FINAGALO LOLO I SE FAIGAMALO FAU FA’ATASI

O lea ua taoto le finagalo o Tutuila ma Manu’a e ala i lana sailiga tofi i le vaiaso na te’a nei, e pei ona filifilia ai e le to’a 6,645 o tagata sa palota le tofa Lolo Matalasi Moliga e avea ma Kovana Sili, a’o le afioga i le alii Senatoa ia Lamanu Peleti Sialega Mauaga e avea ma Lutena Kovana.

O le fesili la lea ua tuu fesili i ai le to’atele o le atunuu sa latou lagolagoina le isi itu, o a la suiga o le a sauni atu nei i ai Lolo ma Lemanu e fai mo le atunuu?

E ui o le isi to’a 5,908 o tagata palota na o latou lagolagoina le itu a Faoa Aitofele Sunia ma lana paga o Taufete’e John Faumuina, peitai ina ua maea ona tuuina mai le faaiuga o le palota e manumalo le paga a Lolo ma Lemanu, na tula’i ai Lolo ma saunoa e faapea, “o le faaiuga ua tuuina mai, o le faaiuga lena a le atunuu atoa na aumai e le Atua.”

“Tatou te le’i saili mo le manumalo ina ia manuia ai tatou lava, e leai, na mafua ona tatou saili i le manumalo ina ia fai ni suiga lelei mo le atunuu,” o le saunoaga lea a Lolo.

Sa ia taua foi e faapea, “ou te valaau atu ia te outou uma lava sa lagolagoina lenei faamoemoe, o mai laia tatou tutu faatasi e fai ni suiga e manuia ai le atunuu.”

O lana saunoaga lea na faatatau i paga e tolu ia e le’i manuia i le vaega muamua o le tauvaga mo le tofi kovana ma le lutena kovana, ina ia latou tutu faatasi e fai suiga.

“Ina ua amata mai lenei faamoemoe, sa tatou amata eseese mai peitai o lea ua tatou faai’u faatasi ona o lo tatou talitonuga, ia i ai ni suiga lelei mo le faigamalo a Tutuila ma Manu’a.”

I lana saunoaga faafetai i luga o le alaleo faasalalau a le KSBS-FM 92.1 i le aso Lulu na te’a nei, e le gata na faafetai ai e Lolo ma Lemanu le atunuu atoa e tusa ai o le palota, ae sa faapitoa le la faafetai i le afioga Faoa ma le tofa Taufetee e tusa ai o le la taalo faatausala.

“Faafetai faapitoa atu i lau afioga Faoa faapea ai ma lau Taufete’e, malo le onosa’i malo foi le finau, e i ai lo ma talitonuga ma Lemanu o lea ua faaali le finagalo o le atunuu e ala mai i le atunuu, o maia laia tatou sapasapaia le faamoemoe o le atunuu.”

“Ma te talosaga atu foi ma le agaga vaivai e pei o ma moomooga, o mai tatou tutu faatasi e saili se faigamalo e faamanuia tupulaga ma le atunuu i le lumana’i, e ala i le avea o oulua ma taitai, avea fo’i i maua ma taitai."