Vaega: 50

Fa’atalofa atu i lou alafa’i mai i le manuia i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E i ai le fa’amoemoe, o lo’o maua pea e le atunu’u le soifua laulelei i lenei aso. Ae alo maia, o le a toe fa’aauau atu la tatou tala, ia manuia lava le alo atu o le atunu’u i fa’amoemoega o lenei aso.

Fai mai ua na o le tilotilo ane o Lulu i le ali’i o Ieremia, ae na alu atu ma le isi ana fesili, mata e mafai ona toe malosi mai Keisi. Na tali le ali’i o ieremia, e faigata ona fai sana tala i lea itu, o nisi o ma’i ua koma e mafai, a’o nisi ua le mafai, ae afai e umi ona koma, o le a faigata fo’i ona tupu ni suiga lelei, ae ‘aua ne i fa’atuatua iti, atonu lava e mafai ona toe manuia mai Keisi.

Na toe liliu nei Ieremia ma toe fa’asolosolo le milimili o lima o Keisi, ae na fa’ate’ia Ieremia, i le fa’apea ane o Lulu, “E mafai ona ou tago e fa’ata’ita’i i lima o Keisi.” Na tali Ieremia e mafai, ae ia faifai lemu, ia fa’asolosolo ta’itasi ona tamatama’i lima. Na fa’apea lava ona fai, ua a’apa atu nei Lulu ma milimili lima o lona uso ma fa’asolosolo ae fa’asinosino ane e le ali’i o Ieremia.

Na fa’ate’ia Lulu i le fa’apea ane o Ieremia, “Lulu, o lo’o mo’omia e lou uso oe i le taimi lenei, afai e te sau e asi mai ia, o mea ia e te tago e fai, atonu lava e mafai ai ona toe malosi mai lou uso.”

Fai mai na fa’apea ane le tali a Lulu, “Ieremia, o a’u o le tagata mulimuli lava e mo’omia e Keisi. Na toe fesili Ieremia, pe aisea, ae na tali Lulu, pe na te iloa le fa’aupuga, o le mamoe uliuli o le aiga, a’o Keisi, e leai se mea e leaga ai Keisi, e fa’amoemoe lava lo la tama ia Keisi i mea uma.

Fai mai i le taimi na milimili ai e Lulu le lima o Keisi, na lagona lelei lava e Keisi le pa’i ane o lima o lona uso i a te ia, O lea la e tau mafaufau Keisi, pe moni lea tulaga, pe ua na o sana miti o lo’o fai.

Na fai le tala a Lulu ma toe tu’u ane le lima o Keisi i le ali’’i foma’i o Ieremia. Ae fai mai le tala, i le taimi atoa na milimili ai e Lulu le lima o lona uso, na lagona lelei e Keisi le pa’u ane o lima o Lulu i a te ia. O lea na fa’apea ai mafaufauga o Keisi, “Oi e leai, e le o sa’u miti, ae o se mea moni lea ua tupu i a te a’u, ua mafai ona ou lagona le pa’i mai o lo’u uso i a te a’u.”

O le itu la lea e le o iloa lava e se tagata, e o’o fo’i i le fa’alogo a Keisi  ma lona lagonaina o tala o lo’o fai ma leo o tagata, e leai se tasi o ona iloaina lea tulaga. O lona uiga, ua amata ona toe fo’i Keisi i lona malosi sa i ai, a’o le i tupu le fa’alavelave.

E faia pea…