Ads by Google Ads by Google

O FEA UA 'AVE I AI LAGISI E 2 NA FA’ATAU E LE MALO?

O le fesili po o fea ua 'ave i ai lagisi (barges) e lua ia na fa'atau mai e le malo i le tausaga e 2010, ae po o fa'aaoga fo’i i ni galuega a le malo, e le o mafai ona manino mai i le taimi nei.

O lagisi e lua e pei ona fesiligia o lo o taula nei i le Uafu o Va'a Faila i Malaloa, le Marina ma ua fa'amoemoe faipule o le aso Gafua o le vaiaso fou o le a latou fesiligia ai le Fa'atonusili o Pulega o Uafu ma Taulaga, mo le tu'uina mai o se fa'amatalaga e uiga i meatotino ia a le malo.

O le fa'ai'uga o le masina o Aperila 2010 na taunu'u mai ai i fanua le va’a toso va’a o le Sa’ilele ma lagisi e lua na fa'atau mai e le malo i Hawaii, i le mae'a ai o le 14 aso na folau mai ai i luga o le vasa.

I fa'amatalaga ua taua'ao e ali'i faipule o lo o ta'ua ai e fa'apea, talu lava ona 'aumai lagisi nei e lua, e le o fa'aaogaina lava i se galuega a le malo, ae tusa ma le $3 miliona na fa'aalu e le malo e fa'atau mai ai le va'a toso va'a o le Sailele ma lagisi nei e lua.

O se tasi o mata'upu ua sauni faipule e fesiligia i le vaiaso fou, o ta'avale ma isi mea faigaluega ia sa 'aumai ai i luga o lagisi nei e lua, po o fea ua fa'aaoga i ai ae aisea fo'i ua tuai ai ona fa'aaoga laigisi ina ia penefiti ai le malo.

Na ta'ua e le ali'i faipule o Alexander Eli Jenning e fa'apea, e tele se vaega tupe a le malo na fa'aalu i lagisi nei, peita'i e foliga mai e le o i ai se aoga i le malo, ma o se tupe ma’umau na fa'aaoga e fa'atau mai ai.

O le mata'upu lenei na mapuna a’e fo'i ina ua fa'atoa taunu'u mai le va'a o le Sa’ilele ma lagisi i le 2010, ina ua pisa tala e fa'atatau i se ta'avale o le ituaiga o le Ford Explorer e fa'apea o le ta'avale a se tasi o tagata faigaluega a le Pulega o Uafu, lea na fa'atau mai i le tupe a le malo.

O ni isi fo'i ripoti na maua e le Fono e fa'apea, o ni isi o 'oloa na 'aumai i luga o lagisi nei e aofia ai ma se container, e le’i i ai ni pepa fa'amaumauga e fa'ailoa mai ai po o a ia 'oloa a’o a fo'i mea o lo o i totonu o le container.

Fai mai Alexander, “afai e fia malamalama ma manino le fono i le mata'upu lenei, e tatau ona matua fesiligia le fa'atonu o Uafu mo se tali manino.”

O le vaiaso nei na molimau ai fo'i le fa'atonu ia Matagi R. McMoore i luma o le komiti a le maota o sui i le mata'upu e fa'atatau i femalagaa'iga i Manu’a, ma ua fa'amoemoe e toe molimau fo'i i luma o le komiti a le maota o sui i le aso Gafua e uiga i lagisi sa 'aumai i Hawaii.

Ina ua fesiligia e le Fono le susuga Matagi i le 2010 e uiga i lagisi nei, sa ia ta'ua ai e fa'apea, o lagisi nei na 'aumai ina ia fesoasoani ai i le eliina fa'aloloto o le taulaga.

O se vaega tupe o le nonogatupe e $20 miliona a le malo mai le teugatupe a le Litaea na fa'atau mai ai le Sa’ilele ma lagisi e lua.