Vaega:1

Ua tala mai e le lagi le mamalu o le Atua Silisili ‘Ese, ua fa’aalia fo’i e le vanimonimo Lona matagofie, e pei ona i ai lenei aso fou ua o tatou aulia mai i Lona alofa ma Lona agalelei. E ao ai ona o tatou fa’apea ifo, “Le Atua, o Oe o le Mataisau o mea uma lava, a’o o matou ua na o ni auauna fa’atauva’a lava, afio mai ma nofo tupu i o matou loto i lenei aso, ina ia o matou lagona le loto fa’amagalo, le alofa ma le loto maualalo, a’o le vi’iga e fo’i atu lava i Lau Afio e fa’avavau, fa’avavau lava. Amene

Ou te fa’atalofa atu ma fa’afeiloa’i atu i le mamalu o le atunu’u i lenei taeao fou, taeao manino, taeao toto’a, e i ai pea  le fa’amoemoe, o lo’o maualuga le aoina o le masina i lou soifua laulelei, a’o e alo faiva i tiute ma galuega. O la tatou tala fou ua fa’aigoaina “Olaga Le Tumau” o le a e faitau ai i le olaga o le tama’ita’i o Keisi Masela ma lona to’alua o Loleni.

O se ulugali’i e na o le lua tausaga talu ona fa’aipoipo ma avea o se ulugali’i, ae tupu loa ma le fa’alavelave ia Keisi Masela, ma na motusia ai le mafutaga mafana ma le alofa i le va o lenei ulugali’i. Ae o le mea e sili ona faigata, ona e i ai le tasi e alofa fa’amaoni, a’o le isi, e alofa ua na o upu, ae faufau mai tua mea leaga, e manu’alia ai le loto ma le mafaufau o le isi.

O se tala fo’i o le a e iloa ai, ua avea le tele o tupe ma le tamaoaiga, ma ala ua galo ai le alofa moni. Fai mai, o se ulugali’i e va’aia pea e a la uo o la uiga fiafia ma le fealofani, peita’i, o lo’o i ai le mea o lo’o tupu i le ulugali’i lenei, ma e leai se tasi na te iloa, ae ua na o le to’atasi o i la’ua o lo’o iloaina. E moni ai le upu a le atunu’u,“E manino luga, ae vilivili lalo, ia po’o le isi fo’i upu a si o tatou atunu’u, “E manatua Pule, ae le manatua Fa’alaeo.”

O le ulugali’i lenei o Keisi ma Loleni e nonofo i totonuo le a’ai o Philedalphia. O le galuega a Loleni, o ia o se Loia, a’o Keisi, o lo’o galue e fa’amautu lana lava pisinisi. O Keisi Masela, e milionea ona matua, a’o le i maliu lo la tama, ua uma ona saini ma fa’amaumau uma e le tamaloa ia tupe ma mea uma, ma o lo’o alu i luga o le igoa o Keisi.

E to’atasi le uso o Keisi, o le teine e igoa i a Lulu, a’o Keisi e matua, atonu o le mafua’aga lea na tu’u ai e lo la tama mea uma i a Keisi, ona o ia e matua. E tele fo’i nisi fuafuaga sa taumafai Keisi e fai mo lona uso la’ititi o Lulu, peita’i, o Lulu, sa alu i le aukegi fo’i nei e inu ‘ava malosi ma latou fa’aaogaina fo’i fuala’au fa’asaina.

O le alofa, e tele lava ona uiga, ma ou te talitonu, ua silafia e le atunu’u ae ou te le tau seluselu atu, e leai, aua ua uma ona fa’amatu’u mai e le Atua i o tatou loto le ituaiga alofa e tatau ona o tatou alolofa atu ai i o tatou uso a tagata.

Ae ua ou fa’alogo fo’i i le isi fa’aupuga ma tala sua a le atunu’u, fai mai, “O le alofa e pipilo”, ia ta’ilo po’o le a le uiga o lea fa’aupuga, ae a tatou manatua le alofa e le mavae o le Atua mo i tatou, o i’ina tatou te iloa ai le uiga tonu o le upu “Alofa”.

Tatou feiloa’i i le aso a taeao mo le amataina o la tatou tala fou “Olaga Le Tumau”, ae ia manuia lava le alo atu o le atunu’u, i faiva ma tiute o lenei aso.

E faia pea…