Vaega: 149

Ua o tatou va’aia le susulu matagofie mai o le la, ua o tatou fa’alogoina fo’i le tausagi mai o manulele, ona o tatou iloa ai lea, le alofa ma le agalelei o le Atua mo i tatou e le mavae i aso uma o lou soifua ma si o’u nei ola. Ae alo maia o le a toe fa’aauau atu la tatou tala mo lenei aso.

Na toe fa’ataitaio mai fo’i Keisi mai totonu o lona nofoaga pogisa, “O Loleni lea e mana’o e fasioti a’u, ma o oe le isi tagata e soso’o mai ai.” Ae paga lea, ua leai se mea na te mafaia, ua le mafai ona toe fa’aleo se upu, ae ua na o le pupula atu nei i lona uso ma ona fa’alogona mafatia.

“O usu se pese a Keisi?” O le fesili ane lea a Lola, le tama a Lulu ma savali ane i talane o le moega o Keisi. Na tuli nei e Lulu lana tama e toe alu i le umukuka e tusi se ata mo Keisi, ae tali ane le teineititi, ua fiu e su’e vali e le iloa po’o fea o i ai.

“Ou te mana’o e usu mai e Keisi se pese mo a’u, se i o’u fa’alogologo ai, pe manaia le leo o Keisi.” Na tali ane i ai lona tina, e leai, e le mafai e Keisi ona usu se pese, ae na toe fa’apea ane Lola i lona tina, na fa’alogo mai o uso le pese a Keisi.

“Na e vala’au atu a Lulu?” O le fesili lea a Loleni. Ae na fa’ate’ia Lulu ma Keisi ina ua fa’apea ane le teineititi o Lola, “Na usu le pese a Keisi.” Ae na tatao ane e Lulu, “Lola, e le i pese se Keisi.

Na toe fesili ane Loleni, “Ae o le a tonu le mea na ia faia? E fesili ane  Loleni ma savali ane i talane o le moega o Keisi, ma pupula to’a ane i ai. Na tali Lulu, “E leai se mea, ae foliga mai sa tau mavana.”

Na tilotilo ane nei Loleni ia Lulu, ma ia iloa ai o le pupula a Lulu lea e pupula ane ai i lona uso, o le pupula e iloa ai, ua iloa e Keisi tagata ma mea uma o lo’o tutupu. Ua oso ai le masalosalo o le loto o Loleni, ma na  mafua ai loa ona fesili ia Lulu, po’o le a le mea e pupula ai fa’apea ia Keisi.

Fai mai, o gaioiga lea ua fai nei e Loleni, o gaioiga a le tagata ua tau maua lana ova, aua ua a’apa atu nei ua se’i ‘ese mai le ata a Lola lea na tautau i luga tonu lava o le moega o Keisi, ma fa’alala solo i luma o foliga o Keisi, “E te iloa le ata lea, a Keisi, e te iloa le ata lea.”

E faia pea…