Vaega: 56

Ua va’aia ataata o ta’ulelei i lenei taeao fou, ua fa’ailoa mai ai le mamana ma le matagofie o galuega a le Silisili ‘Ese mo i tatou, ona o tatou fa’apea ifo ai lea, “Le Ali’i e, ia e alofa foa’i mai ia i matou le loto mama, ia mamao ai i matou ma manatu losilosi vale ma le mana’o, ae ia e tausi i matou i lou filemu i aso uma o lo matou ola, amene.

O le taimi lea, o lo’o lagona lelei lava e Keisi tala ia a Pesi, na tali ane i ai Loleni, ioe, o ia e alu ane e tausi ma va’ai Keisi ma te’a i tua mai le falema’i. Na toe tuli tatao ane e Pesi e fa’apea, “Loleni, ua uma ona tapena a’u ato, o le taimi lava e te’a ai i tua Keisi, o le taimi fo’i lea ou te alu atu ai e va’ai.”

A’o fai tala ia a Loleni ma Pesi, ma o le taimi fo’i lea o lo’o fa’aauau pea le fofoina o Loleni e Pesi, na matala fa’afuase’i mai ai loa le faitoto’a ma savali mai i totonu le tagata. Fai mai na ona ulufale lava o le tagata lea lafo mai loa ma le tala, “Oi, fa’apea lava a a’u o le ma’i o lo’o taoto, a’o a lua mea na e fai.”

Na fa’alogo atu Keisi, o le leo o lana uo o Lenina. Na tali Loleni, ua tau migi musele o lona tua, o Pesi la lea o lo’o taumafai e fofo. Na toe tali mai i ai Lenina, “Pesi, ua tatau ona e alu i fafo, alu loa lava i fafo ae ou te le i lipotiina oe i le foma’i, alu ‘ese nei loa, fa’avave.” Na iloa lelei lava e Kesi le topetope o vae o Pesi i lea taimi, aua o lea ua i ai nei Lenina i totonu o lona potu. Na ona tapuni mai lava o le faitoto’a, fesili loa ma Lenina i a Loleni, po’o a la mea na fai ma le tama’ita’i tausima’i, e le o se mea lea e tatau ona faia e ia, a’o lea e taoto Keisi.

Fai mai na pau le tali na tu’u ane e Loleni ia Lenina i lea taimi o le tali e fa’apea, “Se na tiga o’u tauau, o lea na sau ai loa Pesi ua fofo, e a, e i ai se leaga o le na mea.” Na avea upu ia na tautala ai Lenina ia Loleni ma ala na manatua vave a e Keisi i lea taimi le mea na tupu i lona tama.

Ona o le tama o Keisi e mauoloa, e fai ana pisinisi, o fale e mautotogi ai tagata ma le tele o isi mea ua maua e le tama o Keisi, o lea na toe  manatua ai lava e le teine le tasi aso na o la talatalanoa ai ma lona tama, a’o le i maliu, o le taimi fo’i lea na o le sefuluono tausaga o Keisi, ae sefululua  tausaga o Lulu.

O le aso lea, fai mai na finau ai Keisi ma lona tama, ona o se tala ua tusia i totonu o nusipepa e fa’atatau i le tama o Keisi. Na finua Keisi i lona tama e tatau ona molia i le tulafaono ia nusipepa ia ua faia fa’amatalaga e uiga i a te ia. Na tali le tama o Keisi, e tu’u ai pea faitalia lava latou, po’o a lava a latou tala e fai, e le o popole i ai ia. E lea fo’i se fa’amaoniga o tala o lo’o latou faia, na te le i faia se solitulafaono e pei ona o latou tusia.

E faia pea…