Vaega: 138

Taeao manuia i lou alafa’i mai i fanuga lelei o lenei aso fou, o se aso e fa’aopoopo i lou soifua, e ao ai ona o tatou sunu’i lapalapa o Malo ma fa’afo’i le vi’iga i le Atua, ona o Ana fa’amanuiaga lea o lo’o tatou oaoa ai Faleseu ma o tatou sa’a ai i ma’a o malie.

Talofa ia Keisi, e le o iloa ane lava e se tasi mafatiaga ua feagai nei ma ia, ae ui i lea, sa le i tu’u mamaina i le loto o Keisi, sa finau atu pea ma lona loto tele, ia mafai ona ia fa’atino le mea ua ia mana’o e fai, ia mafai ona alu ‘ese mai luga o le moega sa ta’oto ai i masina e lua talu ona te’a ‘ese mai le falema’i.

Ua feliuliua’i solo nei lona tino i luga o le moega, ua mafai, sa toe liliu i le isi itu, ua mafai, ae sa lagona le tiga o ona itu tino uma, ona o le umi o taoto i luga o le moega. Na liliu nei i le isi itu ma ona iloa atu ai le TV, o le laulau fa’apea ma teu fugala’au matagofie o lo’o tu mai ai. O le isi itu, na iloa atu ai le uati o lo’o mumu mai, o le taimi, ua sefululima minute e te’a ai le sefulutasi i le taeao o le Aso Sa.

Na fa’apea ona manatu, o lo’o tele lava le taimi e gaioi ai ma fa’atino ai mea o lo’o ia finau ina ia fai. Ua toe fa’agaioi ona tamatama’i lima, ma taumafai ia mafai ona alu i le potu o ona matua lea o lo’o i ai le telefoni. A’o faia gaoioiga ia a Keisi, sa manatua vave i lea taimi i lona mafaufua, le mea o lo’o tu ai le laulau ma le telefoni i totonu o le potu a ona matua. O le potu lea, e le i fa’aaoga lava e se tagata, ae se i vagana ai lona to’alua le popoi o Loleni, lea ua na fa’aaogaina.

O le isi itu na manatua e Keisi, pe o le mea o i ai lava le fana a lona tina, lea na tau pule ai i lona ola a’o ola lona tama, i le pusa tu o lo’o i talane o le moega a ona matua. Afai o i ai, o lona uiga, e le i iloa e Loleni, ae afai ua leai, o lona uiga ua ave’ese e Loleni.

Na toe tilotilo nei Keisi i le uati, ma lona va’ai atu ua limasefululua minute e te’a ai le sefulutasi. Na oso a’e nei ona mafaufau, ua vave le taimi e alu ane ai Niki, ae e leai lava se mea o mafai ona ia faia.

E faia pea…