O se tasi nei o fesili taua ua fa'atula'i mai e ni isi o le atunu'u i le amata ai o le savaliga sa'ili malo a Amerika Samoa i lenei tausaga fou 2012, po o fea ua fai aga'i i ai le kamupani i’a fou o le Tri Marine lea na folafola mai e le ali'i kovana, o le a sui tulaga i le kamupani i’a o le COS Samoa Packing ua tapunia.

O le to'atele o tagata na fesiligia e le Samoa News i le vaiaso na te'a nei, sa o latou fa'aalia lo latou fa'aaliai pea po o fea ua fai aga'i i ai lenei kamupani i’a ua leva ona folafola mai.

ìE muliga fo'i le fa'akaliiga o le Mesia i loga koe afio fa'alua mai i le fa'akaliiga o le kaimi e  kakala ai legei kamupani fou se,î o le tomumu lea a le isi tina matua ua silia ma le 13 tausaga o galue i le kamupani a le Samoa Packing.

E o'o lava fo'i i luga o le polokalama a le ali'i faipule ia Faleomavaega Eni i le vaiaso na te'a nei, na fesiligia ai fo'i e ni isi o to'oto'o lenei lava mata'upu, ona  o lea ua aga'i atu i le isi tausaga fou ae o lea lava e lei maua mai se tali mautu i le kamupani o le Tri Marine.

Na pau le fa'amatalaga na tu'uina mai e kovana Togiola Tulafono i le tausaga 2010 ina ua fesiligia o ia e ni isi o le atunu'u i luga o lana polokalama i se tasi o aso na ia ta'ua ai, o le masina o Mati o le tausaga na te'a nei ua fa'amoemoe e tatalaina ai le tautua a lenei kamupani i’a fou.

ìA lea ua ke’a le masiga o Maki e lei koe kakalaiga lava lea kamupani, pau le mea lea e va'aia i le kele o aso o le pa u’amea o lo o siomia ai le lokoa o lo o makala ma koe kapuni, ae le’i koe kakalaiga lava le kamupagi mo gi galuega,î o le tala le fiafia mai lea a le ali'i o Simeona Apulu, o se tama mai le afio'aga o Aua o lo o galue nei o se ali'i kamuta i se tasi o konekarate fau fale i le atunu'u.

Na ta'ua e Apulu, ua leva tele ona ia fa'atalitali i le taimi e tatalaina ai le kamupani i’a fou lea ae se'i toe sa'ili i ai se isi ona avanoa peita'i e foliga mai e le latalata mai se taimi e tatala ai.,

Ua fautuaina e ni isi a latou faipule ina ia toe fesiligia lenei mata'upu pe a toe tauaofia le Fono Faitulafono i le masina nei, po o fea ua fai i ai le kamupani fou lea, ae pe fa'amaonia fo'i o le a maua ai ni isi galuega fou pe leai.

Fai mai le tomumu le fiafia a le isi tama i luga o le isi polokalama a le ali'i faipule i Uosigitone, ana tatala e le malo le avanoa i le kamupani o le StarKist Samoa latou te fa'aauauina ai le galuega sa faia e le Samoa Packing, atonu ua tele ni isi galuega fou ua maua.

E le o manino mai i le taimi nei i le Ofisa o le kovana pe o le a se isi tulaga lata mai i le kamupani a le Tri Marine ae po o fea fo'i o lo o fa'amoemoe e tatala aloa'ia ai ana galuega.