AFALAVA: O le fa’amamaina o auala ma nuu o le galuega a tagata uma

E ui o lea ua taoto i luma o le maota o sui ni isi o faasea mai ni isi o faipule ona o tulaga faaletonu i auala aemaise ai le le faia o tiute a le Matagaluega o Galuega Lautele a le malo i le faamamaina lea o tafatafa o le alatele ma teuteu auvai, peita’i na saunoa le ali’i faipule mai Atiulagi/Leasina, “o le fa’amamaina o tafatafa o auala ma auvai o le galuega e galulue faatasi ai tagata uma o le atunu’u ae le na o le malo.”

Talu lava ona tatala le Tauaofiaga lona lua a le Fono Faitulafono i le vaiaso na te’a nei, o le mataupu lava i faaletonu i auala o lo o mamafa i ai saunoaga a afioag i Senatoa ma Faipule.

Na taua e se tasi o faipule e faapea, ua manaia auala fou ia ua amata ona fausia atu i le itu i Sasa’e o le atunuu, ae o le faalavelave e le o faamamaina e le Matagaluega o Galuega auvai ma ni isi o laau o lo o falala i luga o le au ala.

O le mataupu lava fo’i lea na saunoa i ai le afioga i le ali’i Senatoa mai Saole i le vaiaso nei, e faatatau i niu ma le tele o laau o lo o falala i luga o auala, ma o lo o atugalu lona loto ina ne’i pau se popo pe gau se lala laau ma aafia ai se soifua o se tagata ona faaopoopo ai fo’i lea o le isi avega i le itu tau tupe i le malo.

I le toe lagaina ai o le mataupu lea i le aso ananafi, sa le’i nofonofo lelei ai le afioga i le ali’i faipule ia Atualevao Gafatasi Afalava, o ia fo’i lea o le ta’ita’ifono o le Komiti o Galuega Lautele a le maota o sui, ae na ia tula’i ma faailoa i luma o le maota, o le faamamaina o nuu ma auala e le o se galuega e fai to’atasi e le Matagaluega o Galuega a le malo, ae o le tiute lena o tagata uma o le atunuu.

Na taua e le alii faipule e faapea, o lea ua tele faasea i le faaletonu o auala, sosolo vao i luga o auvai ma tafatafa o le alatele, ae o le fesili ua tula’i mai, o fea o i ai pulenuu o le latou matafaioi tonu lea.

“E le iloa po o a galuega a pulenuu o lo o fai ae o mea nei o galuega faigofie, e galulue faatasi uma i ai tagata uma,” o le saunoaga lea a Atualevao.

“O le mataupu i le faamamaina o nuu ma auala e galulue faatasi ai le Ofisa o Mataupu Tau Samoa ma le malo, faaopoopo i ai ma le galulue faatasi o tagata uma ona manuia ai lea o le galuega,” o le isi lea saunoaga a le ali’i faipule.

Na taua e se tasi o alii pulenuu e le’i finagalo e faailoa lona suafa e faapea, e iloa gofie lava nuu o lo o sosolo vao i a latou auvai ma tafatafa o le alatele, o le nuu lena e le o galue le latou pulenuu, ae o le tele lava o afioaga e aofia ai ma lona nuu, o lo o faia galuega i vaiaso uma mo le faamamaina o aai.

Na faailoa e le alii kovana ia Lolo Matalasi Moliga i lana kapeneta atoa ai ma le motu o Manu’a, e le mafai ona manuia le malo pe a le galulue faatasi tagata uma e faamatagofie le atunuu.