Ads by Google Ads by Google

O SE TA'ALOGA MATAGOFIE TELE: I LE VA MOSI'ULA MA LE PISISAMI

I se ta'aloga matagofie na tausinio uma ai o 'au e lua mai i afio’aga Masefau ma Vaitogi i tapua’iga i o laua tamali'i fa'apea le 'au fai upu i totonu o nei afio’aga, ma le mamalu o lea nu'u ma lea nu'u ae maise le talimau mai o Fa'afeagaiga e tu'i mai i maota i alalafaga uma e lua.

E fai atu o nei afio’aga ua masani ma ua leva ona tupulaga i lenei fa’agatama o le kirikiti fa'a-Samoa, e le mafai lava ona o fua se latou 'au si'i i se ta'aloga, ae aunoa ma se tapua’iga.

Lea la ua tali fa'aaliali mai fo'i tama ta'aalo i a latou tapua’iga i se ta'aloga e manaia ma lelei, na alo atu i ai tama fanau a nei alalafaga.

Sa muamua ona tata le 'au a le Mosi'ula, ma sa manaia i le alo atu i le pate, ae fai fo'i si fa'afeufeu mai o le talitua’a a le Pisisami latou ia.

Po'o o le a lava le lelei o ta a se 'au a le Mosi'ula ae lelei foi le faiga a le Pisisami latou ia, i le vave sui mai o latou fa'ate'a, pe a tau taia i se tama ta, e avea lena ma mea e mate gata ai e le tama ta gaioiga, po'o masau lea o le a sau ai lea te'a.

E le taumate le mafaufauga a le tama ta i lena taimi, 'talosia lava ae masau mai, aua o le vaisu lava lena o le te'a ae masau'. A le o lena, e fa'apea i lona mafaufau, 'lemu, ai e leai e masau, e lemu mai nei, masau mai, oi e leai e masani ona lemu…' e o'o mai le te'a o la e le'i mautu lava sona loto.

O le mea e maua, e o'o mai lava te'a patatu i le 'olo, o lea e tau fai finau lava le 'masau ma le lemu' fa'ato'a iloa lava ina ua fano mai o le latou nu'u, 'aua la, makua'i e ka kele a, a'e ka mai i o i le kakou malae e leiloloa uma ai polo.'

A leai lena e pe loa, sau punou mai lava i lalo i le malae kirikiti fa'atoa ea lava i luga pe a fono atu i ai se i si tamaititi, pe na’o le 5 tausaga le matua, 'Iiiiiisah…' tilotilo atu loa i ai, 'Aumai se u fa'amolemole.'

Na tata le 'au a le Mosi'ula, maua lelei le 68 o 'ai ae atoa fo'i o latou pe e 19, ona o le lelei talitua’a i le taimi mulimuli o le tataga a le Mosi'ula, na maua ai le 68 o 'ai.

Ana lelei mai totonu o le malae i a’u tama na i ai, semanu e le maua le 60 'ai a le Mosi'ula.

Ia o le faiga lava lea o lenei ta'aloga, e moni lava o le polo e lapotopoto, e fa’amata e faigofie i le tatou va’ai, ae leaga o le polo e le maualuga, lona uiga la e ta'avili fo'i.

Le itua’iga polo la na e te fa'atamatama loa i ai i lau sapo, o lona uiga e fa'amataga ‘oe e le polo lena.

I le tamua e le'i manuia le latou tataga, i le Afioga i le Patele, Asalemo fa'apea lana soa, o Loia, na o le lua 'ai na maua i le sausaunoaga a Patele.

Fa'ato'a maua 'ai ina ua uma le pe lona fa, ina ua tu mai si tama o Larry lea na ona mauaina 'ai e 11, soso'o mai ai ma Tommy lea fo'i na maua ona 'ai e 14.

Ia sau Duane ona maua le pe lona fitu, e feoloolo ma lana taumafaiga, e  maua ona 'ai e 8, soso'o mai i ai ma Talofa, e 6 ona 'ai ia ma si tama o Silllo lea na mauaina 'ai e 4. Ia ma si tama o Vaitogi lea na maua ona 'ai e 8.

E to’atele le 'au fuamoa, ae ou te musu e ta'u ne’i fai fo'i ma e pisa ai, ae sili lena e iloa na’o oe le tou tapuaiga.

E tusa e 51 'ai ia na maua i nai tama ia e toa 7, ao le toatele lava e tai-1 tai-2 po'o tai-3 ai na maua mai ai, ia e lelei fo'i fa'ate'a o le isi 'au ia, e tau su'e atu lava le pa’uuga e pe ai le isi tagata ta.

Na maua lelei o latou 'ai e 68 ae mae’a loa ma le tataga o le latou 'au, ae sauni e talitua’a ae alo le Pisisami i le latou pate.

E fa'aletonu fo'i le tamua a le Pisisami latou ia, i laua tula'i mai fo'i i le pate, fa'atoa maua lava ni 'ai ina ua ta Ma'ape lea na 7 ona 'ai, fa'asolosolo atu ia Marcus, lea na taofia pe.

Na maua 'ai e 11 a Marcus, toe soso'o atu ai ma Angelo a le fa'aolatotoga lea a le Pisisami, lea maua ona 'ai e 21, ae sa maua fo'i 'ai e 4 a si tama o Logomau i le sefulu lea ma muamua.

Tatou ta'aloga la ua toeititi lava a fa'avaivai le 'au a le 'Mosi', ina ua fitu pe, ae ua maua 'ai 45, lona uiga toe 21 'aii ae toe 12 pe la e i lalo.

Ma le vaai tau o le 'au matamata, o le mea malosi lava le toe ola mai o le talitua’a ma fa'ate'a a le 'Mosi', na o le misi lava o le ta, 'olo, mane'e i luga e fa'apea lava e iloa se mea e le polo pe'a sapo nei e le talitua-a.

Ia o na fai mai lava lea o le finauga i le toe 3 pe ae toe 6 'ai la e tuli e le Pisi.

Maua le pe totoe ai le toe lua pe, ae o le mea fo'i ua toe 4 'ai, toe maua le isi pe totoe ai le masaga ma le la tama, ae toe 2 'ai la e totoe.

Na maua le pe toe loa o le masaga ma lua 'ai, na ta i tai i le sami, ma tutusa loa le ta'aloga i le 68 'ai, ua matua susu lava vae a tama ta, ao o le mea latou ia, e pei o mata o 'aeto' mata a le talitua-a.

Ia ona te'a maii lava o le te'a mulimuli lena e le fa'ate'a, misi le ta ua fa'apea ai ua i le sami polo, ma le fa'alogo atu ua patatu mai i le 'olo.

O se ta'aloga manaia ia i le maimoa, e fai o 'au lelei uma nei i lenei tausaga, ae mau pea o le fa'atuatua o le isi tama ta'alo i le isi tama ta'alo.

Ua toeititi ona tatou fa'amavae atu lea i le liki kirikiti, ae lago lona 'Aafia i si ona vao', e momoli atu le fa'afetai o le tagata faitau Nusipepa i le tatou kamupani lea e fai lava ma a tatou paaga lelei, i le auina atu lea o tala i le kirikiti i lea tausaga ma lea tausaga.

E maua lou fa'amanuiga e aumai e le Atua, i lenei auaunaga mo le atunu'u i tausaga uma, fa'amalo atu i le Afioaga i le Faipule ia Toatasi Archie Solia'i  ma lou 'au faigaluega.

Le kamupani ua lauiloa i le Teritori nei, GHC Reid ma le pia o Samoa, o le Vailima.