Vaega: 66

Fa’atalofa atu i le mamalu o le atunu’u i lenei aso fou, o se aso e fa’aopoopo i lou soifua, tatou fa’afo’i la’ia o le mua i le Atua Soifua, ona o Ana fa’amanuiaga lea o lo’o tatou ‘oa’oa ai pea i Faleseu ma o tatou sa’a ai i ma’a o malie i aso uma, ae alo maia o le a toe fa’aauau atu la tatou tala mo lenei aso.

Na tali Lulu, “Loleni na ula lau mariuana ae e le tele, ae ua ou ‘ata ina ua fai mai o Viliamu Pili le igoa o le loia, va’ai fo’i oe, o lea fo’i e iloa e Keisi le malie o le igoa o le loia.” Na te’i Loleni i le tala a Lulu, ma fesili ane loa, “O le a?”

“Loleni, va’ai fo’i oe i foliga o Keisi, o lea fo’i o lo’o ‘ata mai i a ta tala lea e fai.” Ua iloa e Keisi, le malie o le tala lea o lo’o vevesi ai nei Loleni ma lona uso o Lulu, o le malie la o le tala ma le ‘ata a Lulu, lea ua ‘ata ai nei ma Keisi, ae ua na o Lulu lava o lo’o iloaina.

Na toe fai ane le tala a Loleni, “Lulu, ou te le malamalama i le mea o lo’o e fai mai ai.” Na tali Lulu, e sa’o lava a’u, o lo’o lagona e Keisi tala, ma e sa’o fo’i a’u i le tulaga lenei, va’ai fo’i oe, o lea e ‘ata mai Keisi, o lo’o malamalama, ia e lelei mai la i a te a’u, aua a toe malosi mai Keisi ma ia iloa e te le o lelei mai i a te a’u, ona le malie loa lea o Keisi i a te oe.”

Na toe tali ane Loleni, “Lulu, o lea ou te manatu atu i a te oe.” “E a Loleni, o lo’o e manatu mai i a te a’u i le gaoiina o a’u tupe.” Ua fai nei tauga upu a Lulu ma le to’alua o lona uso o Loleni. E le o malie lava le loto o Lulu i le tulaga lea ua tula’i mai, ona o le taimi lea, ua taoto ai lona uso i le koma, o lona uiga o Loleni lea o ua va’ai mea uma.

Na toe tuli tatao ane lava Lulu, “Loleni, atonu e le i talitonuina a’u e lo’u tama i tupe, ona ou te la’ititi, ae afai o le tulaga lea ua tula’i mai, ua va’ai e oe mea uma, ou te le fiafia ai,  a ou te le mana’o fo’i i ai, afai lava la e taoto Keisi ua koma i le isi  sefulu tausaga, o lona uiga, o oe lea o le a fa’asoasoaina tupe, ae e le o ni au tupe, o tupe a a’u, o le le fetaui la lea o le mataupu lenei.”

Na toe fai ane Loleni ia Lulu, “Lulu, ua uma ona ou talanoa i loia, ma o a’u o lo’o va’ai i le taimi lenei, ona o a’u o le to’alua o lou uso, ae sau se taimi ona e malamalama ai lea, ae o le a ou toe talanoa ia Viliamu Pili i le itu lea ua e fai mai ai.”

E faia pea…