Ads by Google Ads by Google

O LE TA PE’A, O LE TOFI MO SAMOA UMA

Na teena e ni isi o alii ta pe’a, o lo o latou faaaogaina masini e ta ai pe’a a tagata, vaega o le saunoaga a le susuga Su’a Vaofusi Pogisa Su’a e faapea, o le faaaogaina o masini e ta ai pe’a o se auala ua faia e tagata e saili ai tupe, ma ua tauau ina mou atu ai le mamalu ma le taua o lenei measina a Samoa.  Aemaise ai, e le o se tatau se pe’a e ta i se masini, se’i vagana ua faaaoga ai ‘au ta pe’a.

Na taua e Paulo Amituana’i, e ui o lo o i ai aiga ta tatau a Samoa sa tuu faapitoa i ai le galuega, peitai ua tupu tele le atamai o tupulaga i ona po nei e sailiili ai auala e faatino ai galuega, ma ua ia manatu ai, o le galuega ta pe’a, na aumai e le Atua mo Samoa uma.

“E le tau faailogaina poo ai le aiga e te tupuga mai ai, pe e te tupuga mai i le aiga Sa Su’a poo ai lava, pau le mea taua, ia e iloa faatino le galuega o lo o lauiloa ai Samoa i le lalolagi,” o le manatu lea o Amituana’i lea foi na lagolagoina e Ualeni Ah Yek.

Fai mai Ah Yek, e leai se eseesega o le tuu faasolo mai o le galuega ta pe’a mai aiga na latou amataina le galuega i s oo se Samoa i le taimi nei, ma le taimi na faataga ai e le Alii le Talalelei e alu i nuu ese.

“Ina ua manatu le Alii e faasoa le Talalelei i nuu ese, e ese mai i lona nuu o Isaraelu, sa taunuu lava, e faapena foi le galuega ta pe’a, ua oo i le taimi e tatau ona faasoa ai i soo se Samoa aua o le measina a Samoa uma, ae le mo se tagata poo se aiga e toatasi,” o le manatu lea o Ah Yek.

I le manatu e faapea, e le o se tatau se pe’a e ta i le masini, atoa ai ma le faaaogaina o le galuega e saili ai tupe, fai mai Ah Yek, “e le sa’o lea manatu, ae o se manatu foi e eleelea,” ona e i ai lona talitonuga, o le tomai ua maua e tupulaga i ona po nei e faatino ai le galuega ta pe’a, ua avea ma galuega mo nisi e saili ai manuia mo latou aiga.

“O le toatele o tagata sa ou taina a latou pe’a, ua latou molimau mai i le manaia ma le taua o le galuega sa ou faia, sa totogi a’u i le taina o pe’a a tagata, ou te talitonu foi o lo o totogi aiga ta tatau a Samoa i soga’imiti ma malu a tagata sa latou taina, e le tau fesiligia lea tulaga,” o le manatu lea o Ah Yek.

O le taina o mamanu i le ogavae, tauau po o le mitiafu foi, o se tasi lea o auala na taua e Amituana’i ua lauiloa ai mamanu a Samoa i le lalolagi.

“O le toatele o tagata i atunuu i fafo e le o ni Samoa, ua fiafia e faatau mitiafu Samoa o lo o i ai mamanu o le soga’imiti, o ni isi foi ua mananao e ta ni a latou pe’a i tauau ma ogavae, ona fai mai la latou mau, e manaia ma matagofie mamanu a Samoa i le vaai, i lo’u la taofi, e le leaga le galuega o le faalauiloaina o mamanu a Samoa i le lalolagi i auala eseese nei,” o le isi lea manatu o Amituana’i.

O le tauvaga ta tatau lona 8 a le Tisa’s Tattoo Fest lea ua faamoemoe e amata i le vaiaso nei, o le a aofia ai foi tagata ta pe’a mai vaega eseese o le lalolagi, lea o le a latou faaaogaina masini e faatino ai la latou galuega.

Na saunoa Su’a, e mafai lava ona faaaoga masini e ta ai isi ituaiga pe’a e pei o le ata o le manulele, ae a oo mai lava i le leai a Samoa, le soga’imiti ma le malu, e na o le tolu lava a’u e faaaoga e ta ai, ae le faaaoga ai se masini.