Ads by Google Ads by Google

O le Nesionale Amerika na fasiotia le ave taavale

Ua faamaonia nei le igoa o le alii talavou na ia tagatavaleina i se tamai laau malosi o le ituaiga o le .22 caliber, si alii ave taavale lau pasese o Ete Ete Faiumu i le po o le aso Lua o le vaiaso nei.

O ia lea o Patrick Jonathan Crichton, o se Nesionale o Amerika, mai Malifa ma Tafuna, Amerika Samoa. O ona matua o David ma Peka Crichton, ma na faaalia e ni sosia, sa faauu o ia mai le Aoga Maualuga a Samoana i Utulei.

E ui sa fanau o ia i Amerika Samoa, ae sa nofo o ia i le aiga o lona tama i Malifa mo se taimi e lei umi.

O le aso Lulu na sosoo ai ma le po o le aso Lua lea sa tupu ai le faalavelave i luma o le ofisa a le EPC i Vaitele lea e faatau ai le eletise totogi muamua poo le cash power, na taofia ai lea alii i le ofisa o leoleo i Apia.

E le o manino mai pe faapefea ona maua e leoleo, pe na alu lava o ia i le ofisa o leoleo.

Ae na saunoa le sui sooupu o le ofisa o leoleo, le susuga i le komesina lagolago ia Leaupepe Fatu Pula i se feiloaiga ma le au tusitala e faapea, o galuega a leoleo ua taofia ai nei lea alii.

Na saunoa foi le alii komesina lagolago, e le faatagaina i le tulafono ia le tamai laau malosi o le ituaiga o le .22 caliber lea sa faaaoga e lea alii e faaoo ai le oti i le ua maliu.

Na faaalia e Leaupepe, sa suesueina lea alii i le mafuaga na ia faia ai lea faiga le alofa ma o lana tala, sa la talanoa i le telefoni ma lana uo teine e alala i Amerika Samoa, ma sa faauma mai e lana uo teine le la mafutaga.

Na faaalia e lea taulealea, sa matua ootia ona lagona ma sa faaletonu foi lona mafaufau.

O lea sa ia savalivali ane ai mai le latou fale i Malifa ma faatutu taavale i le magafa i Malifa.

Fai mai a ia, sa ia mafaufau e ave faamalosi se taavale, ae sa faafaigata ana fuafuaga ina uav tu ane le taavale lau pasese, e toalua tagata o lo o malaga atu ai, o le ave taavale ma lona uso matua.

Sa oso loa o ia i tua, ma fai i ai e fia malaga i Vaitele e faatau sana cash power.

Ina ua taunuu i Vaitele, sa tupu ai loa ma le faalavelave ma sa ia sola ese ai mai lea nofoaga.

E le o manino po o fea sa i ai o ia i lena po ae lei maua e leoleo i le aso na sosoo ai.

O lo o taofia pea o ia i le ofisa o leoleo e talia ai lona faamasinoga. Ae ua talia e le aiga o le alii ua maliu le ifoga a le aiga o le alii o Patrick Jonathan Crichton.