NUA: E LE O LEFITI O SE FA’AAO O SI’UFAGA, TA’U I MANU’A

LEFITI: O fa'alupega o Si'ufaga, afio mai Lefiti ma lana Pupuali'i

 

E le i nofo lelei i finagalo o afioga i Pupuali’i faapea ai faipule o le afioaga o Si’ufaga i Ta’u, Manu’a, le saunoaga a le susuga a Lefiti Atiulagi Pese e faapea, o ia o le Fa’aao o le nuu o Si’ufaga i Ta’u, Manu’a, e pei ona lomia i le lomiga a le To’asavili i le aso To’ona’i na te’a nei, Ianuari 18,2014.

 

O lea saunoaga mai le afioga i le Fa’atui ia Lefiti na mafua ai ona finagalo afioga i Pupuali’i e faamanino atili le mataupu ina ia manino Samoa po o ai tonu le fa’asao o le nu’u o Si’ufaga i Ta’u, Manu’a.

 

“E le o Lefiti o se Fa’aao o le nu’u o Si’ufaga, Ta’u i Manu’a, o le fa’aao o le nuu o Si’ufaga, o le Pupuali’i, o le alo o le Tui Manu’a Salofi, e le iloa la po o fea e oso mai ai Lefiti ma lana faalupega lea,” o le saunoaga lea a le afioga i le ali’i Senatoa ia Nuanuaolefeagaiga Saoluaga Nua.

 

E tusa ai ma upu faataoto o le afioaga o Si’ufaga, o le Pupuali’i e fa’asino lea ia Moliga, Leasau ma Nua.

 

Na faamanino atili e le afioga i le alii senatoa ia Nua sa fai ma sui o Pupuali’i e faapea, e le tau faamaninoina tulaga o upu o le nu’u i Si’ufaga, atoa ai ma lona Fa’aao, ma ua uma fo’i ona taoto talatu’u a le nuu e le mafai e se tasi ona toe suia.

 

O ni isi o mau na tuuina mai e Pupuali’i e faamausali ai la latou mau, o le Pupuali’i le fa’aao o Si’ufaga ae le o Lefiti, o le taimi na saili ai le tofi Senatoa mo Ta’u i Manu’a, lea sa finagalo ai Lefiti i le nofoa o le itumalo, peita’i sa fa’ailoa i ai e Moliga, o Nua lea ua tofia e fai ma sui o le itumalo i le Senate.

 

“O lea lava ua pupula ma manino le mata o le vai, o le Pupuali’i o le alo o Tui Manu’a Salofi, o fa’aao na o le nu’u o Si’ufaga i Ta’u Manu’a, ae le o Lefiti,” o le saunoaga lea a Nuanuaolefeagaiga.

 

Ae ina ua toe fesiligia le afioga i le ali’i Fa’atui ia Lefiti i sona finagalo e uiga i lenei mataupu i le aso ananafi, sa ia saunoa manino ai, e le mafai ona toe suia fa’avae o Si’ufaga na amata mai ai e tuaa ua mavae, o Lefiti o le fa’aao o le nu’u.

 

“Ou te talitonu so o se tagata na soifua a’e i totonu o Si’ufaga i Ta’u, Manu’a, latou te silafia uma lava faavae o le nuu ma ona faalupega, e faalupe fa’apea, ‘o Lefiti ma lona Pupuali’i’, i se isi faaupuga, o Lefiti o le fa’aao o le nu’u, ona fa’atoa soso’o ane ai lea o le Pupuali’i, e pei fo’i o isi nu’u ma afioaga o Samoa, ua uma lava ona taoto ona fa’avae ma ona talatu’u, e le mafai e se tagata se to’atasi ona taumafai e lepeti ma sui,” o le saunoaga lea a Lefiti.

 

Na musu le afioga i le Fa’atui e fa’aali sona finagalo e uiga i lenei mataupu ina ua toe fesiligia o ia e le Samoa News i le taeao ananafi.

 

Na taua e Lefiti e faapea, e alofa i lona nuu e le manatu fo’i e faafofoga Tutuila ma Manu’a o latou vevesi ma lana Pupuali’i i le tau sailiina o lenei mataupu i tulaga o paia ma mamalu faaleolaga nei, o mea e muta i le tu’ugamau, ae talu ai ua “a’afia fua le ma’ave’ave e le fua,’ e pei o lea muagagana i upu ma tala fela’ua’i solo i le ea, ua ia manatu ai loa, o le a fai sona finagalo puupuu e faamanino ai le mataupu.

 

O tulaga i fa’avae o le nuu o lo o taua e le Pupuali’i ua taumafai Lefiti e sui ma faaleaoga, sa teena malosi e le afioga i le Fa’atui lea tulaga.

 

“Ou te le o taumafai e sui ni fa’avae o lo’u nu’u pe fai fo’i ni faiga fou e le tusa ma upu tu’u ua uma ona faataoto e tuaa ua mavae, o le fa’avae sa’o lava ia o Si’ufaga, e tumau e faavavau, o Lefiti o le fa’aao o le nuu, ona faatoa soso’o ai loa lea o lana Pupuali’i, ou te le iloa la po o a fa’avae ua ou taumafai e sui ma faaleaga,” o le isi lea saunoaga a Lefiti.

 

O le vaiaso na te’a nei na faalauiloa aloaia ai e afioga i le Pupuali’i le faaiuga a Si’ufaga, e ala i le fa’ate’aeseina lea o le afioga a Lefiti mai le faiganuu a le afioaga, ina ua ia taumafai e sui faavae o le nuu.

 

Ae ina ua fesiligia e le Samoa News le afioga a Lefiti e tusa ai o lea faaiuga, sa ia faaalia ai le faateia o ia e faatatau i lenei faaiuga faanatinati ua faia, e aunoa ma le faamaonia o tuuaiga faasaga ia te ia.

 

Saunoa le ali’i Fa’atui, e i ai lona talitonuga e fa’aletagata le auala ua mafua ai le faaiuga faasaga ia te ia, ae talu ai o lona alofa i lona nu’u atoa ai ma lona naunau ia tumau pea le fealofaniga faamatai i le va o ia ma lona Pupuali’i, ua ia manatu ai o le a taoto ia tulaga uma e faatatau i le faaiuga e fa’ate’a ese o ia mai le faiganuu, se’i i ai se isi taeao fou ona toe sasa’a lea o le fafao ma toe faalelei le nuu.

 

“Pau la’u fautuaga i lau afioga Nuanuaolefeagaiga, a toe i ai ni faaiuga a le tatou nuu i mataupu faapenei, e le o le nusipepa le auala e faasoa ai upu a le nuu, ae o totonu lava o Si’ufaga e soalaupule ai le tofa ma le faautaga mau, ina ia puipui fa’avae o le nuu ae aua le puaina atu i ala o lo o faafofoga Tutuila ma Manu’a faapea Samoa atoa,” o le fautuaga faai’u lea a le afioga i le ali’i Fa’atui ia Lefiti.

 

Comment Here