Ads by Google Ads by Google

O AI O LO O FA’ATAMALA?

“ANA I AI SE FALE TOGAFITI AI E MAMA’I MAFAUFAU E LE LAVEA LO’U TO’ALUA”

 

E ui ua lafoa’i e le tina o le ali’i lea o lo o tu’uaia i le osofaia o lona tama i le agaese lagona matuitui ma le oona o le faalavelave lea na aafia ai si ona to’alua i le vaiaso na te’a nei, ma ua ia faamagalo fo’i si ana tama e tusa ai o le faalavelave na manu’a ai lona toalua, ae na taua e le tina i le Samoa News e faapea, ana i ai se fale faapitoa e togafiti ma tuu i ai tagata e aafia i le gasegase o le mafaufau e pei o lana tama o Mark Mulipola, e le tula’i mai le faalavelave lea na manu’a ai si ona to’alua i le aso Sa na te’a nei.

 

“Ou te talitonu ana i ai se falema’i po o se nofoaga faapitoa e tausi ma togafiti ai la’u tama, ailoga e tula’i mai le faalavelave e pei ona manu’a ai si ona tama i le aso Sa na te’a nei, ae ou te iloa fo’i e nofo ma faaleaga uma mea aoga i totonu o le ofisa po o le fale aua e faapena lana amio,” o le saunoaga lea a le tina ia Tina Mulipola e faatatau i le faalavelave e pei ona manu’a ai si ona to’alua ina ua osofa’i e Mark i se agaese.

 

E pei ona silafia, o le amataga o le vaiaso nei na tula’i mai ai ni faalavelave ogaoga se lua i le itu i Sisifo o le atunuu, lea o lo o tu’uaia ai ni ali’i se to’alua e aafia i gasegase o le mafaufau i le faataunuuina o nei faalavelave.

 

O faalavelave ogaoga e lua na tutupu mai i le aso 23 Iuni, 2013 na te’a nei e aofia ai le faalavelave lea na maliu ai se ali’i e 36 tausaga le matua mai Iliili, ina ua faaaoga e le ali’i o Arthur ‘Afa’ Blake se tolopa e faaoo ai le maliu i le ali’i na aafia.

 

O lo o taofia pea Blake i le toese i Tafuna ina ua le mafai ona ia totogiina le $500,000 sa fatulaga e le faamasinoga, e faatali ai lana iloiloga lea ua fuafua mo le aso Gafua o le vaiaso fou, ma o lo o molia o ia e le malo i le moliaga mamafa o le fasioti tagata i le tulaga muamua.

 

O le faalavelave lona lua na tula’i mai i Malaeimi i le afiafi o le aso lava lea, lea e pei ona tuuaia ai e le malo ia Mark Mulipola i lona osofaia lea o lona tuaa i se agaese ma manu’a tigaina ai o ia.

 

O lo o tuuaia Mark i le solitulafono mamafa o le faaoolima i le tulaga muamua, ma o lo o taofia pea o ia i le toese i Tafuna i le taimi nei ina ua le mafai ona totogi le $150,000 na faatulaga e le faamasinoga

 

O fa’alavelave tetele e lua e pei ona tula’i mai i le amataga o le vaiaso nei, na mapuna a’e ai se fesili mai le lautele o le atunu’u i le tulaga po o ai o lo o fa’atamala, ae ailoga fo’i e tutupu nei faalavelave matuia pe ana i ai se nofoaga faapitoa e tausia ma togafitia ai i laua nei o lo o aafia i gasegase o le mafafaufau.

 

“Fa’amata ana i ai se nofoaga e tausi ma togafiti ai i laua nei ua tuuaia i nei faalavelave, faamata e tutupu ni faalavelave matuia faapenei i le atunuu,?” o le saunoaga lea a se tasi o foma’i e le’i finagalo e faailoa lona suafa.

 

Na taua foi e le foma’i lea e faapea, e le o se faalavelave muamua lenei ua maliu ai se tagata e mafua mai ona o gaioiga a i latou e aafia i le gasegase o le mafaufau.

 

O le isi faalavelave na aafia ai foi se alii e aafia i le gasegase o le mafaufau, o le faalavelave lea na tulai mai i le masina o Aokuso 2008 i Pago Pago, ina ua faaaoga e le ali’i o Mose Timoteo Jr se seleulu e faaoo ai le maliu i si ona tama.

 

Na ulua’i molia e le malo Mose Jr i le moliaga o le fasioti tagata i le tulaga muamua, ae i le maliliega na latou sainia ma le malo, na tausala ai o ia i le solitulafono o le fasioti tagata pa’i valea, ma faasala ai loa o ia e le faamasinoga e taofia i le toese mo le 28 masina.

 

I taualumaga o le mataupu a Mose Jr na manino ai le faia o se suesuega faapitoa i lona mafaufau i le falema’i o le LBJ i Fagaalu, e iloilo ai pe gafatia e le malosi o lona mafaufau ona tauave taualumaga o lana faamasinoga.

 

E le’i mafai ona faalauiloa i lumao le faamasinoga le faaiuga o le suesuega sa faia, ae ina ua lau le faasalaga a le ua molia, sa fautuaina ai o ia e le faamasinoga ina ia faamaoni e inu ana fualaau ma fai ana togafitiga uma o lo o manaomia.

 

O le fesili po o ai tonu le Matagaluega a le malo o lo o i ai le matafaioi i le tausiga ma le vaaia lelei lea o i latou e aafia i le gasegase o le mafaufau e le o matua manino tele po o ai, pau le itu na faamanino e le Faatonusili o le Matagaluega a le Soifua Maloloina ia Motusa Tuileama Nua i le Samoa News, e ui o lana matagaluega o lo o taoto mai ai le matata i le fausia lea o se falema’i e togafiti ma tausi ai i latou o lo o aafia i le gasegase o le mafaufau e pei ona taua i le tulafono, peitai o ni nai tausaga e le’i mamao atu na sainia ai e Kovana Togiola sana poloaiga e tuu atu ai le togafitiina o i latou e aafia i le gasegase o le mafaufau i lalo o le vaavaaiga a le Matagaluega o Tautua ma Auaunaga mo Tagata Lautele.

 

Ina ua fesiligia e le Samoa News le afioga Motusa pe na te silafia o ai le matagaluega o lo o faatamala i le faatinoina o lana pito laau e le o iloa, pau lana saunoaga, o le vaega lava o lo o vaaia i laua nei ma tuuina atu togafitia mo i laua, o le vaega lena e tatau ona mataalia i soo se taimi ina ia mautinoa e sapalai pea fualaau ma vailaau mo i latou o lo o aafia i le gasegase o le mafaufau.

 

“E le mafai ona ou faapea atu po o ai le vaega a le malo ua faatamala i le faatinoina o lana pito laau, pau la’u faamatalaga, o ai lava le vaega o le malo na mulimuli faia siaki ma togafiti mo i laua nei ao le’i tula’i mai lenei faalavelave, o le vaega lava lena e tatau ona mulimulita’i pea e siaki i laua nei ma isi fo’i gasegase ina ia mautinoa o lo o manuia ma sologa lelei mea uma,” o le saunoaga lea a Motusa.

 

Talu lava ona taunuu mai Mark mai Amerika i le 2007 ma nonofo faatasi ma ona matua i Malaeimi, e le o misi lava ana talavai i le polokalame a le Matagaluega a le Tautua ma Auaunaga mo Tagata Lautele i Tafuna e pei ona taua e lona tina.

 

Fai mai lona tina, o lona toalua lava e faia le galuega matua o le piki o fualaau ma toe faatutumu mai ina ia lava ma totoe sapalai mo Mark.

 

“E ui i le matuitui ma le matuia o le mea ua faia e Mark i lona tama, ua ou faamagalo i ai i si a’u tama, sa ou alu fo’i i le aso na valaau ai lana faamasinoga ma ou faailoa i ai o’u foliga fiafia ia te ia,” o le molimau lea a le tina.

 

“Tusa lava po o le a le matuia o le mea ua tula’i mai, e tumau pea lo’u alofa faamaoni ia Mark e le mafai ona aveesea,” o le isi lea saunoaga a le tina.

 

O le aso Lulu na te’a nei na te’a ai i tua mai le falema’i i Fagaalu le susuga a Asotasi Mulipola ma manu’a tuga na aaafia ai o lona ao atoa ai ma lona aao, ma ua faasolo manuia o ia i lona aiga e pei ona faamaonia mai e lona faletua.

 

Na taua e se sui o le Matagaluega o Tautua Lautele i le Samoa News e faapea, o le latou polokalame e pei ona tuu atu ai le fesoasoani mo i latou e aafia i le gasegase o le mafaufau, o lo o faaauauina pea i aso uma ma o lo o latou mataituina fo’i i latou o lo o aofia i lalo o le polokalame.

 

E le’i mafai e le sui lea ona faamaonia mai po o i ai i lalo o le latou polokalame igoa o Mark ma Arthur, ona o lana saunoaga, e le mafai ona latou soona tuuina atu ni faamatalaga e faatatau ia i latou o lo o agavaa i le polokalame ona o puipuiga lava i lalo o le tulafono.

 

E talitonu le Samoa News o le vaiaso nei na faataunuuina ai se suesuega faapitoa i le mafaufau o le ali’i o Mark, pe gafatia ona ia tula’i e tali i moliaga faasaga ia te ia i luma o le fa’amasinoga.

 

O le aso Tofi na te’a nei na faamoemoe e faatulaga ai le aso e faia ai le ulua’i iloiloga o mataupu a Mark ma Arthur, peitai na finau le la loia fautua ia Karen Shelly ina ia toe tolopo i le aso Gafua o le vaiaso fou le faatulagaina o le aso e faia ai le ulua’i iloiloga o mataupu a i laua nei, ona e le’i tali atu lava i laua pe la te manana’o e faataunuu a la ulua’i iloiloga pe tuu sa’o atu loa la mataupu i luma o le faamasinoga maualuga e fofogaina ai.