“O AI NA TE TOTOGIINA AITALAFU A LE MALO I LE ASPA?”      

E na o le ofo faamaga (tulou) ma le lulu o le ulu na faia e ni isi o le atunuu, ina ua latou faalogologo ao faamanino e le taitaifono o le Komiti Faafoe a le Faalapotopotoga o le Eletise ma le Suavai (ASPA) le tulaga sa’o o lo o i ai le aitalafu a le malo i le ASPA.

Na taua e Rev. Asaua Fuimaono i luga o le KVZKTV i sa latou faatalatalanoaga sa faia ai a’o lumana’i le aso o le palota na te’a nei, o le aitalafu sa’o lava a le malo o lo o i ai i le ASPA, e le $10 miliona e pei ona taua, ae ua $27 miliona ma ona tupu.

O le taia ai o le faafofoga a le atunuu i lenei ripoti mai le ASPA, na taua ai e ni isi i le Samoa News ina ua fesiligia i latou, lo latou le talitonu i le tulaga ua oo i ai aitalafu a le malo a’o lea ua faitau vaiaso o lo o totoe ona maea lea o le nofoaiga o lo o i ai nei.

“O ai la o le a ia totogiina lenei aitalafu tele o lea o le a uma le faiga malo o lo o i ai nei,?” o le fesili le fiafia lea a se tasi o tina faiaoga e le’i finagalo e faailoa lona suafa.

“Afai o lo o fuafua le kovana e tuu ai pea faapea aitalafu a le malo e sau le isi kovana fou e faamama, oka, o lona uiga o le avega ma la faafafa lea foi o le a faaee mai i tauau o le atunuu pe afai ae tulai mai se isi faigamalo fou,” o atugaluga ia o lenei tina na faailoa i le Samoa News.

Ae na taua e se alii o Justin Apelu, o lo o aoga i le Kolisi Tuufaatasi i le matata o le faa foma’i, afai o le tulaga lea o lo o i ai le aitalafu a le malo i le ASPA, lona uiga o lo o i ai foi isi aitalafu a le malo i ni isi vaega, ae le o iloa e le atunuu.

“Afai e faaputu lenei aitalafu, e oo mai le nofoaiga fou ua le iloa pe faafefea ona totogi,” o le tala ata lea a Apelu.

O atugaluga e pei ona taua e ni isi na fesiligia e le Samoa News, o le auala o le a sauni le nofoaiga fou e saili ai tupe e totogi ai lenei aitalafu tele.

“A faapea mai e sii lafoga i oloa mai fafo, totogi o tagata faigaluega poo isi lava foi ituaiga lafoga, ou te faapea atu ua le fetaui, ae a faapea mai o le a taumafai lava le malo e saili ni tupe e totogi ai aitalafu a le nofoaiga lenei, o se fuafuaga poto lena ma atamai,” o le manatu lea a le tama o Asofa Neueli, o se alii ua 22 tausaga talu ona galue mo le kamupani a le Star Kist Samoa.

Ae o le finagalo o Jasmine Leatioo, o se tina fai pisinisi i le atunuu e faapea, e tatau lava ona totogi e le malo ana pili i le ASPA, e pei foi  ona totogi e tagata taitoatasi ma pisinisi a latou pili i le ASPA.

O lona finagalo, ua tatau ona faaaoga e ofisa o le malo le tautua a le ASPA lea e taua o le ‘cash power’, ina ia mafai ai ona faatonutonu le faaaogaina o le eletise i totonu o ofisa.

Ae fai mai le isi tagata palota, na pau le auala e mafai ai ona totogi e le malo la latou aitalafu i le ASPA, o le ave i le faamasinoga.

Na taua e se tasi o paga o lo o tauva mo le tofi kovana ma le lutena kovana i nisi o a laua faasalalauga faatosina, afai ae tofia i laua e taitaia le malo, o le isi lea auala ua la fuafua e fai, o le faapipii lea o cash power i ofisa uma o le malo, ina ia faatonutonu ai le faaaogaina o le eletise, o le taimi lava e uma ai le unite o lo o i totonu o le cash power lea, o le taimi foi lena e pe ai le ofisa, e le toe maua ai se aitalafu a le malo.