To’alua ua molia i le talepe fale ma le gaoi

E to’afitu na su’esu’eina e leoleo i moliaga o le talepeina ma le gaoia o ni mea totino mai i totonu o le ofisa JROTC a le aoga maualuga a Leone, i le masina o Aokuso, ae to’alua ua loka ma molia i le tulafono, ae o leisi toalima ua toe tu’usa’oloto i latou.

E le o mafai ona faalauiloa igoa o alii e toalua ua tuuaia i lenei mataupu, ona o puipuiga o le tulafono ia i latou o fanau laiti.

E silia ma le masina o faia suesuega a leoleo i lenei mataupu, ae o le fesoasoani a matua ma aiga o i laua ua molia nei, na faafaigofie ai galuega a leoleo, ina ua momoli mai e le tina o leisi toalua, lana tama i le ofisa leoleo, ma faailoa i ai, o lana tama lea sa a’afia i lea faalavelave.

Na taua e le tina i leoleo e faapea, ina ua ia vaaia ni sipika i totonu o le potu a lana tama, sa ia fesili i lana tama poo fea e aumai ai ana sipika, ae na tali lana tama o ana lava sipika.

Fai mai le tina i leoleo, sa masalosalo lona loto ina ua na vaaia ni sipika ma mitiafu fou i totonu o le potu a lana tama, ae na te le iloa po o fea na aumai ai nei mea, ma na atili ona masalosalo le tina i lana tama, ina ua ia tau i se ato o lo o i ai ni mitiafu, mea pueata, o meaaoga atoa ai ma ni pulou pesipolo.

Na faailoa e le tina i leoleo, ina ua ia faalogo i le tala sa osofai ma talepe e ni tagata le Ofisa o le Aoga i Leone, sa tau lona mafaufau i mea na ia vaai ai i lo latou fale, ona manatu lea o le a toe alu e faafoi, peitai sa oso ane le isi ona manatu, e tatau ona vaai alofa i si ana tama ina ne’i aafia atu ai o ia, mulimuli ane sa ia manatu ai, o le a alu e fai le mea moni, o lea na ia logo ai loa leoleo ma faailoa i ai o lana tama o lo o aafia i lenei faalavelave.

O ni isi o mea sa gaoia na toe faafoi i leoleo, ma ua taofia nei i le potu e teu ai mea molimau a le malo e faatali tai le taimi o le faamasinoga.

Na taua e le isi o le toalua ua taofia nei e leoleo e faapea, i le po o le Aso Toonai, 20 o Aokuso, sa la o ai ma le isi ona tausoga tamaitai e momoli lo la tina matua i le Bingo, ae  valaau atu le isi a la uo ia te i laua ma fai atu a uma ona momoli le olomatua i le bingo, ona latou o lea e osofai le Ofisa o le JROTC a Leone.

Ina ua agai atu le isi alii ua molia o lana uo ma lona tausoga i le nofoaga o lo o i ai le Ofisa, sa gagau e lana uo le vae o se nofoa, ma faaaoga e talepe ai le faitotoa o le Ofisa ma maua ai le avanoa latou te ulufale ai i totonu.

Na taua e le alii lea i leoleo, na faaleaga e lana uo le tele o meatotino i totonu o le Ofisa, e pei o le faaaoga o spray e tusi solo ai le upu “gang” i luga o kesi, laulau ma le laupapa, atoa ai foi ma mitiafu sa i ai i totonu.

Sa latou faaaoga foi apa tomato sa i totonu o le ofisa e faaleaga ai puipui o le ofisa, ina ia mafai ai ona faataunuu la latou fuafuaga e faaleaga uma totonu o le Ofisa, na pau le itu na teena e le alii lea i leoleo, latou te lei gaoia ni laptop e pei ona taua i ripoti a le aoga.

Ae na taua e le isi alii i leoleo, o le isi ana uo na faaleagaina le laptop sa i luga o le laulau a le faiaoga, ina ua pue ai e le isi alii lona ata, ma manatu ai e faaleaga ina nei maua ai latou.

O moliaga tai tolu ua molia ai i laua nei e toalua e aofia ai le talepe fale i le tulaga muamua, gaoi atoa ai ma le faaleaga meatotino i le tulaga lua.

E tusa ma le $1,000 le tau atoa o mea sa faaleagaina i lenei osofaiga, e pei ona taua i faamaumauga a le faamaisinoga.

O lo o taofia pea i le falepuipui o tamaiti i Tafuna le au alii ia e toalua, e faatali ai le isi a la iloiloga lea ua faatulaga i le aso Lulu o le vaiaso nei, lea o le a iloilo ai loa le isi laasaga o le la mataupu.