Ads by Google Ads by Google

Olaga Le Tumau

Vaega: 42

 

E i ai pea le fa’amoemoe o lo’o maua pea le soifua laulelei e le mamalu o le atunu’u, ae maise o tama ma tina matutua, ia o tatou manatua pea, e leai se mea tatou te mafaia, se i vagana ua o tatou fa’atasi ma le Ali’i, o ia e manuia ai a tatou taumafaiga uma. Tatou fa’afo’i la’ia o le vi’iga ma le fa’amanu i Lana Afio, i aso uma o lo tatou ola.

 

Ae alo maia, o le a toe fa’aauau atu la tatou tala, ae ia manuia lou alo atu i faiva ma tiute o lenei aso. Na muta mai la tatou tala, ina ua uma le talatalanoaga a Loleni le to’alua o Keisi ma le tama’ita’i tausima’i o Pesi, a’o lea la ua nofonofo nei na o Loleni ma lona to’alua o Keisi i totonu o le potu o lo’o taoto ai Keisi.

 

A’o talatalanoa ane Loleni i lona to’alua o Keisi, sa lagona lava e le fafine le fa’anoanoa o lona loto, ina ua fa’alogo atu i le talanoa ane a lona to’alua. Ua lagona ai fo’i e Keisi, atonu ua avea o ia ma avega mamafa i a Loleni, ona o le tulaga ua o’o nei i ai. Na avea mafaufauga ia o Keisi ma ala na maligi ifo ai ona loimata.

 

Na toe fa’aauau le tala a Loleni, “Keisi, nofo maia i luga, e te manatua le tama o Tedi, lea na ma o atu i le isi aso, na fai mai i a te a’u ma te o ma te tapolo, ia ae ou te le iloa pe talafeagai pe leai, ona ua le lelei lava se mea e fai, talu ona tupu le fa’alavelave i a te oe, ae se i e malosi lelei lava, ona tatou o lea tatou te ta’aalo fa’atasi. Keisi, ua ou misia lava oe.”

 

E le o lagona ane e Loleni le tala a Keisi, “Loleni, ua ou misia fo’i oe, si o’u to’alua e pele i lo’u loto.” Na fa’alogoina e Keisi le tu’itu’i mai o le faitoto’a, ma e fa’alogo atu o fa’apea le tala a Loleni i le tagata lea ua ulufale mai i totonu, “Oi, ou te le iloa o lo’o e tu mai i le faitoto’a.” Na sau le tali a Pesi,“Ou te le mana’o e ma’alili lau kofe.”

 

Na fa’apea mafaufauga o Keisi a’o ta’oto’oto pea i lona nofoaga pogisa, “O le mea lea ua ou va’ai atu i ai, ua o’o lava i taimi paninoa la te talatalanoa ai ma lona to’alua o Loleni, ua le toe i ai, ona o lea fo’i ua fa’alavelave ane Pesi i a la’ua. Fai mai na tagi ai le loto o Keisi i lea taimi ma fa’apea ona mafaufauga, “Loleni, o le a ou taumafai ia ou toe maua le malosi, ina ia ta mafuta ai pea i aso uma o le olaga.”

 

E le i umi ae ulufale loa Lulu, le uso la’ititi o Keisi, e o’o ane Lulu o lo’o i ai Loleni i totonu o le potu o lona uso. E le i toe fa’atali Lulu na oso ane loa ma fai ava’uga ma Loleni, “Loleni, ou te le talitonu ua fai lau tala i le ali’i Leoleo o Keneti, ua ou taumafai e fasioti lo’u uso.” Na tali Loleni, “Lulu, e leai sa’u tala fa’apena na fai i le ali’i Leoleo.”

 

“Loleni, ou te fo’i mai i la’u malaga ua tumu atu luma o lo’u fale i Leoleo, e foliga mai o a’u o Osama bin Laden, ma tu’ua’i mai o a’u na ou taumafai e fasioti lo’u uso, Lo’u Uso!”

 

Na tali Loleni, “Lulu, malie lou loto.” Na toe oso ane Lulu, “Loleni, e fa’afefea ona e fai mai o a’u, fa’afefea ona e tu’ua’i mai o a’u.” Na toe tali Loleni, “Lulu, e leai sa’u tala fa’apena na faia i ali’i Leoleo.” Na fa’aauau pea finauga nei i le va o le to’alua o Keisi ma lona uso o Lulu.

 

E faia pea…