonu o paelo ae amata loa ona sali meaai a pua’a, ae o le taimi lea ua usu fiafia uma ai tamaiti o le nu’u i le aoga, se’i vagana ai le tamaititi o Lami lea ua usu e fa’atino tiute ma galuega a taulele’a o le aiga. E lei malolo Sei mai lana ote ia Lami ina ua fa’atoa taunu’u le tamaititi ma lana amoga popo, ae ua toe savali atu nei i tua i le umukuka ma toe fa’aauau ai lana ote i le tamaititi, o le taimi lea, ua fa’alogologo uma aiga tuaoi i lana gasu gasu o lo o fai, ua lalau le ta’a o le tina o si tamaititi, e leai sona aoga i le aiga, ao lea ua oti ae tigaina atu ai fua laua e tausi o ia, talu ai le fa’atamala o lona tina ma le le alofa i se aiga.

O le ali’i o Kepi lea na talanoa ma Lami i luga o le auala ina ua fo’i mai le faiga popo a le tamaititi, e sosoo lava le latou fale ma le fale o le aiga lea ua nofo ai nei Lami, ma, e leai ma se upu o le ote a le fafine o Sei na misi i le fa’alogo a le to’alua o Kepi, o se tasi fo’i o fafine e nofotane mai i le nu’u. Ua na o le vaavaai mai o le fafine tuaoi ma le momomo o lona loto i le fa’apologaina o si nei tamaititi laititi, ae ua le tuli e alu i le aoga.

“Sole Lami, faagakigaki le fafagaiga o pua’a ga, se’i vaai ua aai uma pua’a a le gu’u ae ga o le kakou aiga lava lea e le’i aai puaa, le mea lega sa ou fai aku ai ia ke oe e aua eke malolo i le la’uiga mai o popo a pua’a i le kele o aso, lea la ua oo mai i le aso Sa agagafi ae ua uma popo, fa’agakigaki ae koe alu e fai mai gi fafie o le umukuka ua leai ma gi mea kaufi afi”, na ona uma lava o le ote a le fafine, toe savali loa i luma o le fale ua tui ona laei mama ae savali aga’i loa i luma o le aai. “Lami! Lami!”, o le valaau tau le lagona ane lea a le fafine o Ula, le to’alua o le ali’i o Kepi lea e tuaoi lava ma le fale o Lami, “sau muamua e igu sau ipu ki oga e alu aku ai lea e sai fa’auma popo a au pua’a’”, na ona tepa atu lava o le tamaititi ua lilo atu le tino o Sei i lana vaai, tago atu loa ua tauai fasi popo ua uma ona sali e fafaga ai pua’a, toe sasa’a atu ai ma le suapopo i luga o pa’u ta’avale e fa’a feinu ai, ona savali ai loa lea i le fale o le aiga tuai ma inu ti ai i le taeao. Na ese foi lagona o le tamaititi ina ua ia vaaia foliga alofa o le fafine o Ula atoa ai ma lona misi alofa i le olaga pologa lea ua ola ai, ae na ata le tamaititi o Lami ma tali atu i ai, “Akogu fo’i ua ou igu ai i le olaga pologa oga o le le alofa o lo’u kiga i loga aiga”.