Ads by Google Ads by Google

Aloaia e le malo tautua a fitafita o le taua ua maliliu


Ta’ita’i o le atunu’u e aofia ai le afioga i le Lutena Kovana ia Lemanu Palepoi Sialega Mauga ma le afioga i le Faipule mai le laumua i Uosigitone ia Aumua Amata, atoa ai ma ni isi o fitafita tuai ma le mamalu o le atunu’u na auai i le sauniga sa fa’ataunu’uina i luga o le sami i le taeao ananafi. [ata AF]

Le taimi o le tula’i fa’aaloalo o fitafita tuai ma ni isi o le atunu’u i le sauniga e aloaia ai soifua o fitafita uma o le taua ua maliliu ona o le puipuiina o le saolotoga ma le filemu o le lalolagi e aofia ai ma Amerika Samoa, lea na fa’ataunu’uina i luga o le va’a o le malo o le Manu’atele i gatai o Utulei i le taeao o le aso ananafi. [ata AF]
ausage@samoanews.com

O se sauniga fa’apitoa sa faia i luga o le sami i le taeao ananafi e ala i le fa’aaogaina o le va’a a le malo o le Manu’atele, na mafai ai ona aloaia e le malo le tautua a fitafita uma o le taua na maliliu i le sami, a o fa’atinoina ai la latou tautua e ala i le puipuiina lea o le saogalemu ma le sa’olotoga o le lalolagi atoa ai ma Amerika Samoa.

 

E le na o Amerika Samoa sa fa’ataunu’uina ai lenei sauniga tele, ae sa mafai fo’i ona molimauina i soo se tafa o le lalolagi e aofia ai ma le Iunaite Setete o Amerika.

 

A o le i fa’ataunu’uina le sauniga aloaia sa faia i luga o le sami, e 2 isi sauniga pupu’u fa’apitoa sa fa’ataunu’uina e le malo. O le ulua’i sauniga sa fa’ataunu’uina lea i le ma’a fa’amanatu a fitafita tuai i Tafuna, lea na tauaao atu ai e ta’ita’i o le atunu’u le teu fugalaau e fa’ailoa ai le aloaia o le tautua toto sa ofoina mai e fitafita uma a le atunu’u ua lagomau mai Tia Sa.

 

O le afioga i le Lutena Kovana ia Lemanu Palepoi Sialega Mauga sa fai mai sui o le afioga i le ali’i Kovana ia Lolo Matalasi Moliga e le’i mafai ona auai, atoa ai ma le afioga i le Sui Faipule mai le laumua i Uosigitone ia Aumua Amata, fa’atasi ai ma sui o fitafita tuai ma o latou aiga.

 

O le mae’a ai o le ulua’i sauniga i Tafuna, na soso’o ai loa lea ma le sauniga lona lua sa fa’ataunu’uina lea i le fanua tanu o le malo i Satala, lea foi o lo o lagomau ai ni isi o fitafita sa maliliu i le taimi o le Taua Lona Lua o le lalolagi.

 

O le afioga fo’i ia Lemanu ma le Faipule ia Aumua na tauaaoina atu teu fugalaau i luga o le tu’ugamau o se tasi o fitafita tuai ua maliu, e aloaia ai la latou tautua mo le atunu’u ma le lalolagi.

 

O le sauniga lona tolu na fa’ataunu’uina lea i le sami i luga o le va’a a le Manu’atele, lea fo’i sa auai ta’ita’i o le malo fa’apea ai ni isi o fitafita tuai ma o latou aiga, mo le molimauina o lenei fa’amoemoe taua.

 

O le susuga i le Tiakono ia Malaki Timu na taitaia le sauniga i le tatalo, ma le pese sa lagiina lea e le mamalu o le aofia na auai, e fa’ailoa ai lagona o le fa’afetai ma le fa’amanu, ona o le tautua sa mafai ona ofoina atu e tama fanau a le atunu’u sa tautua i le taua, lea na maliliu i luga o le sami.

 

Sa manatua ai fo’i i lea lava sauniga faapitoa soifua o tama fanau uma a le atunu’u na maliliu i le sami a o feagai ai ma le fa’atinoina o le latou tautua mo Amerika Samoa.

 

O le afioga a Lemanu sa saunoa i le saunoaga autu o le polokalame, lea na ia saunoa ai i le taua o le ofoina atu o le ola e auauna ai mo le atunu’u.

 

“O le aso lenei e le o se aso fa’anoanoa, ae o se aso tatou te fiafia ma fa’amanatuina ai le tautua sa mafai ona ofoina mai e Tama ma Tina, alo ma fanau o le atunu’u sa tautua i vaega ‘au a le malo tele o Amerika, mo le puipuia lea o le saogalemu ma le sa’olotoga o le lalolagi ma Amerika Samoa”, o le saunoaga lea a Lemanu, o ia fo’i o se tasi o fitafita tuai o le taua.

 

“Aua nei o tatou manatu fa’atauva’a i le tautua toto sa ofoina ai e tama fanau a le atunu’u, ae tatou manatu loloto i le taua o le fa’amoemoe sa o latou asaina mai, o le naunau lea ina ia maua e le lalolagi ma Amerika Samoa se olaga fiafia ma le sa’oloto”.

 

“Ia tatou manatua o latou aiga i a tatou talosaga i aso fai soo, manatua o latou ta’ito’alua ma fanau i soo se taimi, aua e le faigofie le tulaga o lo o feagai ma i latou i le taimi nei, ona o le motusia o le mafutaga ma le sa pele i o latou loto, ona o lea ua ofo mai o latou ola e auauna ai mo le atunu’u”.

 

E le gata i fitafita o le taua na maliliu i le sami sa manatua i le saunoaga a Lemanu, ae na aofia ai fo’i ma tagatanu’u uma o le atunu’u na maliliu a o fa’atinoina ai o latou tiute mo le tautuaina o aiga, nu’u ma le atunu’u atoa.

 

“Ia tatou manatua fo’i fitafita o le taua o lo o tautua i soo se tafa o le taua i le taimi nei, o i latou o Tama ma Tina, o alo ma fanau pele a le atunu’u, o lo o galulue ona o le manatu ina ia maua pea e Amerika Samoa ma le lalolagi se olaga filemu ma le sa’oloto”, o le saunoaga lea a Lemanu.

 

“Ia avea le tautua toto sa ofoina mai e fitafita o le taua ua fai i lagi la latou folauga e le gata o le sami ae fa’apea fo’i ma le laueleele, e fa’amanatu mai ai pea ia i latou o loo ola ma soifua pea, e taua tele lo tatou faia o se galuega lelei mo le atunu’u, o lou aiga faapea ai le lalolagi, e pei fo’i o le taulaga na ofoina ai e le Atua, e ala i le maliu o lona alo pele o Iesu Keriso e fa’amagalo ai agasala a le lalolagi”, o le fa’aiuga lea o le saunoaga a Lemanu.

 

Na taua e ni isi o fitafita tuai le taua tele o lenei sauniga fa’amanatu, e toe manatua ai le fita o le galuega sa latou fa’atinoina ao tautua ai i vaega ‘au eseese a le malo tele o Amerika.