Vaega: 57

Fa’atalofa atu i lou alafa’i mai i le manuia i lenei taeao fou, malo le soifua, malo fo’i le onosa’i ma le fa’apalepale, a’o e alo faiava i tiute ma galuega o lenei aso, ae ia o tatou manatua pea ona fa’afo’i le vi’iga ma le fa’afetai i le Atua, ona o Lona alofa ma Lona agalelei, lea o lo’o tatou maua ai pea le ola.

O le aso lava lea, a’o le i tu’ua e lo la tama lo latou fale, sa fai ai fo’i finauga a Keisi ma Lulu, e uiga i le mataupu lea na o la fa’ailoa i lo la tama. Na finau ane Lulu, e fa’apea, e le o tautala sa’o ane lo la tama ia la’ua e uiga i tala nei ua fa’aalu i luga o nusipepa, ae sa tu pea Keisi ma lona loto tele e finau mo lona tama.

O le isi lea itu ua toe manatua nei e le teine, ona o le aso lea na o la tau upu ai ma lona uso la’ititi e uiga i lo la tama, ae maise o tala ua tusia i luga o nusipepa. Na avea mafaufauga ia o Keisi na ala ai loa i luga. A’o le vavega ua tupu nei, ona o le taimi na pupula ai mata o Keisi, o le taimi lea na ia tau iloa atu ai, ua pogisa, ua toe tilotilo vave i le isi itu ma ona iloa atu le nofoa o lo’o tu’u i luma o le fa’amalama. Na tepa ane nei i le isi itu o lona moega, ma ona va’ai atu ai i se teu fugala’au matagofie o lo’o tu mai ai.

Ua le mautonu Keisi i lea taimi, ae o se vavega lea ua tupu i a te ia, ua mafai ona va’ai, ua mafai ona ia iloa mea uma, ma ua mafai fo’i ona ia iloa tagata. Na fa’apea mafaufauga o Keisi, “Oi, ta’i fa’afetai, fa’afetai i le Atua, po’o fea lava o e i ai, po’o e silasila mai i a te a’u, fa’afetai, fa’afetai tele le Atua.”

A’o fa’asolosolo pea le va’ai a Keisi i totonu o le potu o lo’o ta’oto ai nei, na fa’ate’ia ina ua matala mai le faitoto’a ma ulufale mai i totonu se tagata. Ua fesilisili nei lona mafaufau po’o ai lea tagata ua alu ane i le vaeluaga o le po, na toe mafaufau Keisi, e taumate o se ali’i foma’i, ua alu ane e asi ia.

“E a, ua pei oe o se peteta ua ta’ape’ape, a ea?” O upu ia na fa’alogo atu i ai Keisi o tautala ane ai le tagata lea ua alu ane i totonu o lona potu. Ua lagona le fefe o Keisi i lea taimi, ona e fa’alogo atu e fou le leo lea i lana fa’alogo, o tala fo’i o lo’o tautala ane ai le tagata lea i a te ia, ua iloa ai e le o se tagata lelei.

Na toe fa’apea isi tala a le tagata lea, “Va’ai oe Keisi, ua le mafai ona maua sa’u malolo i le o atu so’o o Leoleo e fesilisili po fea na ou i ai i le aso na e lavea ai i le ta’avale. O tala fo’i na fai i ai e lo’u tina, sa ou malaga i le taimi ma tupu ai le fa’alavelave i a te oe, e le i talitonu i ai Leoleo.”

E faia pea..