LAPATAIA KS I ITU E MANAOMIA ONA FAALELEIA

Ua fa’atonu e le Fa’atonusili o le Matagaluega o le Soifua Maloloina le pulega o le faleoloa a le K.S Mart i Tafuna, afai e le fa’aleleia ma aveese uma meaai ma oloa ua le toe aoga, o le a tapunia loa o le faleoloa i se taimi lata mai.

Na matua faateia tagata faigaluega ma le pulega a le K.S Mart ina ua ulufale fa’afuase’i Motusa Tuileama Nua ma ni isi o lana aufaigaluega i le aoauli ananafi mo le faatinoina o sa latou asiasiga, e le gata i totonu o le faleoloa ae faapea foi ma le vaega o lo o teu ai oloa.

E le’i umi ona taunuu sui o le Matagaluega ae vaaia e le Samoa News le pisi solo o ni isi o tagata faigaluega e solo tino o oloa ma teu teu faamanaia oloa i luga o fata.

Sa i ai le sui o le Samoa News i le taimi atoa o le asiasiga e silia i le itula, lea na amata atu i luma ma faasolo atu ai i tua i le fale o lo o teu ai oloa a le kamupani, lea na taitaia e Motusa ma na auai ai foi ma le susuga a Papalii Marion Fitisemanu, o ia lea o lo o faauluulu i le Vaega Su’esu’e i totonu o le Matagaluega o le Soifua Maloloina.

Na faamanino e Motusa, ua mafua lenei asiasiga, ona o le tele o faasea mai le atunuu e faatatau i oloa ua maea aso e aoga ai ae o lo o faatau pea e le faleoloa.  *Na pau lava le auala ou te faia ina ia foia ai le toe faasea o le atunuu i le tele o faleoloa o lo o latou faatau atu oloa ua maea le aso e aoga ai e aofia ai ma le tou faleoloa o le tapuni loa o le faleoloa,* o le saunoaga lea a Motusa;  I le tete’e ai o se tasi o le pulega i le asiasiga, na saunoa ai Motusa,  *Afai o lou talitonuga lena, lea la ua ou faailoa atu ia te oe, e toaititi le aufaigaluega ma e le mafai ona matou vaavaai uma faleoloa eseese i le atunuu, pau la le faaiuga ou te faia ina ia fesoasoani ai i le matou galuega o le tapuni o le tou faleoloa.*

Na ta’ua e Motusa, o oloa o lo o tele ai faasea a le atunuu, e aofia ai vailaau ma fualaau (medication), o oloa gaosi mai i pisinisi laiti, o oloa mo pepe atoa ai ma meaai tuu aisa.

Sa faatonuina e Motusa le aveesea o taumafa ia o lo o gaosi e pisinisi tua, ona o le leai o ni pepa faailo o pipi’i ai e iloa ai aso e maea ai le aoga o nei taumafa.

Na taua e Motusa i le Samoa News e faapea, o le toatele o tagata o lo o lolofi atu i le faleoloa lenei e faatau ai, aemaise lava i aso Sa pe a pisi tagata i faatauga, e leai se taimi e tau tilotilo ai pe ua maea le aoga o oloa taitasi ae faatoa maua lava pe a oo i le fale.

*O le toatele o tagata latou te iloa o ni isi o oloa nei ua maea le aso e aoga ai, e le iloa po o ai o le a talanoa i ai e faatatau i lenei mataupu, e le fia vili i le faleoloa e le telefoni atu foi i le Soifua Maloloina, sei vagana ai lava ni nai tagata toaitiiti e malamalama i auala e faatinoina galuega ma le tulafono, o i latou la ia o lo o telefoni atu i le matou ofisa ma faasea atu i oloa leaga o lo o faatau i totonu o le faleoloa,* o le saunoaga lea a Motusa.

Na taua foi e le alii faatonusili e faapea, afai e faasea se tagata po o ni tagata i ni oloa leaga o lo o faatau i faleoloa, o lona tiute o le tu i luga ma savali e saili se auala e foia ai le faafitauli.

*Afai ua le tautatala mai le toatele o le atunuu, o a’u la lea ua tula’i e fai ma o latou sui, ma o lo’u tiute lena i lalo o le tulafono, ia mautinoa o lo o saogalemu meaai uma nei mo le fofoga taumafa o le atunuu,’ o le isi lea saunoaga a Motusa.

O ni isi o vaega sa faatonuina e faaleleia, o le vaega o lo o lafoa’i ai lapisi ina ia mama ma la’u ese le lapisi i taimi uma, o le potu e tipi ai fasi povi ma isi oloa tuu aisa ina ia mama ma tu ese ae le o le faapipii faatasi ma le  umukuka atoa ai ma le taumafai e aua ne’i o’o atu meaola (pusi) i luma i le vaega o lo o i ai tagata faatau.

O pusi pe a ma le 5 sa vaaia i le taimi o le asiasiga, na taua e se sui o le kamupani, o pusi ia e faaaoga e tuli ese ai Isumu.

Na faailoa e Motusa i sui o le kamupani ina ua maea le asiasiga, o le a ia tulimata’i pea le latou faleoloa i aso uma ma taimi nei, sei vagana ua ia iloa ua usitaia faatonuga uma ua tuuina atu.  *Afai tou te le fia fesoasoani ia matou ma le atunuu, o le faaiuga mulimuli loa ou te faia o le tapunia lea o le faleoloa, ae faitalia outou ma saili auala e finau ai la outou mataupu mo le toe tatalaina o le tou faleoloa,* o le saunoaga faaiu lea a le alii faatonu.

Na taua e se sui o le kamupani i le Samoa News e faapea, e ui e le’i faasalaina le latou pisinisi talu ona amata mai le latou tautua i le tele o tausaga ua mavae, peitai o asiasiga faafuase’i faapenei ua latou masani ai, ma o lu’itau fo’i ia mo le pisinisi ina ia mautinoa e usita’i i faatonuga uma e tuuina atu.

Na taua e lea sui e faapea, *O le matou matafaioi pito a luga e faia i aso uma, ia mautinoa e lelei oloa ma taumafa o lo o faatau atu i le atunuu i aso taitasi.*