Vaega: 152

Fa’afeiloa’i atu i le atunu’u i lenei taeao fou, taeao toto’a i le alofa ma le agalelei o le Atua Soifua, e i ai pea le fa’amoemoe o lo’o aoina le masina i le soifua laulelei o le atunu’u i lenei aso fou. Ae alo maia, o le a toe fa’aauau atu la tatou tala mo lenei aso.

Ua fiu a la Keisi e taumafai ane, ae ua sao lelei mea tau fa’apili a Loleni. Ua amata le fiafia a Loleni ma Lulu, ua na o la’ua lava. O le isi itu o le potu o Keisi, o lo’o i ai se fa’apaologa matagofie lava, ma o lo’o ola ai la’au na toto lava e Keisi a’o le i lavea. O le fa’apaologa la lea, ua fai ai nei le fiafia a Loleni ma Lulu.

A’o fa’agasolo le inuina o le uaina lanu mu mu a Lulu ma Loleni, o le taimi lea o lo’o fa’ataitaio mai lava Keisi mai totonu o lona nofoaga pogisa. “Lulu, ta inoino e, ua e le kea mai i sou uso, ae ua e alo e sua le aulapa ta’i ma le aulapa uta, ia fa’atalitali ai oe e.”

Ina ua fa’agasolo le fiafia lea, na fesilisili ai lava Loleni ia Lulu, e uiga i lana uo o Sione, le tama lea na tuli e Lulu ua le fiafia i ai. Ua fa’asolosolo itula a’o fa’agasolo fo’i le fiafia a Lulu ma Loleni. Ae ina ua toe savali ane Lulu i le moega o lona uso, na alu ane ai fo’i ma Loleni.

Na fa’amatala e Loleni ia Lulu ia uiga o Keisi na fa’aali ina ua alu ane le tama’ita’i tausima’i e va’ai ia. Ae na fa’apea mafaufauga o Loleni pe tatau ea ona vala’au i le falema’i e alu ane se foma’i se i va’ai ia Keisi, pe aisea ua fa’apea ai.

Na toe fesili ane i ai Lulu, pe na vala’au e su’e se foma’i e alu ane e va’ai Keisi, ae tali Loleni, ua fiu e vili le telefoni a le falema’i, o le isi itu, o le Aso Sa le aso lea, o lona uiga ua o uma foma’i i o latou aiga.

Fai mai na toe fa’apea ane Loleni, “Lulu, aisea na e nanaina ai i a te a’u le tulaga lea ua o’o i ai Keisi, sa tatau lava ona e ta’u maia i a te a’u, ae tali Lulu, ua  le iloa e ia le mea e fai i le na taimi.

Fai mai ua toe alu Loleni e toe avane le isi fagu uaina, fai mai ina ua alu ‘ese Loleni mai totonu o le potu, na a’apa ane nei Keisi ma u’u le lima o Lulu. Na me’i ‘ese Lulu, ae na fa’apea ane lana tala i lona uso, “Keisi, ua e fa’afefe mai i a te a’u, e i ai se mea o e mana’o ai.”

E faia pea…