Na taua e le afioga i le ali’i fa’amasino sili ia Michael Kruse le ofo o le fa’amasinoga i fefa’atauaiga o lo o faia i le va o pagota i totonu o le toese i Tafuna a’o taofia ai i latou.

O se vaega lea o le saunoaga a le alii faamasino i le taimi na lau ai le faasalaga a le alii o Keith Talosaga, na ta’usala i le moliaga o le faaoolima i le tulaga tolu, e mafua mai ina ua ia fa’aoolima i se ali’i pagota sa musu e totogi atu le tupe mo fefaatauaiga sa faia i totonu o le falepuipui.

Na fesili Kruse ia Talosaga pe sa i ai se taimi na aafia ai o ia i fefaatauaiga o fualaau faasaina sa faia i totonu o le toese, na tali le ua molia e leai.

“Ae faafefea le aoina o tupe e maua mai i fefaatauaiga o sikaleti i totonu o le toese, na e aafia ai,?” o le isi fesili lea a Kruse ia Talosaga, lea na tali ai le ua molia, “ioe.”

“O ai sa faia lena galuega o le fefaataua’i o sikaleti,?” o le fesili lea a Kruse, ae na tali Talosaga, “O Sam Tupuola.”

Na fesili Kruse i le loia a le malo ia Tony Graf, pe na tupu le fefaatauaiga o sikaleti lea na mafua ai ona molia Talosaga o i ai pea le pule tuai o le toese i Tafuna, pe tupu ua fai le suiga e pei ona i ai nei, na tali Graf, o se vai taimi lava o le pule tuai na tulai mai ai le mataupu lea, e lei umi ae fai loa suiga e pei ona i ai nei.

Na toe fesili Kruse ia Talosaga po o faaauau pea ona faia e Tupuola fefaatauaiga o sikaleti i totonu o le toese, na tali le ua molia “ioe.”

Saunoa le alii faamasino sili e faapea, e fai lava si mata’utia o mea o lo o tutupu mai i le toese, e ao foi i le malo ona silasila toto’a i ai ina ia mautinoa e fai i ai se gaioiga.

O vevesi i le va o Talosaga ma le alii pagota na aafia na tulai mai ina ua alu atu Talosaga e ao mai tupe o sikaleti a Tupuola sa aitalafu ai le alii o Togitogi, peitai sa fai i ai Togitogi e leai se tupe o i ai.

O le isi taimi ina ua maua e Talosaga ia Togitogi i totonu o le toese, sa ia faaoolima ai loa ma manu’a ai le autafa o le taliga o le ali’i na a’afia.

E tasi le tausaga na manatu le faamasinoga e faasala ai Talosaga, peitai ua faamalumalu ae ua nofovaavaaia o ia mo le 2 tausaga i lalo o poloaiga a le faamasinoga.

O ni isi o ia poloaiga e aofia ai lona auai i ni aoaoga e fesoasoani ai i le ita, totogi le salatupe e $500, ma aua nei ona toe taumafai e faafesootai le alii na aafia o Togitogi.

O Tupu o lo o tuli ona fa’asala fa’afalepuipui talu mai le tausaga na te’a nei, ina ua faamaonia e le faamasinoga le moliaga o lona umia faasolitulafono o mariuana ma le faamoemoe e tulei atu i isi tagata.