I le fonotaga a le Komiti Fa’afoe o le Asosi Fusu a Amerika Samoa [American Samoa Boxing Federation] i le aso Lua o le vaiaso nei, na latou palotaina ai le susuga Norris Ala’iasa e avea ma Fa’atonu Fa’avaomalo mo Fusu’aga, fa’atasi ai ma le susuga Sanele Etuale e avea ma fesoasoani fa’apitoa mo Alai’asa i lea lava tofiga ua ia umia nei.

Ua mafua ona faia lea suiga tele, ona ua tatau ona i ai se sui fa’apea e lesitalaina fo’i i le Asosi Fusu a lo tatou Malo, ina ia gatusa ai le fa’atautaiga o la tatou Asosi Fusu ma aiaiga a le AIBA ua mae’a pasia ma fa’ata'oto mo Asosi Fusu uma a atunu’u uma o le lalolagi, o lo o avea ma latou totino.

O le tofiga lea sa tau’avea e le susuga Henry Tavake, peita’i, ona o tulaga le ma’alofia i le soifua galue ai o Tavake i le Asosi Fusu a Amerika Samoa, ua tu’uesea ai lona suafa mai le lisi o sui totino o le ASBF i le AIBA, ma ua fa’apea fo’i ona fa’ao’o lea fa’ailo i le ASNOC mo latou fa’amaumauga.

Ua fa’ailoa mai i ni isi o mata'upu o le fonotaga lea a le Komiti Fa’afoe o Fusu’aga ua aofia ai le tusi na tusi aloa’ia mai ai le ali’i Peresetene o Fusu’aga i Samoa, e fa’atalosaga mai se fesoasoani a le Peresetene o Fusu’aga i Amerika Samoa ma le Asosi Fusu a Amerika Samoa i le fa’amasinoga ma se fa’ai’uga a le Fa’amasinoga mo le sui o la latou Asosi Fusu o lo ’o saisaitia i moliga e fa’asaga ia te ia i’inei.

O la latou talosaga, ona ua tulata fo’i i taimi e a’o fa’apitoa ai tama fusu a Samoa, lea e aofia ai le talavou o Fa’amanu Aukuso, lea e saisaitia i’inei e le’i faia lava lona iloiloga e fa’atulaga ai sona i’uga. O le vave lava ona faia o le fa’ai’uga o lea talavou, o le vave fo’i lea ona gaoioi mai le Asosi Fusu a Samoa e fa’atino ma fa’ataunu’u le fa’asalaga, ae fa’afo’i atu lea sui i lona atunu’u e tulia ai lona fa’asalaga. O moliga o le sui lea, ona ua feusua’i ma se teineitiiti e le’i uma le pulega a matua.

O le isi mata'upu aoga tele i lea lava fonotaga, o le fa’atulagaina lea o se ta’amilosaga fusu mo le masina o Fepuari mo le fa’amoemoe e auina a se ‘au fusu mo Ausetalia i le Ta’amilosaga a le Oceania ia Mati 20-26, 2012. O i’ina lea ua fa’atulaga e le AIBA, afai ae manumalo ai le tama ma teine fusu, o i latou na e tauva i le Olemipeka i Lonetona ia Aukuso, 2012.

O le tulaga o le ta’amilosaga lea o le a fa’atautaia mo le tapenaina o se ‘au fusu mo le Oceania a lo tatou malo, ma soloa’i atu ai i le Olemipeka i Lonetona, ua pa’u atu nei ia Alai’asa ma lona fesoasoani o Sanele, e la te fa’atulagaina atoa mo Fepuari 20, 2012.

O lenei ta’amilosaga fusu, ua matua naunauta’i i la’ua nei e faia i se nofoaga tu taulaga, e lelei o lo ’o to’atele i ai fetaulaua’iga o femalaga’iga o lautele o le atunu’u, fa’atasi ai ma le fa’amoemoe e faia i le itula e 12:00 i le aoauli se’ia o’o ina mae’a po ’o le itula e 5:00, a’o maua pea pasi mo le mamalu na maimoaina.

O le a toe fa’ailoa atu i fa’asalalauga ma tala tusia le nofoaga tonu o le a faia ai le ta’amilosaga fusu lea, peita’i, ua toeitiiti lava mae’a fa’atulaga paga mo lea aso fa’amoemoeina, ma ua mafuli fo’i Kalapu 'ese'ese e koleni a latou tama ma teine fusu, ina ia lava tapena mo lea aso tu’upoina.

Ua mae’a fa’ao’o uma le i’ugafono a le AIBA e tusa o le Oceania Boxing i Ausetalia, ina ia auai uma i ai atumotu ma Niu Sila ma Ausetalia i lea fa’amoemoe. O lo o ua i ai fo’i lo tatou fa’amoemoe maualuga, e ao ina silia ma le to’afa tama fusu ma teine fusu e auina atu i Ausetalia, ia maua sa tatou sui mo le Olemipeka.

O la tatou Peresetene o le Asosi Fusu a Amerika Samoa, Mapu Jamiahs, o se tasi lea o Ta'ita'ifono o le Komisi mo le Tupulaga Talavou ma Tama ma teine Fusu a le AIBA, ma ua fa’ato’a taliu mai fo’i o ia mai fonotaga fa’aletausaga sa fa’ai’uina ai le tausaga 2011 ae fa’atulaga ai fo’i aiaiga o komisi ta’itasi e 8 o le AIBA, ina ia usita’ia tulafono, aiaiga ma i’ufono a le AIBA e atunu’u uma o le lalolagi, a’o alo faiva atu mo tagata fusu uma i le Olemipeka i Lonetona Aukuso 2012.

O lo o ua fa’amalosia mai uma fo’i e le AIBA ana tulafono uma i Asosi Fusu a atunu’u ta’itasi o lo ’o avea ma latou totino, e o’o lava i tama fusu ma teine fusu fa’ato’a amatalia taumafaiga i le fa’agatama, e taua i latou uma i le AIBA.