Vaega: 68

Fa’afetaia pea le agalelei o le Atua i lenei aso, aua ua o tatou toe aulia mai i le manuia i Lana tausiaga alofa e le mavae mo i tatou, ia o tatou manatua ai pea o tatou uso o lo’o mafatia ma puapuagatia i le lalolagi atoa, ina ia alofa le Atua ma fesoasoani atu mo i latou. Ae ia manuia lou alo atu i faiva ma tiute o lenei aso.

Na ona tu’u ane lava e Loleni o le siaki i a Lulu, tilotilo Lulu po’o sa’o fuainumera, la’a ane loa i le moega o lona uso ma fa’atofa i ai, “Tofa Keisi.” Na lagona e Keisi le matala o le faitoto’a ma alu ‘ese lona uso mai totonu o lona potu.

Fai mai e le i umi ona alu ‘ese Lulu, ae fa’alogoina loa e Keisi le matala mai o le faitoto’a ma fa’alogo atu o fa’apea le tala a le tagata lea ua ulufale mai, “E le i uma lava le lelei o au faiga o fafine.” Ua oso i luga Loleni ua te’i, ma fesil ane i le tagata lea, “O le a lau mea lea ua fai, e le tatau ona e sau i inei.”

Fai mai, ua tau fa’alogologo ifo Keisi, po’o ai lenei tagata, aua e fou i lana fa’alogo lona leo. Na tali ane le tagata lenei ia Loleni, “Sa ou manatu ou te sau e va’ai, po’o fa’apefea mai le ma’i.”

Na toe tali Loleni, “E te valea a.?” Na toe tali ane le tagata lea, “Loleni, se ‘aua e te popole, afai e sau se tasi ma iloa mai a’u, pau lau tala e fai o a’u o lau oe, na ta masani mai i le faleta’alo, ma ua ou sau e fa’ailoa lo’u alofa i lou to’alua lea ua taoto, ua koma.”

Na mafaufau nei Keisi ma fesilisili po’o ai lenei tamaloa ua alu ane i totonu o lona potu, ma talanoa i lona to’alua o Loleni. Na fa’alogo mai Keisi o toe fa’apea upu a Loleni, “E tatau ona e alu ‘ese vave i le taimi lenei. Na tali ane le tamaloa lenei, “Ou te le alu ‘ese, Loleni, ua lua masina e te le talia le telefoni, ma e te le i toe vala’au mai fo’i i a te a’u.”

Na tali Loleni o ia sa pisi, ma ua le mafai ai ona vala’au ane, na toe fa’apea tala a le tamaloa lenei, “ioe, o oe o se tamaloa e alofa i lou to’alua, a ea?” Na toe tali Loleni, “E te le i tu’u maia i a te a’u se isi auala, ma ua na o le pau lena o le mea na ou faia.”

O le taimi lea, ua vevesi solo le mafaufau o Keisi, ma tu’u fesili pea, po’o ai lenei tamaloa, ae po’o le a fo’i le uiga o lona alu ane, ae pe o lea fo’i le uiga o ana tala o lo’o fai nei i lona to’alua o Loleni.

E faia pea…