Fa’atau Tu’i pe ua Nimo

Ua mae’a tutula’i le maota fou ma lona anofale e fa’atino ai galuega a le Matagaluega, peita’i, ua i ai nei le mea ua tupu i meafale sa fa’atautaia mai ai galuega i le Ofisa tuai. O le fesili, o le a le mea a fai i meafale na? Ua loto le aufaigaluega e fia fa’atau e i latou nai a latou komipiuta sa galulue mai ai, pe a mafai!

Talofa, ua talosaga atu ae fa’ailoa mai e le Taiulu, e leai, e fa’ao’o lau talosaga i le Ofisa o Oloa pe talia mai ai, ma o i’ina fo’i e fa’ao’o i ai si au seleni mo fa’amaumauga.

Ua tatalia le taimi e o’o ai nai masini i le Ofisa o Oloa, ae uma ane, ua fiu e le o’o atu lava mea nei, sau loa ma le tala salatua, “Lale ua mae’a uta uma masini a le vasega maualuluga o le Ofisa, ae tu’u ai pea fanau a bird e tagitagi ma fa’atali se’i o’o i le Ofisa o Oloa!” Oka ua savali i le tolu vaiaso, ae leai lava si ana masini ua alia’i ane i le Ofisa sa tatau ona o’o i ai mo se aiaiga o se fa’atauga.

Lea ua toe maua mai tala, se ua masi’i fo’i ma le pusa ’aisa, ae fai mai e tasi lava le ta’avale lea e oso i ai mea nei, ae le o’o lava i le Ofisa o Oloa! Fesili loa le to’atele, sole na fai mai fo’i e fa’amuamua tagata, ae o lea ua tauau e ese fo’i le fa’amuamua lea ua alia’i mai, ua fa’amuamua lava a’u!

Ia na fai atu lava i si tamaloa lea, “Soloi ou loimata, aua e tele fo’i ni tali o nei ituaiga fesili, o nisi e fa’apea mai o le fa’amatalaga a ai ma le fa’amatalaga a ai, ae emo ane le ata, ua leva ona mafana le mea i le nofoaga e tatau ona i ai!”

O le tala moni lava, e le tatau, e le mafai ona fa’atau i ni tupe e se tasi oloa nei, e tatau ona fa’auia sa’o le Ofisa o Oloa, ona fa’ato’a faia lea o se fuafuaga e toe fa’atau ai, ae tatau ona ‘ave le fa’amuamua i nai tagata patino sa galue ai i lea fo’i masini, ae o le ala tonu o ia galuega, e tatalia le taimi e faia ai le fa’atautu’i a le matagaluega o Oloa, ona fa’ato’a e tauofo ai lea i se tau e te avea ai lau masini ma le pusa’aisa lea ua fai vae!

Sole seisi i toe ave lava i le tulafono, ae ua mae’a lenei tausaga ma le nofoa’iga matagofie sa e tautua malosi mai ai, aua e le o toe umi se taimi, ona tu’u atu fo’i lea o lou tau’au e te galue i lalo o se isi nofoa’iga fou! Aua le avea nei mea iti, o mea e pala, ae maumau ai le igoa le toe fa’amamasagia, ona o meafale e te maua lava fo’i pe a e sailia i sou lava totogi.