O Daryleen Saleafaina Moi o ia o se tasi e avea ma Fitafita a le US Army Reserve ma o lo’o i ai nei o ia i Hawaii ina ua mae’a latou BCT na fa’atautaia ai iina. O lenei tama’ita’i talavou, o se alo e fa’asino ia Fa’aeseina Magalei Moi o se tina faia’oga i Midkiff ma Pavaia’i ma le susuga le Pulea’oga Litaea o Kerupi Usoali’i Moi o Faleniu.

O Kerupi Moi sa tautua i tausaga ua te’a i le fuava’a a le U.S. Navy. I le ulua’i su’ega a le tama’ita’i o Daryleen  sa ausia ai e ia togi mo le Navy i Hawaii lea sa ia su’ea ai le ASVAB, peita’i, na taliu mai o ia i American Samoa ma sa fa’aulufale ai o ia i le US Army ona o ana a’oa’oga e fia fa’auauaina ma totogia ane i ai le Vaega au i ana pili.

Ua amatalia e Moi ona tiute i le US Army o se E3 ona ua mae’a maua lona fa’ailoga AA i le tatou Kolisi ASCC, ina ua mae’a ana a’oa’oga mai Leone High ma togi maualuluga, ae o ia fo’i le peresetene o le vasega fa’au’u, ma sa maua ai lona avanoa fa’asikolasipi i le ASCC i le tausaga 2011-2013. O ia sa a’oa’oina i Pavaiai Elementary mai le vasega tasi se’ia fa’au’u i le vasega 8.

O lenei  tama’ita’i sa tauva i le Tausala Lalelei o Amerika Samoa na te’a atu nei ma sa ia mauaina le tulaga tolu i lea tauvaga matagofie mo tama’ita’i talavou o le atunu’u. Lea ua faliu ala o le Lupe, ma ua taumafai ai mo ana a’oa’oga ma tofi fa’afitafita a le malo tele, ma sa fa’au’u mai i latou ia Fepuari 5, 2015.

Ua malaga ese atu i latou mo a latou a’oa’oga fa’apitoa AIT i Fort Lee, setete o Virginia mo le 7 vaiaso. O lo’o momoli mai ona alofa’aga mo lona aiga atoa i Faleniu, fa’atasi ai ma lana ekalesia ma le autalavou uma a le LDS i Faleniu, fa’atasi ai ma ona matua fa’ale-agaga.

Sa fa’anoanoa le tina ia Fa’aeseina, ona ua le mafai ona o’o atu i latou sa fuafua mo le fa’au’uga o Daryleen i Hawaii, peita’i sa ia fa’ailoa mai, “Na to’a lo’u mafaufau ina ua fa’ailoa mai e si a’u tama, Mom e na’o le tasi lava le aso ma outou ae matou o ese mai Hawaii, e le lava lena mo le tupe tele o le a totogi mo tou pasese, e sili ai pe fa’asao le seleni, ae fa’amoemoe i le Atua e fesoasoani mai ia te a’u fa’apea ma outou, ia manuia faiva, ona maua lea o se taimi umi e tatou te mafuta ai ae le’i fa’aauau tiute ma a’oa’oga e pei ona tatou fa’atulagaina mo a’u.”

“Ua lava ai lenei fa’amalosi mo ma’ua matua!” O toe upu lena a le tina ua mama ia te ia le le va’ai ma fiafia i taumafaiga ua ausia e le la’ua ulumatua o le fanau e to’alima.

O Eric Eneliko Troy Togia o se ali’i talavou ma o se alo o Amerika Samoa mai le afio’aga o Afonotele, o lo ua si’itia nei lona tulaga i le polokalama a le JROTC i Killeen, le setete o Texas lea o lo’o alaala ai ma ona matua, Rev. Tautalaaso Pu’e Togia ma le faletua o Toe Naiuli Togia.

O lona si’itaga i le polokalama o le JROTC sa folafolaina fa’alaua’itele lea i le siva tele a le militeri sa faia i Coppers Cove i Texas.

Ua fa’afetaia e matua o lenei ali’i talavou le sogasoga o le tamaititi Afono i ana a’oa’oga, ma ua fa’afetaia fo’i le tumau i uiga fa’asamoa moni, usita’i ma le fa’alogo i fa’atonuga ma tima’iga mai matua ma tagata matutua o le Ekalesia.

Tapua’ia pea faiva o lenei ali’i, ia saga fa’amanuia i ai le Atua, a’o fa’asaga atu i lu’iga eseese fa’atalavou taumafai i a’oa’oga ma tomai eseese a’o alaala ma a’o’oga i nei setete.

Ua momoli mai alofa’aga o le fa’afeagaiga ma le faletua ma le fanau i le afio’aga o Afono, “E le galo outou uma i Samoa i talosaga.”