Vaega: 17

Fa’atalofa atu i lou alafa’i mai i lenei taeao fou i le manuia, e ao ai ona  o tatou fa’afo’i pea le vi’iga ma le fa’amanu i lo tatou Matai oi le lagi, ona o Ana fa’amanuiaga lea o lo’o tatou oaoa ai pea i Faleseu ma o tatou sa’a ai i ma’a o malie. Ae alo maia, o le a toe fa’aauau atu la tatou tala mo lenei aso. Ae ai manuia lou alo atu i faiva ma tiute.

Na muta mai la tatou tala ina ua to’oto Keisi i totonu o le falema’i, o lea fo’i ua o’o ane ana uo ae maise o e masani e asi ane ia.

Ae e moni lava, o lea ua alu ane Keli e asi ia, a’o le taimi lea, o lo’o i ai fo’i ma lona to’alua o Loleni i totonu o lona potu. O lea ua fai nei le talatalanoaga a Keli ma Loleni, ma le lilo i o la manatu o lea o lo’o fa’alogologo atu i ai Keli.

Na fesili Keli i a Loleni pe ua fai sana mea’ai o le aoauli, ae tali Loleni, na o lana ipu kofe na avane e le tama’ita’i foma’i, ma e le o lagona sona fia ‘ai. Na tali Keli, “Loleni, e tatau ona maua sau mea’ai, e le mafai ona e malosi pe afai e te le ‘ai’.

A’o fai  pea le talatalanoaga a Loleni ma Keli, o le taimi lea, o lo’o tau matemate lava e Keisi, po’o ai ia tagata ua o ane i lona potu, ae pe moni fo’i o le leo o lona to’alua o Loleni ma lana uo o Keli lea e fa’alogo nei i ai. ina ua mautinoa e Keisi, o le leo o lona to’alua o Loleni lea e tautala, ma o lo’o fai le la talanoaga ma lana uo o Keli, na taumafai lava e vala’au ane i ai, peita’i, ua le mafai.

Na liliu nei Keli ma tilotilo ane i si ana uo mamae o Keisi ma ona foliga fa’anoanoa, ma fa’apea ane lana tala i le to’alua o Keisi, ua sui lava foliga o Keisi, pe ua i ai se suiga i le taimi nei?

Na tali Loleni, e fa’apea, “Fai mai le foma’i, o lo’o feagai pea Keisi ma tiga, ona o tagata o lo’o koma, latou te lagona le tiga.” ina ua mautinoa e Keisi, o le leo o lona to’alua o Loleni lea e fa’alogo atu i ai, na fa’apea ona mafaufauga i lea taimi, “Loleni, ua e maua a’u, sa ou iloa lava e le mafai ona e tu’ua a’u i lenei mea pogisa.”

Ua fai nei le talatalanoaga a Loleni ma Keli, ma le lilo i o la manatu e le o lagona mai e Keisi, peita’i, o lea e lagona lelei lava e Keisi ia tala a tagata o lo’o fai, ae maise ai o le tele o feiloa’iga a tagata o lo’o fai i totonu o le potu o lo’o ta’oto ai.

“Loleni, ou te le talitonu o Keisi lea, o le taimi mulimuli na ou va’ai ai i a Keisi, o se tagata ua sili ona aulelei, ma e ala lava lona mafaufau i taimi uma…a’o lenei, oka, oka e, ua ta le fia pupula atu i ai, talofa e, i a Keisi.”

E faia pea…