Vaega: 77

Taeao manuia, i lou alafa’i mai i fanuga lelelei o lenei aso fou, tatou fa’afo’i ai le vi’iga ma sunu’i lapalapa o malo i le Atua Soifua, ona o Lana tausiga alofa mo i tatou e le mavae. Ae alo maia o le a toe fa’aauau atu la tatou tala mo lenei aso. Ae ia manuia lou alo atu i faiva ma tiute o lenei aso.

I le ta tonu o le itula e sefulu i le taeao na soso’o ai, o le taimi lea na fa’alogoina ai e Keisi le to’atele o tagata ua o’o ane i totonu o lona potu. Ua tau mafaufau nei, pe aisea ua tumu ma pisapisao ai tagata i totonu o lona potu ae le masani ai. Na toe manatua vave e Keisi le tala a lona to’alua o Loleni sa fai ia Lenina, o taeao, o lona uiga o nei, e te’a ai i tua ia mai le falema’i, ma o le a ave sa’o lava i lo la fale e tausi ai.

Fai mai, a’o pisi foma’i ma tama’ita’i tausi mai i le tapenaina o mea uma a Keisi ua te’a i tua, na tu pea le ali’i foma’i lea sa va’aia lava Keisi mai le amataga ma tilotilo ifo i a Keisi, a’o ta’oto pea i luga o lona moega.

Fai mai, na oso lava masalosaloga o le ali’i foma’i, aua o lea ua fa’ate’a i tua e Loleni ia Keisi, ae e le i malosi lelei, ua tu’u fesilisili fo’i i le mafaufau o le ali’i foma’i, pe o le a le mafua’aga. Na punou ifo nei ma musumusu i le taliga o Keisi, “Keisi, afai lava o e lagona mai a’u, o le aso lenei ua e te’a ai i tua, sa ou finau lava i lou to’alua, e tu’u oe, se i e malosi lelei, ae ua le mafai lava le finau mai a lou to’alua e fa’ate’a oe i tua i lo oulu aiga e tausi ai, ia e taumafai malosi ina ia toe fa’afo’isia lou malosi, ma ‘aua e te fefe pe e te popole, ae ia toa lou loto, ua ou iloa o lo’o mafai lava ona e lagona mea uma, ua ou iloa fo’i, o le a toe fo’i lava lou malosi i le mea sa i ai muamua, ae o le mea le na e fai i ai le loto o le tagata.”

Na lagona uma lava e Keisi tala a le foma’i lea na fai ane i a te ia, a’o le taimi lea, o lo’o fa’ataitaio mai lava i totonu o lona nofoaga pogisa, “Foma’i, fa’amolemole, ‘aua ne i fa’ate’aina a’u i tua, o lo’u to’alua o lo’o taumafai e fasioti a’u, fa’amolemole, ‘aua le fa’ate’aina a’u i tua.”

Ae paga lea, ua leai se mea na te mafaia, aua ua le mafai ona tautala mai, ma ua le mafai ona fa’ailoa ane sona manatu e tusa ma le fa’aiuga ua faia e lona to’alua o Loleni mo ia, ma ua na o ia lava o lo’o nofonofo pea i totonu o lona potu pogisa ma ona mafaufauga le mautonu.

E faia pea…